1 Âgofâc-nane, no Anutu buuruc-ticnere erâ dâŋ hazec qâuŋ ŋazape mananiŋ. Ŋoŋe sahac-ŋeŋic Anutu qikiŋnecnepie taha bâzi ɋaɋacne â tirine eme honeme biaŋkezejec. Iŋuc ehuc Anutu kiŋaŋ fârine qacnenʒepieŋ. 2 Erâ juju bapa-ŋeŋiczi miti tâmiric jaŋere sâc mi ezejec. Ŋoŋe maŋ mamanasu-ŋeŋic bâtikiepie hawarine moc eme Anutu micdâŋ-ticnere sâcko gie biaŋne â hohone ʒiziwene â tirine irec wosâenʒepieŋ.

3 Aki anonoc tahacnukicnere mâmâc sasawa ŋazape mananiŋ: Moc e jahacnere maname fefene boc mi ezejec, Anutuzi miti râcnewec sâc i sawa ezejec, sâc jâuruhuc ine mi ezejec. 4 Ʒiŋuc mananiŋ: Fâri ombâŋ-nâŋec mocjaha e kiŋaŋ qaqafâc-ticne bocjahazi gie fuŋne fuŋne baeŋgopieŋ. 5 Eme ŋifec Kristorao iŋuc jaha bocjahazi qâfâsâepene fâri ombâŋ mocjaha ekac, erâ me kikefâcne juhuc dodopec eeŋgopeneŋ. 6 Mitire tâpire fuŋne fuŋne i aki anonoc nâre tahac ekicne sâc fonâre rakac. Eme irec sâcko gie banʒepeneŋ. Irec moc e Anuture micdâŋ mumufuare tâpiri focnekacko mamanasiŋ-ticnere sâcko muzejec. 7 Moc e kiŋaŋ qaqa giere tâpiri focnekaczi gie i bazejec, â moc e qaqazu gie baocmu e irec tâpiri focnekac sâc bazejec. 8 Uŋsawaŋ dâŋ muekac e irec tâpiri focnekacko muzejec, bâmec gie baekac e maŋticne bawahahuc bazejec, moc e micne juocte mucnekicko ʒoɋachec juzejec, â moc e jauŋ gie baocmuzi buafec jaha bazajec.

9 Jauŋ babac i sahaczi sawa mi enʒepieŋ. Wiac sâqocnere mamakâc-ŋopazejec â wiac biaŋnao qohotanʒepieŋ. 10 Ŋoŋe ââgo fârine junʒepieŋ, erâ sâsâsec eniŋte sisiric efârenʒepieŋ. 11 Rokac bârokac tâmiric ɋicwânʒâŋhec erâ junʒepieŋ. Mârore buŋeŋic bâruŋkezejec, ehuc Wofuŋ kiŋaŋ qacnenʒepieŋ. 12 Sambaŋ worickehuc bubiaŋ junʒepieŋ, â ʒâic busâqocko maŋuruc junʒepieŋ. Erâ nunumu gie i uruc ʒuhuc jaha banʒepieŋ. 13 Anuture mitiŋicfâc hume serereŋ jupie hone bafic ejarenʒepieŋ. Ŋic fisipie afeckerâ hezu hewâneŋ ejarenʒepieŋ. 14 Ŋopa jâpec eŋareniŋmu jaŋe jambuŋ-jopanʒepieŋ. Micŋeŋickonec sâwecdâŋ mâcne, jambuŋdâŋ sawa wahazejec. 15 Bubiaŋ eniŋmu jaŋe qâtec-joparâ bubiaŋ enʒepieŋ, kioniŋmu jaŋe qâtec-joparâ kionʒepieŋ. 16 Maŋŋeŋic bâturehuc wiac mocjahare henʒiriŋnehuc junʒepieŋ. Ŋaŋacnere boc mi manapie sâckezejec. 17 Sâqocnere okac babazuc mi enʒepieŋ. Ŋic âgo ejareekac ijaha enʒepieŋ. 18 Ŋicne Ŋicne jaŋehec wamao juju i eene eme ŋoŋe hâcne irec hatane âtenʒepieŋ. 19 Âgofâc, kiŋŋeŋic ŋaŋac mi batarahuc Wofuŋ kimbeŋ-ticnere biŋe râepie fozejec. Dâŋ ʒiŋuc hâcne qâreŋkekicne fokac: “Kiŋ babatara i nore gie, â okacne babazu i no nahac epemu, Wofuŋ e iŋuc mukac.” 20 Ŋoŋe ine ʒiŋuc enʒepieŋ: Râsige nânâre hâmome nânâ gumezemec, opâre hâmome opâ gumezemec. Go iŋuc etecne mimiehuc ʒara marane eocmu. 21 Sâqocnezi go mi bawahacguzejec. Aricne, go wiac biaŋne ehuc sâqocne bawahazemec.