1 Dameŋ irec faicnao Jesuzi hae sâko hae pitic mâmâc fota fotâcne juhuc ŋic miti jaza qazuc erâ Anuture uucmaŋte Biŋebiaŋ jaza jujec. Eme bâjâpehuc jumbiŋ ine ʒiŋuc: Motecfâcne 12, 2 erâ ŋokac tucne, mârâcko demoŋ â huchec juhapie jâpe bâniniŋ ejarewec. Jaŋeraonec moc Maria Madala haeonec, e demoŋ 7 jâpecnewec. 3 Erâ moc ʒâŋene Johana, Herodere soŋaŋ Kuza ere ŋonâŋ, erâ Susana erâ ŋokac gâcne. Jaŋe moneŋ mafa fojarewecte e â motecfâcne bâmec bajare jumbieŋ.

4 Haene haene irec ŋic Jesurao qaja fuserâ tumaŋnepie honec-joparâ kesaic dâŋ moc ʒiŋuc jazawec: 5 “Ŋic moczi wiac hândâŋne tieocte gieo rawec. Tiehame hândâŋne gâcnezi hatao waha heme ŋic jaŋe âtenʒaŋnembiŋ. Eme sawa wipezi fisirâ nâfârewec. 6 Hândâŋne gâcne qânâ siecko hewec. Eme izi hahaŋkekicnere âkeʒurâ bâpâŋ wefurâ hâmowec. 7 Hândâŋne gâcnezi hofâ qinʒiŋ ŋondeŋko hewec. Eme âkeʒurâ wefume hofâ qinʒiŋzi iŋuc jaha wefurâ hehâmowec. 8 Á hândâŋne gâcnezi ine mâreŋ guecko herâ fârine bocjaha fuawec, jâcne gâcne irec hândâŋne 100, 100 iŋuc fuawec.” Dâŋ i mutararâ hahaŋne bahuc muwec: “Moc e hazecheczi dâŋ keczi manazejec.”

9 Eme motecfâcne jaŋe kesaic dâŋ irec fuŋnere wiocnepie jazawec: 10 “Anuture uucmaŋko raraʒire dâŋ soŋne i ŋoŋe mananiŋte mukicne, gâcne jaŋe ine kesaic dâŋ mananʒepieŋ. Ehuc ʒâŋe fiipiehuc wiac mi hone taranʒepieŋ â hazeczi dâŋ mana-bipiehuc fuŋne mi mana taranʒepieŋ. 11 Kesaic dâŋ mupac irec fuŋne ine ʒiŋuc: Anuture dâŋzi hândâŋ ekac. 12 Hândâŋne hatao hewec sâc iŋucne juniŋmu jaŋe miti manapie maŋjeŋicko huhame izia, mana ʒakierâ juju bâfuanʒipiŋte Sataŋzi fisi ro bawiseekac. 13 Hândâŋne qânâ siecko hewec sâc iŋucne juniŋmu, jaŋe miti manarâ izia aŋac-jopaocmu. Eme maŋjeŋicko gâtâ mi bakicnere dameŋ bembeŋne mac bajuhapie eesâic fuame miti râpeckeeŋgopieŋ. 14 Hândâŋne hofâ qinʒiŋko hewec sâc iŋucne juniŋmu, jaŋe miti mamana i mananiŋmu, erâ sahackopec wiac irec mamaŋ gugutuŋ jupie moneŋ mafa mâriri irec aŋaczi miti hehâmome fârimâc eekac. 15 Hândâŋne mâreŋ guecko hewec sâc iŋucne juniŋmu, jaŋe miti manarâ maŋjeŋic emasaŋkerâ aimuŋ bajueŋgopieŋ, ehuc ɋic wânʒâŋ erâ fârine bâfuaeŋgopieŋ.

16 “Mo ŋiczi lambe qazerâ kuʒizi hetutuckeocmu, me ŋeŋe rurumaŋko heme ŋeocmu? I aricne, lambe i ŋeŋe-ticnao hepene ŋehuc fic maŋne âke tamaeme ŋic jaŋe sâcne honehuc feniŋmu. 17 Wiac soŋsoŋ fokac i foku mi foocmu, i bataniŋkezo, â wiac hemackekicne fokac i foku mi foocmu, i qaratiezo, eme fuŋne jaŋgeŋkeocmu. 18 Moc e wiac râcnekicne bajume kiqecnecnezo, â moc e wiac râcnekicne burec burec bajume jâoc rofârezo. Irec ŋoŋe miti hazec uruc jaha manapaŋkenʒepieŋ”

19 Dameŋ mocko ŋic guru sâko Jesu orâŋkerâ domahapie neŋgoc ɋafâc-ticne warerâ ŋic jaŋerao quŋkerâ taic domambiŋ. 20 Iŋuc epie ŋic moczi honec-joparâ Jesu ʒiŋuc âzâcnewec: “Neŋgoc ɋafâcge honecguniŋte juwic hae ʒoŋao domaŋgopieŋ.” 21 Mume Jesuzi ŋic ʒiŋuc jazawec: “Anuture dâŋ manarâ reŋkeeŋgopieŋ kecʒizi neŋgoc ɋafâc-nane eŋgopieŋ.”

22 Ʒoaŋ mocko Jesu â motecfâcne wokeo fembiŋ. Wokeo ferâ ʒiŋuc jazawec: “Nâŋâc riqic fotâcnerâ ocniŋuc raʒinaŋ.” Mume manapie rambiŋ. 23 Rahuc Jesu guŋte ecneme waha fowec. Fohame mâŋâŋ hâhâwicne qame riqic sâqoreme sirizi wokemaŋko hume riqicko huzo embiŋ. 24 Eme Jesu wiwickerâ ʒiŋuc âzâcnembiŋ: Qaqazu qaqazu, nâŋe riqicko huzo eŋgopeneŋ. Mupie fahare mâŋâŋ â siri dâŋ mujacteme niniŋkepire benoŋ bawec. 25 Eme ʒiŋuc jazawec: “Ŋoŋe mamanasiŋ-ŋeŋic weni.” Motec jaŋe ine wiac i honerâ tuc ŋeŋe farac erâ mumbiŋ: “Opo, e mo ŋic mo, irec mâŋâŋ â siri dâŋ jasame reŋkekopirec.”

26 Eme raku riqic fotâcnerâ Galilaia mâreŋ ŋifecnao Gerasene ŋic jaŋerao fisimbiŋ. 27 Ira fisirâ tiŋko feme haeonec ŋic moc warewec. Ŋic ere maŋko demoŋ bocjaha jupie dameŋ ʒora ŋaqi mi rojuwec â ficko mi fojujec. E mâc ʒâŋeruŋ gieo sasawa qac qâsoric juwec. 28 Eme Jesu honerâ owackerâ mâreŋko rândiŋke qa erâ dâŋ hahaŋne bahuc ʒiŋuc muwec: “Jesu, go Anutu femicne sâkore Ŋokâzi wemocte norao warekomec? Go ʒâic gie mi mac narezemec.” 29 Jesuzi “demoŋ go ŋickonec wefu rac” mume iŋuc hâcne âzâcnewec. Demoŋ e dameŋ ʒora ŋic maŋne bâpuriŋkeme momori eme ŋic jaŋe me kikene qarâ soŋaŋ-ticne jumbiŋ. Eme demoŋzi ecneme repa hetâc qâtâcnerâ tuhuo wiserâ rajujec. 30 Eme Jesuzi wiocnerâ muwec: “Ʒâŋege mo?” Wiocneme muwec: “No ʒâŋe-nane Gurusâko.” Demoŋ bocjahazi ŋicmaŋko jumbiŋ irec. 31 Eme jaŋe Jesuzi hârâcko sorec-jopame hunʒipiŋte mu wâwâsic ecnembiŋ. 32 Eme mâreŋ ira bec guru sâko qondaŋ gieo jumbiŋ. Irec demoŋ jaŋe mana-jareme becmaŋko huniŋte âzâcnembiŋ. 33 Eme mana-jareme ŋickonec wefurâ becmaŋko humbiŋ. Iŋuc epie bec jaŋe heâŋkonec suackerâ ra duŋ riqic ŋewec ira hurâ hâmo-fârembiŋ. 34 Eme soŋaŋ jaŋe i honerâ gasacke rarâ ŋic hae gie sâc jurambiŋ dâŋ binaŋ ejarembiŋ. 35 Jazapie jaŋe ŋic demoŋ guru jâpecnekicne e honeniŋte fisi-fârembiŋ. Jesurao fisirâ honembiŋ: Ŋic demoŋ guruhec juweczi ŋaqihec â mamanahec Jesure maŋfuŋko ŋewec. Honerâ su bipic tatara ejareme domambiŋ. 36 Domahapie wiac hone manac embiŋ jaŋe ŋic demoŋhec juweczi biaŋkewec irec dâŋ binaŋ ejarembiŋ. 37 Eme Gerasene mâreŋ irec ŋic jaŋe boc hâwic-jopame Jesu e mâreŋ-jeŋic beherâ raocte âzâcnembiŋ. Âzâcnepie risieocte wokeo feme 38 ŋic demoŋ jâpecnekicne eki bâjâpeocte numucnewec. Numucneme Jesuzi ʒiŋuc muhuc qataracnewec: 39 “Go wiacfâcge jaŋehec juhuc Anutuzi gorao mâsi sâko bakac irec biŋe ŋic jazazemec.” Mume ŋic e risierâ Jesuzi bâpiaŋkewec irec biŋe haefâc-ticne jaza-fârewec.

40 Ŋic jaŋe Jesure woŋec juhapie fisime honerâ ofac hecnembiŋ. 41 Ehame mitific soŋaŋ moc, ʒâŋene Jairo, e warerâ Jesure maŋfuŋko fodaperâ mu wâsic ecnewec. 42 Otâ-ticne mocjaha jara-ticne 12 eha hâmozo ehuc fowecte Jesu hefârewec. Eme Jesuzi manarâ rahame ŋic jaŋe roʒâc bâʒâŋiŋ ecnembiŋ. 43 Eme ŋondeŋ-jeŋicko ŋokac moc juwec, e soc rohuc juhame jara 12 ewec. Eme dokta jaŋe bafickeniŋte bâipieku behembiŋ. 44 Eme ŋokac eki hâcne Jesure râpefuŋko rarâ ŋaqi-ticne bâuawec. Bâuame izia socticne ʒickewec. 45 Eme Jesuzi wiorâ muwec: “Mozi bâuacnukac?” Mume ŋic jaŋe micke-fârepie Petorozi ʒiŋuc muwec: “Qaqazu, ŋic jaŋe roʒâc bâʒâŋiŋ egarehuc heuacguŋgopieŋ.” 46 Mume Jesuzi ʒiŋuc muwec: “Aricne, moczi bâuacnuhame tâpiri-nane rame manapac.” 47 Eme ŋokac e fuŋne-nane taniŋkekac murâ ɋarac ɋarac qahuc Jesure maŋfuŋko fodaperâ hucticnere dâŋ â bâuarâ izia ɋiɋic qawec irec dâŋ mâmâc mufuame mana-fârembiŋ. 48 Eme Jesuzi ʒiŋuc âzâcnewec: “Otâ-mae, mamanasiŋgere biaŋgukac, buge âke mâteŋkeha rac.”

49 Iŋuc muhuc domahame mitific soŋaŋte fickonec dâŋ ʒiŋuc warewec: “Otâge hâmokac, irec qaqazu maŋgâŋ mi ecnetec warezejec.” 50 Eme dâŋ i Jesuzi manarâ soŋaŋ ʒiŋuc âzâcnewec: “Mi hâwicguoc, manasiŋnutec otâge biaŋkeocmu.” 51 Iŋuc murâ ficko fisirâ gâcne hecke-jareme domahapie Petoro, Johane, Jakobo â naru neŋgoc mamac jahecne jaŋe sawa rocjopame raʒimbiŋ. 52 Eme ŋic ŋokac ki mamakuc ehuc domahapie ʒiŋuc jazawec: “Mi kioniŋ, naru e mi hâmojec, e mâc guŋ fokac.” 53 Eme jaŋe hâmo-jâmbâŋkewec i mana sanaŋkehuc gâwiecnembiŋ. 54 Eme Jesuzi naru menao rorâ wiracnerâ muwec: “Naru, go faharec.” 55 Mume izia maŋ qâqâtâc-ticne risieme faharewec. Fahareme nânâ râcnepie nâocte jazawec. 56 Eme neŋgoc mamacne jahe manapire hâhâwicne jâmbâŋ ewec. Eme Jesuzi irec biŋe ŋic mi jazaniŋte mu hezuc ejarewec.