3
Kódin tpémi mwiyé ntee dnya a ya
A tîdê mbwó yoo, dini ghi n꞉ii ngê nmyi vy꞉o noo a kwo, k꞉omo tpile Chóó Lémi u Ghê Dmi nmyi mênê doo ya, ngmênê na a ka nmyi mênê dêpwo ya. Chóó Lémi u nuw꞉o ndîî u kópu dyuu nmye dîpî vyi too. Yesu Kédisu u yoo vy꞉o tpómu ntee tpile ngê nmyee ya. * Hipîlu 5:12-13 Pyââ ngê tpómu ka ngmo ntee a yémî ngê, yinté noo ndiye kîgha nmyo, nté wêdêwêdê nmye dêp꞉a kpo, mu kópu u dîy꞉o doo u ntââ daap꞉ee ma ngópu. Ala ngwo nmyo dp꞉ee u ntââ dé, mu kópu u dîy꞉o nmyi chóó nmyi p꞉uu nmye nuw꞉o nyédi, Chóó Lémi u Ghê Dmi u pono dnyinté nmye vyápê nyédi. Yi kópu nmye kîd꞉a d꞉êê, mu kópu u dîy꞉o nipi ya nmyi lama dnyinté a tóó, u yi nmye a kwo, Yoo nmî chaa. Lukwe dîy꞉o kn꞉aa yéli yi maa p꞉uu dmye ghê dmi. Lukwe dîy꞉o dyámê mbêmê tpémi yi l꞉êê ghi dmi nmye d꞉uud꞉uu t꞉oo, ngmê knî y꞉oo apu, Póól p꞉uu nmee ndiye, u kópu dyuu vyîlo yi ndêndê kópu dyuu, ngmê knî y꞉oo apu, Apolosa p꞉uu nmee ndiye, u kópu dyuu vyîlo yi ndêndê kópu dyuu.
Chóó Lémi p꞉uu dpodo pyu yoo
A tîdê mbwó yoo, Apolosa k꞉ii nyi pi dê yi mbêmê lukwe dîy꞉o nmyi yoo dmyenê chaa ngmê. D꞉ii kada pini ndîî dê. Nye Chóó Lémi u dpodo pyu dê. Nyi dpodo mbêmê Yesu u yoo vy꞉o u ngwo nmyi ghê dniye. Dpodoni dê yi p꞉uu Chóó Lémi ngê a kaa nyópu, vyîlo yi dpodo dê y꞉e dódó doo. Nmyo Chóó Lémi u yâpwo têdê. Yâpwo têdê n꞉uu kpêmî ngê, nté woo n꞉uu kââ, Apolosa y꞉i doon꞉aa ngolo, ngmênê Chóó Lémi ngê nt꞉u yinê t꞉ângo. * Dpodo 18:4,27-28 N꞉ii ngê nté woo dpî kââ, u pi têdê, n꞉ii ngê dpî ngolo, u pi mye têdê. Chóó Lémi mu ngmidi u pi ndîî, mu kópu u dîy꞉o nt꞉u yinê dpî t꞉oo. N꞉ii ngê nté woo dpî kââ, n꞉ii ngê dpî ngolo, yi pi dê wontoo wontoo, pi mu ngmidi p꞉uu a dpodo nódó. N꞉ii mb꞉aamb꞉aa ngê adî dpodo, yâpwo têdê chóó ngê mb꞉aamb꞉aa ngê wa pwila, n꞉ii dnyinté adî dpodo, dnyinté wa pwila. Chóó Lémi p꞉uu Apolosa k꞉ii nipi nye dpodo mo.
Nmyo Chóó Lémi u yâpwo têdê, myenté u ngomo kamî. * Epeso 2:20-22 10 Chóó Lémi ngê u ntââ ngê a pyódu noo, ngomo km꞉ee mwiyé n꞉uu chó, sîment y꞉i u nkwo nî ndê ngê, ngmênê ala ngwo nmyi kada pini yoo yi ngomo pywuu p꞉uu mê dpodo té. N꞉ii yi ngomo p꞉uu adî dpodo, nuw꞉o mbêmê choo dpodo. 11 Doo u ntââ pi ngmê ngê ngomo kn꞉ââ daamuwa a t꞉oo. Yesu Kédisu mbêmê nmyi ngomo a kwo. * 1 Pita 2:4-6 12 Yélini yi ngomo p꞉uu a dpodo nyédi, tpileni ngê a dpodo nyédi, yi tpile u mo u mo dé. Woni knî y꞉oo chêêpî dpo ngî t꞉oo, u ngwo a dpodo nyédi, woni knî y꞉oo nkéli chêêpî pee dpo ngî t꞉oo, u ngwo a dpodo nyédi, woni knî y꞉oo silîpê nkól p꞉uu a t꞉emî dumo. Woni knî y꞉oo yimbwi dpo kp꞉anê t꞉oo, u ngwo a dpodo nyédi, woni knî y꞉oo yi yââ ó kâmo yââ p꞉uu dpî t꞉ee t꞉oo. 13 Kuwókuwó wéni ngê nmî Lémi ngê pi yintómu yi dpodo têdê dmi wa m꞉uu té. Yi wéni ngê ndyuw꞉e wa nyow꞉a, yi dpodo têdê dmi u ngwo wa d꞉uu té. * 1 Kódin 4:5; 2 Tes 1:7-10 14 Pini n꞉ii u dpodo têdê ghi wêdêwêdê, doo u ntââ ndê ngê daawa ma, yi pini ngê u dpodo u pywuu wa ngee. 15 Ngmênê pini n꞉ii u dpodo têdê ghi ndê ngê wa ma, u dpodo u pywuu daawa a ngee. Tpileni l꞉âmo ngê, mwo p꞉aa ngê wa pyódu, ndê ngê wa ma, ngmênê yi pini ngê chóó u ghê l꞉âmo daawa ngee, ndê dóó u mênê wa a pwii.
16 A tîdê mbwó yoo, lukwe dîy꞉o Chóó Lémi u ngomo nmyi chaa ngópu. Mumdoo nmyi lama daa tóó, nmyo Chóó Lémi u ngomo, u yâpwo ghi nmyi mênê a tóó, u Ghê Dmi nmyi mênê mye tóó? * 1 Kódin 6:19 17 N꞉ii ngê Chóó Lémi u ngomo wa dyênê, Chóó Lémi ngê u nkwo wa dyênê. Chóó Lémi u ngomo k꞉oo u yâpwo ghi a tóó, dono y꞉i daa ya yédi. Nmyo mye ntee dé, nmyo u ngomo ghi dé, dono nmyi mênê kîngmê ya.
18 Nmyi nuw꞉o knî y꞉oo kîngê dóó nmyo. Nmyi vy꞉o pini n꞉ii ngê dpo, Nê pi ngmê, dyámê mbêmê tpémi yi vy꞉o a nuw꞉o ndîî ngê dê pyódu, yi pini ngê yi kópu dpî kéé ngê, Chóó Lémi u nuw꞉o ndîî u kópu dyuu dé pêdê pyw꞉ee téne. K꞉omo tpile dyámê mbêmê tpémi ye yi pini mbodo podo ngê wa pyódu, ngmênê Chóó Lémi ka u nuw꞉o ndîî ngê wa pyódu. 19 Mu kópu u dîy꞉o dyámê mbêmê tpémi yi nuw꞉o ndîî u kópu dé Chóó Lémi ka mbodo podo mbodo podo u kópu dé. Yinté kópu puku yedê mye tóó,
N꞉ii dé yi nuw꞉o ndîî dé, dpo, Yoo nmî dóó té,
yi yéli dpî dêê dmi, Chóó Lémi ngê u nkwo dpî dóó té. * Njópi 5:13
20 Yinté kópu m꞉uu puku yedê mye tóó,
Nmî Lémi u lama a tóó,
yélini yi nuw꞉o dmi ndîî,
dnyinté a nuw꞉o nyédi. * Psalm 94:11
21 Yi kópu u l꞉êê dîy꞉o nmyi ndiye kîgha pyu yoo yi pi dmi mbêmê nmyi chóóchóó namê chaa kîgha nmyo. Nangê vyi, Nê wu pini u yoo vy꞉o pini ngmê, mu kópu u dîy꞉o nmyi ndiye kîgha pyu yoo yintómu nmyi p꞉uu a dpodo nyédi. Chóó Lémi ngê kópu yilî yintómu nmye a kpo. 22 Nê, Apolosa pini dê Pita yi k꞉ii nmyi ndiye kîgha pyu ngê nmo pyede. Chóó Lémi ngê tp꞉oo módó tp꞉oo mââ ngê a pyódu nmyoo, dyámê pê nmye a kpo, ghê pini dê pwopwo nmyi p꞉uu a dpodo mo. Kópuni ala ngwo a dpodo té, nmyi p꞉uu a dpodo té, mu dini ghi ngê u kópu dé nmyi p꞉uu amyidnyi dpodo. 23 Myenté Yesu Kédisu p꞉uu nmyo dpodo té, nmyo u yoo, Yesu Kédisu Chóó Lémi p꞉uu a dpodo, chóó Tp꞉oo.

*3:1: Hipîlu 5:12-13

*3:6: Dpodo 18:4,27-28

*3:9: Epeso 2:20-22

*3:11: 1 Pita 2:4-6

*3:13: 1 Kódin 4:5; 2 Tes 1:7-10

*3:16: 1 Kódin 6:19

*3:19: Njópi 5:13

*3:20: Psalm 94:11