6
Póól ngê u ngwo yepê, Numo ngêêpî kmêle
1 A tîdê mbwó yoo, nmyi vy꞉o pini ngmê ngê angmê kn꞉aadi knomomê, yélini nmî Mî u Ghê Dmi pono a vyápê té, yi yéli y꞉oo yi pini moo wáti y꞉e. Gheteghete ngê u kwo nangmê mbwólu, nmyi chóó nmye myedmyina a vyuwo, yinté kópu kîdmyengmê d꞉uu ngmê. * Mát 18:15 2 Pini n꞉ii ka kópuni dîngîdîngî ngê adî pyodopyodo, dmyinê ngêêpî, Yesu Kédisu u dêêpî kópu u ngwo anmyi chââchââ. Yi kópu ala, nmyi nuu ghi dmi numo nódo dny꞉oo ya. * Lóma 15:1-2 3 Pini n꞉ii ngê dê vyi knomomê, Nê pi ngmê, ngmênê u pi têdê, yi pini ngê chóóchóó dpî dóó. 4 Nmyi chóó nmyi l꞉êê ghi dmi ntênê dmyinê mumu dé, kn꞉aa yéli yi dono knî yi mbêmê nmyi chóó nmyi pi dmi namê kmîmî dé. N꞉ii u l꞉êê ghi dmi mb꞉aamb꞉aa dé, vyîlo yi pini ngê choo tpapê, Nê pi mb꞉aa. * 2 Kódin 13:5 5 Pi ngmê ngê kîngê vyi, Yoo yi dono ndîî, a dono têdê, Chóó Lémi ngê daawa kpada nê. Kêle, nmyi l꞉êê ghi dmi mb꞉aamb꞉aa ngê dny꞉oo ya, u ngwo daawa kpada nmyo. * Lóma 14:12
6 N꞉ii knî y꞉oo nmî Lémi u kópu dyuu nmye a tpapê ngópu, dmyinê yeedeyeede dé. * 1 Kódin 9:11,14
7 Ntênê dmyinê nuw꞉o. Doo u ntââ Chóó Lémi daanmyi dóó ngmê. Ntini n꞉ii anyi ntówo, vyîlo yi ntini nt꞉u yuu kaalî. 8 Pini n꞉ii nuw꞉o dono u pono a vyápê yédi, nt꞉u dini ghi n꞉ii ngê wa kaalî, Chóó Lémi ngê wa dyênê. Pini n꞉ii nmî Mî u Ghê Dmi u pono a vyápê yédi, nt꞉u dini ghi n꞉ii ngê wa kaalî, ghê kamî wa a pyw꞉oo, ghéni n꞉ii chedê ngê daawa pyódu. * Njon 3:6; 6:63; Lóma 8:13 9 Kópu mb꞉aa d꞉uud꞉uu kîdmyengê yé ngmê, doo u ntââ nmo d꞉uudpî diya, mu kópu u dîy꞉o kópu mb꞉aa n꞉ii nmo ntówo too, yi nt꞉u dmi dini ghi n꞉ii ngê wa kaalî, mb꞉aamb꞉aa u ngwo anmo pyw꞉oo. * 2 Tes 3:13; 1 Kódin 15:58 10 Yi kópu u l꞉êê dîy꞉o yélini yi k꞉ii Yesu ka nmo kêlîmî té, mb꞉aamb꞉aa ngê dmyinê ngêêpî dé, wo yéli myedmyinê ngêêpî dé. Ala pi ngêêpî u dye ghi.
Kuwókuwó kópuni Póól ngê chóó kîlî d꞉êê ngê
11 A tîdê mbwó yoo, a kuwókuwó kópu a chóó d꞉a d꞉êê. A d꞉êê ndîî nga a m꞉uu yó. 12 Yélini knî y꞉oo u yi a kwo, Ala yéli yi too pee p꞉uu Chóó Lémi u l꞉ii nmî t꞉oo, u yi y꞉e a kwo, Nju tpémi ye yoo mb꞉aa ngê u ngwo nmî pyaa dmi. Nmî lama ka tóó, Kópuni Yesu Kédisu ngê u kîdosi ńedê d꞉uu ngê, yi kópu ka kêlîmî mu ngmidi mbêmê nmî Mî kóó k꞉oo anm꞉uu ghê dmi. Yi yéli y꞉oo yi kópu nmye wodnye tpapê, ye Nju tpémi y꞉oo pî kpaka tumo. * Nkal 5:11; Pilipay 3:18 13 K꞉omo tpile Chóó Lémi u l꞉ii yi too pee p꞉uu a t꞉a, ngmênê u dêêpî kópu dyuu daa chââchââ tumo. U yi y꞉e a kwo, Chóó Lémi u l꞉ii ala yéli yi p꞉uu nmî t꞉oo, mu kópu u dîy꞉o u yi y꞉e a kwo, Nmî pi dmi ndîî ngê u ngwo paa pyaa we. 14 A chóó a pi dînî kmîmî ngê, ngmênê kópu ndîî mu ngmidi pi knî ye n꞉aa tpapê ngê, kópuni Yesu Kédisu ngê kîdosi ńedê d꞉uu ngê. Yi kópu u l꞉êê dîy꞉o dyámê u kópu dé têdê kópu ngê a ka pyaa dniye, myenté dyámê mbêmê tpémi ye k꞉omo tpile ngê nî pyodo. * Luukî 14:27; Nkal 2:20-21 15 K꞉omo tpile Chóó Lémi u l꞉ii nmî p꞉uu a t꞉a, ó daa t꞉a, yi kópu daa ndîî kópu, ngmênê Chóó Lémi ngê kamî ngê mê pyódu nmoo, yi kópu yi ndîî kópu. * 2 Kódin 5:17 16 N꞉ii yoo yi nuw꞉o dmi yinté a pyede, Chóó Lémi ka dny꞉oo ch꞉anêch꞉anê, kóó k꞉oo dpî kaa téne, u yoo yintómu knî yi k꞉ii.
17 A kuwókuwó kópu ala. U ya a nga daa kwo, Pi ngmê ngê a kópu dyuu u wépi a pwaa ngê, mu kópu u dîy꞉o Yesu u l꞉êê dîy꞉o kwéli a p꞉uu yilî a t꞉a. Yi kwéli knî yi l꞉êê dîy꞉o nmyi lama choo a ya, Nê Yesu p꞉uu ndêndê ngê a dpodo. * 2 Kódin 4:10
18 A tîdê mbwó yoo, nmî Lémi Yesu Kédisu nmyi ghê dmi knî ye mb꞉aamb꞉aa ngê choo a vyuwo.
Wu u dî.