1 Ehame ŋic jaŋe erao fisi sâqorehuc keketeŋ domahuc kikeo ââtec embiŋ. Iŋuc ehuc domahapie fuŋkerâ motecfâc-ticne qanaŋ dâŋ ʒiŋuc jazawec: “Ŋoŋe farisaio hâmu goreŋ-jeŋicte bâec bacnehuc paŋsawa junʒepieŋ. No maŋsioc-jeŋicte mukopac. 2 Wiac hemackekicne fokac i foku mi foocmu, i qaratiezo, â wiac soŋsoŋ fokac i foku mi foocmu, i bataniŋkezo. 3 Ŋoŋe dapâcko dâŋ kamierâ mueŋgopieŋ i juku ʒoaŋ ɋaɋacko ŋeratieocmu, â ficmaŋko ɋawe faio mueŋgopieŋ i juku ʒae sâkoo fuaocmu.

4 “Âgofâc-nane, no ʒiŋuc ŋazape: Sahac-ŋeŋic sawa qarâ irec fainao wiac eŋareniŋte tâpiri basaniŋmu jaŋere mi hâwic-ŋopazejec. 5 Á mocte hâwic-ŋopazejec, irec ŋazape mananiŋ: Hârâcko qa sâroc eŋareocte tâpiri focnekac, ere jâmbomac hâwic-ŋopaocte mukopac. 6 Sawa hehetâc wipe i wiac omane, i furine mi bazo. Eme Anutu e jaŋeraonec mocjaha mac qâoma mi ecneekac. 7 Á ŋic ŋoŋerao ine qizec susuc-ŋeŋicte ʒare i wâc mana-fâreekac. Irec hâwicmâc junʒepieŋ, ŋoŋe sawa hehetâc wipe mâcne, ŋoŋe ŋic.

8 “Erâ moc ŋazape mananiŋ: Moc e ŋic jaŋere maio muɋaɋacnuocmu e ŋic Fâri Wâtuŋnezi iŋuc jaha Anuture aŋelofâc jaŋere maio muɋaɋackeocmu. 9 Á moc e ŋic jaŋere maio mic bacnuocmu, e Ŋic Fâri Wâtuŋnezi iŋuc jaha Anuture aŋelofâc jaŋere maio mic baocmu.

10 “Moc e Ŋic Fâri Wâtuŋne musoriŋkeocmu, e sâqocne i bâtâmirecnezo, â moc e Tiri Mâro musoriŋkeocmu, e sâqocne i mi bâtâmirecnezo. 11 Juku mitific-jeŋicko me kia jaŋerao bacŋopa rapie dâŋ ŋifecne weniŋuc munaŋmu muhuc mana mezac mi enʒepieŋ. 12 Dameŋ ira dâŋ muniŋmu i Tiri Mârozi mufua-ŋareocmu.”

13 Eme ŋic ŋondeŋkonec ŋic moczi Jesu ʒiŋuc âzâcnewec: “Qaqazu, hahac-nanezi mamacte merâfâc buc bajuekac, irec go âzâcnetec bârâwiŋnerâ tucne no narezejec.” 14 Mume Jesuzi ʒiŋuc âzâcnewec: “Mozi no soŋaŋ me kia râecnuwecte norao mukic?”

15 Iŋuc murâ dâŋ moc ʒiŋuc ʒuhuckewec: “Ŋoŋe buchâro junʒipiŋte bâec bahuc maŋŋeŋic soŋaŋkenʒepieŋ.” 16 Iŋuc murâ dâŋ herâricne moc ʒiŋuc jazawec: “Ŋicbomboŋ moc e kise mâriri sâko fuacnewec. 17 Eme maŋticnezi ʒiŋuc muwec: ‘Wenac epemu? Kise fârine sâko fic wena guruckepe? 18 Iŋuc murâ muwec: ‘Miŋecne manakopac, no kisefic heropierâ ɋâricne bâsokarâ barâ kise mâriri-nane hepe ŋeocmu. 19 Erâ maŋnanezi ʒiŋuc mupemu: No mâriri sâko fonarekacte ŋemac qamanahuc dameŋ ʒora aŋacnuha nâhuc juzepac. 20 Iŋuc mume Anutuzi ʒiŋuc âzâcnewec: ‘Mutuc go, ŋafe ʒi jaha jujuge gowac rozo. Eme wiac râe qâzuc emeŋ i more eocmu? 21 Moc e Anuturaonec maŋ mâriri mi focneha e jahacne biŋe nânâ mafa hure hemârec eocmu, e sâc ijaha fuacneocmu.”

22 Erâ motecfâcne ʒiŋuc jazawec: “Irec hâcne ŋazakopac, ŋoŋe juju-ŋeŋicte mana mezac ehuc ʒiŋuc mi munʒepieŋ: ‘Wemo wiac ba nâc enaŋmu? Me sahac-ŋeŋicte mu heŋɋâŋ ehuc ʒiŋuc mi munʒepieŋ: ‘Wemo wiac rojunaŋmu? 23 Nânâzi fârine mâcne, juju-ŋeŋiczi fârine, â ŋaqi qoruczi fârine mâcne, sahac-ŋeŋiczi fârine. 24 Ŋoŋe kâec kâec honecjopaniŋ, jaŋe he sarac mi eeŋgopieŋ â nâ rowaŋ â nâ ukic mi eeŋgopieŋ. Eme Anutuzi sifu nânâ bâfua-jareekac. Ŋoŋe ine wipe mâcne, ŋone ŋic. 25 Me tâpiri-ŋeŋic moc fokacko mu waiʒoc ehuc juju dameŋ-ŋeŋic sâcne moc bâʒoraniŋmu me? 26 Ŋoŋe wiac piticne iŋucnere eipierâ wemocte wiac gâcne sâkore mana mezac boc eeŋgopieŋ? 27 Ŋoŋe firindoac honeniŋ, e ŋaqi qoruc-ticnere gie mi baekac, erâ mupe mananiŋ, Salomo e eri qaraweŋ-ticneheczi hawari biaŋ iŋucne mi rojuwec. 28 Eme kâteo âri wiac dodocne, miŋecgac iŋucne fuaekac, â tomâcko iŋucne mârâŋkeekac, i Anutuzi sifu mume hawari biaŋ fuaekac, ehuc ŋoŋere ŋaqi qoruc mi bâfuaocmu muŋgopieŋ, mamanasiŋ gogoroŋ ŋoŋe¡ 29 Irec ŋoŋe maŋbahac-ŋopame ʒiŋuc boc mi munʒepieŋ: ‘Wemo wiac ba nâc enaŋmu? 30 I qâpuc mâreŋ sâc jaŋe maŋ mamanasu-jeŋic ira duckepie foekac. Ŋoŋe wiac i tâmiric sâcne mi juniŋmu, i Mamac-ŋeŋiczi manakac. 31 Ŋoŋe ine ere uucmaŋ fua tâcneocte maŋŋeŋic râepie domazejec, eme fainao wiac jabane i wâc fua-ŋareocmu. 32 Guru pitic ŋoŋe hâwicmâc junʒepieŋ, Mamac-ŋeŋic e uucmaŋ izi ɋoroc-ŋopaocte maname sâckewec. 33 Ŋoŋe wiac foŋarekac i hapetac qikiŋne-jarenʒepieŋ, erâ moneŋ kânoŋ sucketâc tâmiric bâfuanʒepieŋ, erâ sambâŋko boreŋ ʒeŋaŋ fofo hati hurenʒepieŋ. Ira ŋiczi fiuc mi roŋareniŋmu â wâfuzi mi sipiricke-ŋareocmu. 34 Ʒeŋaŋ-ŋeŋic foocmu ijaha maŋŋeŋic foocmu.

35 “Ŋoŋe kambaŋ-ŋeŋic qarâ lambe-ŋeŋic qazepie ʒazejec. 36 Ehuc kiŋaŋ motec jaŋe ŋicwofuŋ-jeŋiczi mâreŋ ʒorickonec risierâ motâcko heickeme biac rocneniŋte woŋec juniŋmu jaŋe iŋucne enʒepieŋ. 37 Ŋicwofuŋ e risierâ kiŋaŋ motec maŋɋâri juhapie bâfuac-joparâ jaŋere maname biaŋkeocmu. No jâmbomac ŋazape: E gie qoruc-ticne jomarâ nânâ teboo râec-joparâ nânâ gumec-jopaocte kiŋaŋ qajareocmu. 38 Me ŋafe ʒâʒâŋiŋko me ŋafe furec hehec-jekicko risierâ maŋɋâri juhapie bâfuac-jopaocmu ine biaŋke-jâmbâŋkeocmu. 39 Ŋoŋe fuŋne ʒiŋuc mananiŋ, hae moc irec ŋic jaŋe râsi ŋafe ira fisiniŋmu, dameŋ iŋuc manarâ maŋɋâri jaha juhuc hae-jeŋic soŋaŋkeniŋmu. 40 Eme Ŋic Fâri Wâtuŋne e iŋuc jaha mi manasuniŋmu dameŋ ira fisiocmure ʒawierâ junʒepieŋ.”

41 Jesu e dâŋ iŋuc mume Petorozi wiocnerâ muwec: “Wofuŋ go kesaic dâŋ ʒi bucnâŋecte me mâmâc sâko-nâŋecte mukomec?” 42 Wiome Wofuŋzi dâŋ moc ʒiŋuc ʒuhuckerâ muwec: “Ŋicbomboŋ moczi kiŋaŋ qaqafâc-ticne jaŋere soŋaŋ moc râehuc ʒiŋuc âzâcneocmu: ‘No ra juhape go soŋaŋ-jopahuc dameŋkoa nânâ qowi sâcjeŋic jarehuc juzemec. Eme e weniŋuc jume soŋaŋ maŋhec â micrereŋhec mucnezo? 43 Soŋaŋ e gie mucnekicne i aijakic jaha bahuc juhame bomboŋ-ticnezi fisiocmu, soŋaŋ iŋucnere manape ʒerine ekac. 44 No jâmbomac mupe mananiŋ: E ŋic i soŋaŋ kâcɋene râehuc wiac-ticne mâmâc sasawa soŋaŋkeocte mucneocmu. 45 Me ŋic e soŋaŋ sâqocne juhuctecne maŋnezi ʒiŋuc muocmu: ‘Bomboŋ-nane e jâpec mâcne, juku jaha risiezokac. Iŋuc muhuc kiŋaŋ qaqa qa imac ejareocmu, â qâoma erâ wiac kosa ehuc juocmu. 46 Ehuc ŋicbomboŋ-ticne risieocmu dameŋ irec mi mamanasu nâme nikec juocmu, ine ŋicbomboŋ e ututuŋ fisirâ hetâc qâtâcnerâ miti bâbâsifuc ŋic jaŋere jujuo râeocmu. 47 Kiŋaŋ motec moc e bomboŋ-ticnere micdâŋ mana-hâmo-bipiehuc qaqatara bâfuaocmu, e ʒika ŋemâcne kiocmu, 48 â moc e bomboŋ-ticnere micdâŋ kâuc bahuc qaqatara bâfuaocmu, e ʒika afecne kiocmu. Moc e wiac ŋemâcne râcne tahac ecnekicnezi fârine ŋemâcne jaha bâfuame sâckeocmu. Á moc e gie kâcɋene mucnekicnezi ɋicwânʒâŋ kâcɋene jaha bâfuame sâckeocmu.

49 No mâreŋko ʒoc ruqepe ʒaocte wahapo. Erâ i biac bâruŋ-keocte bunane âeckeekac. 50 No opâ moc ruapemurâ munarekicne, eme i epe taraocte maŋnanezi ʒoʒoc fificne afecne mi enareekac. 51 Ŋoŋe nore ʒiŋuc mi munʒepieŋ: ‘E wama bâfuaocte wahawec. Aricne, no fâfâuc bâfuazore wahapo. 52 Irec ʒiŋuczia fuŋkerâ kecʒiŋuc fua raocmu: Fic moc irec ŋic 5 jaŋe fâuckerâ hehewic eniŋmu, ŋifec 2 â ŋifec 3. 53 Erâ mame ŋokâ jahe fâuckerâ hehewic enicmu â neŋgoc otâ jahe fâuckerâ hehewic enicmu â jojoŋaozi fâuckerâ hehewic enicmu.”

54 Iŋuc murâ ŋic ŋokac mâmâc sâko-jeŋic ʒiŋuc jazawe: “ŋoŋe mâreŋ âke gâpâreme honerâ izia mueŋgopieŋ, ‘Hoe warekac. Muhapie iŋuc eekac. 55 Mâreŋ emasaŋkeme honerâ mueŋgopieŋ, ‘Ʒoaŋ qaocmu. Muhapie iŋuc eekac. 56 Burecŋic, ŋoŋe karorac qânikiŋ irec fuŋne manaeŋgopieŋ, â dameŋ ʒirec fuŋne ine wemocte mi mana taraeŋgopieŋ? 57 Ŋoŋe weniŋucte hata tiŋne â hehesicne hone ʒâŋitac mi eeŋgopieŋ? 58 Go kisâgehec dâŋŋekic kiarao baranicmu. Eme hatao rahuc qizec qacnetec dâŋŋekic mufâsâezepirec. Iŋuc mi etec kisâgezi kiarao mume eki manarâ momori-ticne ecneme kâpâcwâru ficko râecguocmu. 59 No jâmbomac gazape: Go ira ŋeku mâc mi wefucmu, âgogere tofa bazutec tara-jâmbâŋkeme jaha wefucmu.”