SA BUKA TE
EMOSI
Sa Vinabakala
Pa totoso tanisa poropita Emosi, si ele paqaha rua sa binaṉara koasa popoa. Keke binaṉara si koa la pa kali gede, sa nana ṉati vasileana si pa Sameria. Ta pozae na binaṉara pa Izireli si asa. Keke binaṉara pule si pa Ziuda meke sa ṉati vasileana tanisa si Zerusalema. Ta pozae na binaṉara pa Ziuda si asa.
Sa poropita Emosi si mae gua koasa popoa pa kali binaṉara pa Ziuda. Pa Tekoa sa popoa tanisa meke na sepati mo si asa. Ba tioko ia Tamasa si asa pude la koasa butubutu baṉara pa Izireli, pude la tarae nia sa Nana zinama pa Betolo, sa vasina tanisa ṉati hope tanisa baṉara pa Izireli. Sa totoso sapu la tozi vura nia sa sa zinama te Tamasa si e Zeroboami vina rua si koa baṉara pa Izireli, pa kaiqa vuaheni zuapa gogoto lima ṉavulu puta sipu lopu ele podo se Zisu Karisito. Ba ka visavisa rane mo si ene tarae si asa.
Sa inavoso sapu vala nia Tamasa koa sa si la gua koari tie tagotago. Sarini sapu tagotago si tagotago va hola, meke arini pu malaṉa si koa malaṉa va hola tugo. Meke saripu tagotago si tavetavete ni rini sari pu malaṉa; hiko i rini meke ṉoṉovala i rini pude tagotago dia.
Ke sa vina balau te Emosi pa Betolo si tozia sapu kote mae gua pa Izipi meke pa Asiria sa tinahuara, si be lopu kekere si arini. Hadu ia sa ṉati hiama pa Betolo se Emosi, lopu ta hivae si asa, pule la pa Ziuda, guni nia sa. Ba korona se Emosi, na ta garunu mae koe Tamasa si asa, gua si asa.
Pa nana kinorokorotae la koe Izireli, si podalae si asa koari na kana te Izireli pu koa vari likohae nia sa popoa Izireli. Sari vinakilasa tadi na kana hire si zama kekenu ni sa meke tiqe kamo la koe Izireli; sari Siria, Pilisitia, Taea, Edomu, Amoni, Moabi, Ziuda meke tiqe e Izireli. Sari naba ṉeta meke made si tavetavete ni sa, sapu varigara la pa zuapa; sa naba zuapa si hokoto, gua, ginuana koari pa Hiburu. Ke totoso varigara la pa zuapa sari sinea tadi kasa si na soku hola, ele pada mo, lopu boka beto, gua ginuana. Ke kaqu tava kilasa. Totoso zamani sa sari ka zuapa sinea tadi pa Izireli si zamani pule sa sari ka zuapa vina kilasa sina ele soku hola sari dia sinea, meke lopu boka noso.
Sari na Ṉati Pinaqapaqahana sa Buka
Sa vina kilasa koari na butubutu pu tata koasa butubutu baṉara pa Izireli. Hinia 1:1 kamo hinia 2:5
Sa vina kilasa koasa butubutu baṉara pa Izireli. Hinia 2:6 kamo hinia 6:14
Sari ka lima dinogodogorae. Hinia 7:1 kamo hinia 9:15
1
Sari Zinama Tuketukele
Hire sari na zinama te Emosi, keke koari na sepati pa Tekoa, sa nana dinogodogorae pa guguana Izireli sapu vata dogoro nia Tamasa koa sa, karua vuaheni sipu lopu ele kamo sa niu lavata, totoso e Uzaea si baṉara pa Ziuda meke e Zeroboami sa tuna koreo e Zehoasi si baṉara pa Izireli.* 2 Baṉ 15:1-7; 2 Koron 26:1-23; 2 Baṉ 14:23-29
Bugoro ni Tamasa sari Tie Izireli
Zama se Emosi:* Zol 3:16
“Se Zihova si kurumu vura mae gua pa Toqere Zaione
meke sa mamalaiṉina si lulusu vura pa Zerusalema;
sari duduli pa pezara vasina kopu sipi sari na sepati si mate,
meke sari huda pa batu toqere Kameli si harahara.”
Sa Vina Kilasa te Zihova pa Siria
Hiera gua si zama nia e Zihova:
“Koari ka ṉeta sinea te Damasikasi* Damasikasi si na ṉati vasileana tadi na tie pa Siria. meke kamo ka made sinea,
si lopu kaqu va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu la huara va kaleania sa sa popoa Qileadi meke vagia sa,* Ais 17:1-3; Zer 49:2-27; Zak 9:1
ke kote garunu la nika si Arau koasa vetu baṉara sapu kuria Hazaelo* Hazaelo si na Baṉara kekenu sapu tuti gore la koe Beni Hadadi.,
meke kote ta sulu palae sari vasidi ta gobadi te Beni Hadadi sa baṉara.
Kote seke gore nia Rau sa tukutuku sasada koasa goba pa Damasikasi;
kote huara ia Rau sa baṉara sapu koa pa Lolomo pa Aveni* Lolomo Aveni ginuana si “Lolomo Hahanana Kaleana.” Beti Idini ginuana si “Vetu Bibibolo”.
meke asa pu tuqena sa kolu binaṉara pa Beti Idini.
Sari tie pa Siria si kote ta raovo pule la pa Kiri,”
zama gua se Zihova.
Sa Vina Kilasa te Zihova koasa Popoa pa Pilisitia
Hiera gua si zama nia e Zihova:
“Koari ka ṉeta sinea te Qaza meke kamo ka made,
si lopu kaqu va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu sari vasileana dodurudi si hoke raovo taloani sa
meke la holuholu ni sa pa Edomu,* Ais 14:29-31; Zer 47:1-7; Izk 25:15-17; Zol 3:4-8; Zepa 2:4-7; Zak 9:5-7
ke kote garunu la nika si Arau koari na goba pa Qaza
sapu kote sulu i sari nana vasileana ta gobadi.
Kote va mate pania Rau sa baṉara pa Asidodi
meke asa pu tuqena sa kolu binaṉara pa Asikeloni.
Kote taliri la nia Rau sa Limaqu pa Ekoroni,
osolae mate beto sari pa Pilisitia,”
zama gua se Zihova sa Baṉara.
Sa Vina Kilasa te Zihova koasa Popoa pa Taea
Hiera gua si zama nia e Zihova:
“Koari ka ṉeta sinea te Taea, meke kamo ka made,
si lopu kaqu va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu sari vasileana dodurudi si hoke la holuholu ni sa pa Edomu,
lopu kopu nia rini sa dia vinariva egoi tinamatasi koari na Qua tie,* Ais 23:1-18; Izk 26:1 kamo hinia 28:19; Zol 3:4-8; Zak 9:1-4; Mt 11:21-22; Lk 10:13-14
10 ke kote garunu la nika si Arau koari na goba pa Taea
sapu kote sulu i sari nana vasileana ta gobadi.”
Sa Vina Kilasa te Zihova koasa Popoa pa Edomu
11 Hiera gua si zama nia e Zihova:
“Koari ka ṉeta sinea te Edomu meke kamo ka made,
si lopu kaqu va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu hadu luli nia vedara sa sa tasina koreo,
loke nana tataru hokara,
pa nana binugoro si raza pilipule ia mo sa si asa
meke sa nana tinaṉaziri si huruṉu lamo,* Ais 34:5-17, 63:1-6; Zer 49:7-22; Izk 25:12-14, 35:1-15; Obd 1-14; Mal 1:2-5
12 ke kote garunu la nika si Arau pa Temani
sapu kote sulu i sari vasileana ta gobadi pa Bozira.”
Sa Vina Kilasa te Zihova koasa Popoa pa Amoni
13 Hiera gua si zama nia e Zihova:
“Koari ka ṉeta sinea te Amoni meke kamo ka made,
si lopu kote va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu hova va rikati sa tiadi sari barikaleqe molumoludi pa Qileadi
pude hoda i sari nana voloso pepeso,* Zer 49:1-6; Izk 21:28-32, 25:1-7; Zepa 2:8-11
14 ke kote garunu la nika si Arau koari na goba pa Raba
sapu kote sulu i sari nana vasileana ta gobadi
pa vari korapadi rina iraṉa na kukili koasa rane varipera,
pa korapa givusu ṉiburuna pa totoso raneboṉi.
15 Sa nana baṉara meke sari nana koimata,
si kote varigara la tugo pa tinaraovo,”
zama gua se Zihova.

*1:1 2 Baṉ 15:1-7; 2 Koron 26:1-23; 2 Baṉ 14:23-29

*1:2 Zol 3:16

*1:3 Damasikasi si na ṉati vasileana tadi na tie pa Siria.

*1:3 Ais 17:1-3; Zer 49:2-27; Zak 9:1

*1:4 Hazaelo si na Baṉara kekenu sapu tuti gore la koe Beni Hadadi.

*1:5 Lolomo Aveni ginuana si “Lolomo Hahanana Kaleana.” Beti Idini ginuana si “Vetu Bibibolo”.

*1:6 Ais 14:29-31; Zer 47:1-7; Izk 25:15-17; Zol 3:4-8; Zepa 2:4-7; Zak 9:5-7

*1:9 Ais 23:1-18; Izk 26:1 kamo hinia 28:19; Zol 3:4-8; Zak 9:1-4; Mt 11:21-22; Lk 10:13-14

*1:11 Ais 34:5-17, 63:1-6; Zer 49:7-22; Izk 25:12-14, 35:1-15; Obd 1-14; Mal 1:2-5

*1:13 Zer 49:1-6; Izk 21:28-32, 25:1-7; Zepa 2:8-11