15
Yoo yi wêdêwêdê kîgha u danêmbum
Yélini yi k꞉ii Yesu ka ndêndê ngê nmo kêlîmî té, nmî pyipe yoo, n꞉ii dé u kwo dnyinté a kêlîmî té, yi yéli yi kwódu yiyé u kópu dé pêdê vyîmî téme. Nmî chóó nmî nuw꞉o u pono daanmî vyápê. Nmî tîdê mbwó yoo yi mb꞉aamb꞉aa p꞉uu paa nuw꞉o kmêle, Yesu ka mb꞉aamb꞉aa ngê pîdnye kêlîmî. * Lóma 14:19; 1 Kódin 10:24 Nmî chóó nmî nuw꞉o u pono daanmî vyápê, mu kópu u dîy꞉o Yesu Kédisu chóó u nuw꞉o u pono dêpwo vyápê. Dépidi ngê Yesu komo alanté a kââ, Chóó Lémi ka kwo, Peede kópu yilî n꞉ii ṉga vyi ngópu, a pwo ghay dniye. * Psalm 69:9 Kópu yilî n꞉ii Chóó Lémi u komo kapî pyu knî y꞉oo wunê a d꞉êê tumo, nmî wêdêwêdê kîgha u l꞉êê dîy꞉o a d꞉êê tumo. Ala dye ghi dono u vyîmî têdê, yi kópu knî y꞉oo a ngêêpî nmo. Yi kópu knî yi mbêmê nmî lama ka tóó, Yesu ngê ndêndê ngê wa ngee nmo. * 1 Kódin 10:11; 2 Tim 3:16-17 K꞉omo tpile ló kópu angmanmya a vyîmî, Chóó Lémi ngê yi kópu u vyîmî têdê wa ngee nmyo, nmyi nuw꞉o dmi amyedê l꞉âmo té. Chóó Lémi ngê choo a ngêêpî nmyo, nmyi nuw꞉o dmi ngmidi ngê u ngwo paa pyaa we, Yesu Kédisu u nuw꞉o p꞉uu dmyinê mbêpê. Nmî yâpwo njini Chóó Lémi, nuw꞉o ngmidi ngê dmyinê chaa kîgha, pini n꞉ii nmî Lémi Yesu Kédisu u Mî.
Yoo yilî yi kââdîkââdî
Yesu ngê u kede paa ntee t꞉ee nmyoo, numo u kede paa yinté dmyinê ya. Yi kópu u l꞉êê dîy꞉o pi knî y꞉oo Chóó Lémi u ngwo dny꞉oo chaa kîgha. Yesu Kédisu Nju tpémi yi ngêêpî pyu ngê pyodo, Chóó Lémi ngê yi kn꞉ââ knî ye kópuni a vyi too, yi kópu u ngwo ntiye too, mu kópu u dîy꞉o Nju tpémi y꞉oo pêdê w꞉ee y꞉e, awo, Chóó Lémi ngê u kópu yilî ndêndê ngê dê ntiye té. * Dpodo 3:25-26; Psalm 18:49 Yesu Kédisu kn꞉aa yéli yi l꞉êê dîy꞉o myeda loo, apê, módó yeedeyeede u l꞉êê dîy꞉o Chóó Lémi paa chaa kalê y꞉e. Dépidi ngê yinté kópu puku yedê alanté a d꞉êê ngê, Chóó Lémi ka kwo,
A Lémi, n꞉aa chaa kîgha ngi, ḻ꞉êê dîy꞉o anî wéti.
Yélini daa Nju tpémi,
yi yéli y꞉oo a kópu dyuu wamye ny꞉ee ngmê.
10 Puku yedê alanté mye tóó,
Kn꞉aa yéli. Chóó Lémi u yoo yi k꞉ii, nmyi gha dmi mb꞉aamb꞉aa ngê choo ya. * Deut 32:43
11 Alanté mye tóó,
Kn꞉aa yéli, yélini daa Nju tpémi. Chóó Lémi dpodombiy꞉e dmyinê chaa kîgha. * Psalm 117:1
12 Yisaya ngê ala kópu a d꞉êê ngê, apê,
Dépidi u tii ńedê pi ngmêwa t꞉aa,
Chóó Lémi ngê u pi ndîî ngê yinê wa pyódu,
Kn꞉aa yéli amyedê y꞉enê dé,
Yi nuw꞉o dmi p꞉uu adnyi kwo. * Is 11:10
13 Chóó Lémi ngê choo a wêdêwêdê kîgha nmyo, mu kópu u dîy꞉o Yesu ka nmye kêlîmî té. W꞉aa u ngwo anmyinê pyw꞉ee ngmê, u k꞉ii mb꞉aamb꞉aa ngê anmyin꞉aa ya. Yi kópu knî yi mbêmê Chóó Lémi u Ghê Dmi ngê adî ngêêpî nmyo, ala kópu nmyi lama ndêndê ngê wa yââ, Chóó Lémi ngê daawa kéé nmo, u kwo wa a kââdî nmo. * Lóma 14:17
Ala pweepwee pee u nt꞉u kópu
14 A tîdê mbwó yoo, a lama ka tóó, nmyo mb꞉aamb꞉aa dé, nmyo lama yéli, u ntââ wanmyi numo ndiye kîgha. 15 K꞉omo tpile nmyo u ntââ dé, ngmênê daa tumu noo ya, ala pweepwee pee yedê yi kópu dyuu nmye mêd꞉a vyîlî té, mu kópu u dîy꞉o Yesu Kédisu ngê a ngmidi noo, dpodoni u pi ndîî a ka ngma a kpo, kn꞉aa yéli yi l꞉êê dîy꞉o u dyépi ngê a pyódu noo. * Lóma 1:5 16 Kpêê yiyé pyu knî y꞉oo Chóó Lémi ka tpile tp꞉oo ntee a yémî tumo, yélini daa Nju tpémi Chóó Lémi ka yinté myinê yémî té. U Ghê Dmi ngê Chóó Lémi u nuu u yoo ngê u ngwo dê pyódu té. 17 Chóó Lémi u dpodo n꞉ii Yesu Kédisu u wêdêwêdê mbêmê n꞉aa dódó ngê, yi dpodo u pi ndîî ngê n꞉aa pyépi. 18 A chóó a pi daanî knî, ngmênê kópuni Yesu Kédisu u wêdêwêdê mbêmê nî d꞉uu too, yi kópu knî yi mo yi p꞉uu nînê danê. Kópuni nî vyi too, kópuni nî d꞉uu too, kn꞉aa yéli Chóó Lémi u yoo vy꞉o u ngwo nî kââ, yi kópu yilî Yesu u wêdêwêdê mbêmê nî d꞉uu too. * 2 Kódin 3:5; Dpodo 19:11-12 19 Nmî Mî u Ghê Dmi u wêdêwêdê mbêmê kópu ndîî yilî my꞉aa d꞉uu ngê, kn꞉aa yéli Chóó Lémi u yoo vy꞉o u ngwo nî kaa too. Njedusalem nê yaa wo, Ilidikêm Wee u kwo nîmo diyé wo, p꞉aani p꞉aani pi knî ye Yesu Kédisu u kópu mb꞉aa noo tpapê. 20 Dye ghi yintómu u ya a nga dpîmo kwo, Yesu Kédisu u pi kwéli doongê ny꞉ee ngópu, y꞉i nî lê, Yesu u kópu mb꞉aa ye ngmên꞉uu vyi, mu kópu u dîy꞉o pi kuu u dpodo p꞉uu dpodo u ya a nga dêpwo kwo. * 2 Kódin 10:15-16 21 Kópuni puku yedê a tóó, nê, Yi kópu nî ntiye. Ala yi kópu.
Yélini y꞉oo u pi doongê ny꞉ee ngópu,
Dîyo wa ny꞉ee ngmê, amyedê w꞉ee ngmê. * Is 52:15
Póól ngê Lóma paa u dy꞉oo u ngwo a châpwo
22-24 M꞉ââ yilî yi k꞉oo u ya a nga doo kwo, N꞉uu m꞉uu nmyo, ngmênê a dpodo al꞉ii ndîî ngê doo ya. Yi dpodo ala wee knî yi kwo atédî chedê, ala ngwo nînê pwiyé knî, nîmo mumu nmyo. U ya a nga a kwo, Spén nî lê, moma anê m꞉uu nmyo, nmyi p꞉uu mwiyé am꞉aa ya, u kuwó dini ghi ngê dpî ngee nódó, Spén u ngwo anî lê. * Dpodo 19:21 25-26 Ala ngwo Njedusalem mwiyé mîdî lê, Chóó Lémi u yoo dîn꞉aa ngee té, mu kópu u dîy꞉o Yesu u yoo yélini Másîdóniya Wee u kwo Kîdiki Wee u kwo a kwo, yi yéli y꞉oo yi ndapî tp꞉oo nt꞉eemwint꞉eemwi m꞉uu tumo, a ka a kê tumo, Njedusalem anî ńuw꞉o té, Chóó Lémi u yoo vy꞉o pinténi wunê wee, yi ndapî ye anî ńuw꞉o té. * 2 Kódin 8:1-2; 9:2 27 Yélini y꞉oo yi ndapî a ka a kê tumo, yi chóó noko yepê, Pinténi Njedusalem wunê pyede, paa ngee téme, ndapî knî ye ngmêpaa dy꞉ââ koo. Yi kópu yi chóó vyi ngópu, ngmênê Nju tpémi y꞉oo Chóó Lémi u kópu dyuu ye mwiyé y꞉ee ngópu, wod꞉oo kn꞉aa yéli y꞉oo dyámê u tpile mb꞉aa knî ngmê Nju tpémi ye u nkwo dny꞉oo yémî dé. 28-29 Dini ghi n꞉ii ngê Njedusalem anî lê, yi ndapî yintómu ye an꞉uu y꞉ee té, Lóma máádi an꞉uu kwolo. Yesu Kédisu u wêdêwêdê mbêmê an꞉uu wêdêwêdê kalê nmyo. U kuwó dini ghi ngê Spén an꞉uu lê. * Lóma 1:11
30 A tîdê mbwó yoo, ndîî kópu nmye ngmênînê dmyinê. Nmî Lémi Yesu Kédisu u pi ngê nmye nînê dmyinê, u ntââ a l꞉êê dîy꞉o wanmya a ngêpê. Nmî Mî u Ghê Dmi ngê a nuu ghi nmyi nódo a yó, yi kópu u l꞉êê dîy꞉o nmye myenînê dmyinê, u ntââ a ngêpê wanmyinê vyîko ngmê, a l꞉êê dîy꞉o Chóó Lémi ka amy꞉ee dmy꞉ee ngmê. * Kîlosa 4:3; 2 Tes 3:1-2 31 Ala kópu dpî dmy꞉ee yó, Nju tpémi yélini Yesu u yoo vy꞉o daa ghê dniye, Njuda Wee u kwo, yi yéli y꞉oo kîngî vya nê. Ala kópu myoo dmy꞉ee yó, Tpileni Njedusalem anî ńuw꞉o, Yesu u yoo knî y꞉oo yi tpile kîngî mb꞉ii ngmê. 32 Chóó Lémi ngê nmî ngêpê pêdê ny꞉ee ngê, pêdê ngee nêne, ye y꞉i nmye u ngwo anê lê, w꞉aa u ngwo anê pyw꞉oo, nmyi vy꞉o ghê u ngwo an꞉uu vy꞉u. 33 Chóó Lémi ngê choo a ngêêpî nmyo, mb꞉aamb꞉aa ngê u ngwo dmyinê a ya. Ye ndîî kópu.

*15:2: Lóma 14:19; 1 Kódin 10:24

*15:3: Psalm 69:9

*15:4: 1 Kódin 10:11; 2 Tim 3:16-17

*15:8: Dpodo 3:25-26; Psalm 18:49

*15:10: Deut 32:43

*15:11: Psalm 117:1

*15:12: Is 11:10

*15:13: Lóma 14:17

*15:15: Lóma 1:5

*15:18: 2 Kódin 3:5; Dpodo 19:11-12

*15:20: 2 Kódin 10:15-16

*15:21: Is 52:15

*15:22-24: Dpodo 19:21

*15:25-26: 2 Kódin 8:1-2; 9:2

*15:28-29: Lóma 1:11

*15:30: Kîlosa 4:3; 2 Tes 3:1-2