FILIPI
Paulo e miti kiŋaŋ ʒâʒâŋiŋ moc rawec i raku Asia mâreŋ masunao hâwecmecko hae moc ŋewec ʒâŋene Troa, ira fisiwec. Fisirâ juhame guŋko Airopa mâreŋkonec ŋic moczi wira wâwâsic ecneme manarâ Airopa mâreŋko rawec. Raku Makedonia mâreŋko Filipi haeo fisiwec (Aposolo 16:9-12). Luka â Sila jahe ehec mâmâc jumbiŋ. Eme Paulo e hae ira miti mume Lidiazi mana ʒakierâ hezu hewâneŋ ejarewec. Ʒâhec ine Paulo â Sila kâcbiŋzi jofarâ kâpâcwâru ficko râec-jofambiŋ. Ira fohapire ŋafeo homeŋzi motâc bâŋgoroŋkeme soŋaŋ e sahac-ticne qazo ewec. Eme hae fureme Luka e ijaha juhame Paulo â Sila jahe Tesalonike haeo rapic (Aposolo 16:14-40).
Filipi haeonec jaŋe mitire mana aŋac boc epie Paulozi jaŋere bubiaŋ kâcɋene bajuwec. Ehuc ʒiŋuc qâreŋke-jarewec: Ŋoŋe hâcne eri bubiaŋfâc-nane (gaŋ 4:1). Hae gâcnaoneczi Paulo moneŋ mafa râcnezo mupie qikiŋnewec. Filipi haeonec miti ŋic ŋokac jaŋe ine Paulore maŋjeŋic boc domawecte bubiaŋ wiac râcnepie rojujec (gaŋ 4:10-18). Roma haeo kâpâcwâru ficko ŋehame Epafodito bubiaŋ wiac bâmockerâ râcnepie barâ rawec. Erâ Roma haeo fisirâ hucsâko bame hâmozo ewec. Foku ɋiɋic qame Paulozi soreme hae-ticnao risiewec, ehuc Paulore papia i bafisirâ âgofâcne jarewec (gaŋ 2:25-35).
Paulozi ʒeri bubiaŋ dâŋ bocjaha qâreŋke-jarewec (gaŋ 3:1 â gaŋ 4:4). E jahacnere ʒiŋuc manawec: No mi nupie hâmopemu, no ŋoŋehec mocwâc jupemu. E hâmocte mi hâwickewec, mâc giere manabâc ewec (gaŋ 1:13-14 erâ 21-26). Maŋ mocjaha erâ Jesure bâjâpecfâc fârine juniŋte uŋsawaŋ â mu qâmoc dâŋ qâreŋke-jarewec wâc (1:27-2:18). Miti bâbâsifuc ŋic Filipi haeo fisimbiŋ, ehuc ʒiŋuc mumbiŋ: Mamac-jeŋic kâpâcwâruo fohame ŋicfâcne sâcne rucjopapene nâŋâcne kike bâjâpec enʒepieŋ. Eme Paulo e jaŋere uŋsawaŋ dâŋ qâreŋkewec (gaŋ 1:15-17 erâ gaŋ 3:17-19). Ŋic i jaŋere rucsoŋaŋ juniŋte mujarewec, ehuc mao eri-nâŋec ŋekicne irec henʒiriŋneniŋte bufac qajarewec (gaŋ 3:12-16).
1
Jambuŋdâŋ
1 Paulo â Timoteo, Jesu Kristore kiŋaŋ qaqa, nâhe Filipi haeonec Kristo Jesure mitiŋic ŋokac â soŋaŋ babafic ŋoŋere papia ʒi râekoperec. 2 Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.
Paulo e kâpâcwâru ficko ŋic jaŋere erâ Wofuŋ daŋge nunumu ecnewec
3 No ŋoŋere manasuhuc Sâc Anutu-nane daŋge âzâcneekopac. 4 Ŋoŋe Biŋebiaŋ manahuc izia nâŋehec qâturerâ giene bawarehuc jumbiŋ, 5 eme irec numuekopac sâc mâmâc-ŋeŋicte bubiaŋ manahuc Wofuŋ daŋge numumu ecneekopac. 6 Erâ ʒiŋuc manapaŋkekopac, gie biaŋ ŋoŋerao fuŋkeweczi baku bataraha Jesu Kristo fifisi dameŋ-ticne maickezokac. 7 No ŋoŋe sasawa iŋuc mana-ŋarekopac i fuŋne ʒiŋucte sâckekac: No ʒira kâpâcwâru ficko Biŋebiaŋte erâ dâŋgie bahuc feŋeŋ râecnepe ŋoŋe sasawa baficnuhuc ŋesiŋ ŋenareeŋgopieŋ; eme no irec hâcne maŋnanezi ʒâfic-ŋopaekopac. 8 Jesu Kristozi maŋjauŋ enâreekac ira hesiŋnehuc no ŋoŋere erâ maŋhâhâŋ boc enareekac, i Anutuzi manaha jâmbomac mukopac. 9 Erâ maŋjauŋ-ŋeŋiczi maŋ mamanasu â mamana wosâc-ŋeŋic bâsoka raocte numuhuc juekopac. 10 Eme ŋoŋe wiac fâri wâmbuŋne hone ʒâŋitac erâ Kristo fifisi-ticnere manasuhuc maŋtaniŋ â bahacmâc junʒepieŋ, 11 ehuc Jesu Kristozi hume keteŋ eŋareme mitire fârine mâririhec bâfuapie Anuture ʒeri mumuteŋ ezejec.
Gâcnezi hehefaricko miti mumbiŋ
12 Âgofâc-nane, kâuc banʒipiŋte ŋazape, no ʒira wiac fua-narewec izi Biŋebiaŋ hatacke hâmoocte fuawec. 13 No Kristore erâ kâpâcwâru ŋic epo, dâŋ izi ʒira kia â momori â ŋic gâcne jaŋere hazecko hufârewec. 14 Eme kâpâcwâruo ŋehape ʒirecnec âgofâc-nâŋec gâcne sâko jaŋe Wofuŋte manasuhuc afeckerâ Anuture dâŋ hâhâwic tâmiric mueŋgopieŋ. 15 Tucne Kristore miti i iiŋguuŋko â hehefaricko mueŋgopieŋ, â tucnezi ine buurucko mueŋgopieŋ. 16 I jaŋe mueŋgopieŋ ine no ʒira fohuc Biŋebiaŋ ŋezickeekopac irec maŋjauŋ enarehuc mueŋgopieŋ, 17 â gâcnezi ine sioc ehuc iiriacko Kristore ʒâŋe muromackeeŋgopieŋ, i kâpâcwâru-nanere faio buʒâic bâfua-nareniŋte eeŋgopieŋ. 18 Erâ iŋuc me iŋuc, miti qâtiŋ ehuc muniŋmu me jâmbomacko muniŋmu irec wemocte boc muzo, mâc Kristore dâŋzi haŋ baocmu izi fârine, eme i fuakacte bunane biaŋkekac.
Paulo e jujure â hâhâmore mâmâc ecnewec
19 Erâ ʒiŋuc muhuc bubiaŋ hati jupemu: Ŋoŋe nore erâ nunumu gie bapie Jesu Kristore Mârozi baficnume wiac kecʒizi bubiaŋ bâfua-nareocmu. 20 Erâ mimi mi bâfuapemu, i manapaŋkepe ʒickeha maŋzi worickehuc jupemu. Ewarepo iŋuc erapemu, jujure me hâhâmore sahac-nane maŋafec jaha Kristo qikiŋnecnepe izi mumuteŋ-ticne ezejec. 21 Kristozi juju-nane ekac â hâmoczi wiac fekicne bâfua-nareocmu. 22 Me mâreŋko ʒuhuckerâ jupemu, ine giere fârine mocwâc bâfuapemu. Irec wenimoire afeckepe muhuc maŋguru ekopac. 23 No mocte â mocte mâmâc enarekac. Mâreŋ beherâ Kristo bâfuarâ ehec juju irec aŋacnukac, izi hâcne wiac fekicne. 24 Á ŋoŋe bekâ enʒipiŋte ine ŋoŋere erâ mâreŋko mocwâc ʒuhuckerâ jupe sâckeocmu. 25 Eme irec hâcne ʒiŋuc manapaŋkekopac: No mi hâhâmo ŋoŋehec jupemu, erâ bafic-ŋopape mamanasiŋ-ŋeŋic ɋârâŋkeme bubiaŋhec junʒepieŋ. 26 Á ŋoŋerao mocwâc fârâ jupe nore erâ Jesu Kristo muteŋkeeŋgopieŋzi hati erâ muteŋkenʒepieŋ.
Keketeŋ erâ juju gie bazo
27 Mocjaha, ŋoŋe kikefuŋte maio Kristore furu Biŋebiaŋ irec sâcko junʒepieŋ. Erâ maŋ mocjaha ehuc ʒâʒâfic erâ keketeŋ domahuc Biŋebiaŋte juju gie bapie fârâ honec-ŋopazepac, me taicko juhuc biŋe-ŋeŋic manazepac. 28 Keketeŋ epie kisâfâc-ŋeŋic hâhâwic heŋarepie hâbi-ŋeŋic mi goroŋkezejec. Iŋuc epie Anutuzi jaŋe behec-jopaocmu â ŋoŋe rocŋopaocmu irec fuŋne bataniŋkeocmu. 29 Anutuzi Kristo wiac ecneniŋte mana-ŋarewec i manasiŋkeniŋte sawa mâcne, ere erâ ʒâic fâro faio juniŋte mâmâc mana-ŋarewec. 30 Eme no mârâcko juju gie bape honecnumbiŋ â ʒiŋuczia bape biŋene manaeŋgopieŋ, juju gie ijaha ŋoŋe baeŋgopieŋ.