4
Nmî Mî u ngwo a chaa kîgha ngópu, mbóó p꞉uu
U kuwó dini ghi ngê y꞉aa vyu wo, keńe kpêmî ngmê mbóó p꞉uu nî módu. Pini n꞉ii u dnye dpuwo k꞉ii mwiyé nî nyongo, myombó u dnye m꞉aa nyongo, a ka pê, Al꞉ii a kee. A ka pê, Kópuni dîyo a pyodopyodo té, ṉgópu n꞉aa tpyuu té. Yi ngwo nê, Chóó Lémi u Ghê Dmi ngê até dê mgîmî nê. Yi ngwo nmî Mî kwéli a tóó, mbóó p꞉uu, u ya têdê nî módu. * Is 6:1 Pini n꞉ii y꞉i doo ya, kwodo ng꞉oo dmi doo dnyednye, mtyemtye mye yi kuu yââ. Yi kêlî ghê ntii ghi ngê a yina ngê. Yi ntii ghi yi kuu yââ. * Ezek 1:28 Nmî Mî u yoo yi kada pini myoy꞉a mê páádi nmî Mî a yina ngópu, yi ya têdê dmi yi mbêmê dnye ya. Yi kpîdî dmi kpaapîkpaapî dé, yi mbêmê kîdon knî ngmêdoo kwo, nkól ngê l꞉âmo too. King ntee pini ngê u ngwo pyaa dniye. * Mát 19:28; Luukî 22:30 Nmî Mî kwéli doo ya, lîmî y꞉i doo kîlîkîlî, mwini y꞉i myedoo mbumu, dnye ndîî yilî nî nyongo. Nmî Mî u kada pywápê k꞉ii ntee tpile pyudu nî módu. Yi pywápê pyudu knî, nmî Mî u Ghê Dmi. Nmî Mî u kada tpile m꞉uu nî módu, ntii ntee tpile, kââyikuu yidoo kwo, tpile p꞉uu dêpwo pyodopyodo.
Nmî Mî kwéli doo ya, tpile tp꞉oo páádi knî y꞉oo a yina ngópu. Yi tpile tp꞉oo páádi knî yi p꞉uu ngwolo daa ngmidi doo kwo, yi kada yilî, yi kuwó mye yilî. * Ezek 1:5-10 Mwiyémwiyé tpile tp꞉oo layóni ntee tpile, myomoni pudumakó ntee tpile, pyoloni kwodo ng꞉oo dmi, pi u kwodo ng꞉oo dmi ntee yinté, podoni maalî ntee tpile, doo mgalê. Yi tpile tp꞉oo páádi knî yi ńuupee wéniwéni dé. Yi ńuupee knî yi p꞉uu ngwolo yilî doo kwo, k꞉oo ntee, kuwa mye yinté. W꞉êênî mgîdî vy꞉o dye ghi yintómu a wéti nyédi, daawa yé ngmê, apu,
Nmî Yâpwo Lémi ndîî,
u wêdêwêdê mu daamo tp꞉ook꞉omo.
Dyââpe p꞉uu daa t꞉a,
dono p꞉uu daa t꞉a,
k꞉omodanê p꞉uu myedaa t꞉a.
Dye ghi yintómu doo a ya,
ala ngwo a tóó,
chedê ngê daawa pyódu. * Is 6:2-3
Pini n꞉ii chedê ngê daawa pyódu, nmî Mî, dini ghi n꞉ii ngê yi tpile tp꞉oo páádi knî y꞉oo a chaa kîgha ngópu, a kwunokwuno ngópu, u pi a kmîmî ngópu, 10 yi ngwo kada pini myoy꞉a mê páádi knî kwodokwodombiy꞉e k꞉ame u kwo dpî ghê dmi. Yi mbêmê kîdon dpo y꞉ee t꞉oo, u kada dpî kéé t꞉oo, dpo, Dp꞉oo king yoo, pini n꞉ii chedê ngê daawa pyódu, vyîlo yi pini yi king ndêndê. A wéti nyédi, kwodpo,
11 Nmî Lémi, nmî Yâpwo,
U p꞉o dpî yé, nmo chaa kîgha ngi,
m̱i nmo kmîmî,
mu kópu u dîy꞉o ṉgwêdêwêdê ndîî.
Tpile yilî yintómu ṉ́yóó nyi l꞉âmo ngê,
ṉ́yóó ḻ꞉êê dîy꞉o a pyede,
yi ghê dmi mye pyede.

*4:2: Is 6:1

*4:3: Ezek 1:28

*4:4: Mát 19:28; Luukî 22:30

*4:6: Ezek 1:5-10

*4:8: Is 6:2-3