33
Vinaravara Tepa Tinokae
1 Mi talotaṉa si gamu pa Asiria, na tie huhuara si gamu;
gamu pu lopu ele ta huara!
Mi talotaṉa si gamu, na tie qoraqora si gamu;
gamu pu lopu ele ta qoraqora!
Pana noso huhuara si gamu,
si kote ta huara si gamu;
pana noso qoraqora si gamu,
si kote ta qoraqora si gamu.
2 Zihova, Mu tataruni gami;
Agoi mo si aqa Nigo gami.
Na ṉiniraṉira tamigami si Agoi doduru munumunu,
na mami hinarupu pa totoso tasuna.
3 Pana avosia rini sa mamalaiṉimu Goi si govete sari na kana;
totoso gasa turu Goi, si talahuarae sari na butubutu.
4 Sari na vinagi tadina kana si ta pudiki vagi guana hinenahena tadi na kupokupo;
ta saputu vagi rini gua ri na rovana kupokupo.
5 Tava lavata se Zihova, na pa Maṉauru si koa si Asa;
kote va siṉi nia ṉinoṉo meke tinoṉoto Sa sa popoa Zaione.
6 Koa Sa si kote sokirae si agoi koari na mua totoso,
tagotago si Asa pa hinarupu meke ginilagilana lohina meke tinumatumae;
na pinamaṉana e Zihova si na vidulu pude vagia sa tinagotago asa.
7 Doṉo la, sari dia tie varane si korapa kabo va ululae koari na siraṉa;
sari palabatu ta garunu la koari na kana pu hiva vari bulei si kabo sisigiti.
8 Sari siraṉa vari karovae popoa si ivulu,
loke tie si ene koari na siraṉa.
Sa vinariva egoi si ta kumata,
saripu va sosodena si ta etulu,
loke tie si ta pamaṉae.
9 Sa pepeso si kuliusu meke gore hiteke,
Lebanoni si kurekure meke harahara;
sa pezara duduli pa Saroni si na qega gua,
meke Basani meke Kameli si hoqa elodi.
Va Balaui e Zihova sari Nana Kana
10 Ba zama se Zihova koa rina kana, “Kamahire si kote gasa turu si Arau.
Kamahire si kote tava lavata si Arau;
kamahire si kote ta ovulu sage si Arau.
11 Gamu pa Asiria si na duduli popadi si hira vura ni gamu;
sa mia siniṉo mo si guana nika sapu kote sulu pani gamu.
12 Sari tie huporo si kote ta sulu palae hokara;
gua sapu halalia sa nika sa hiqohiqo rakihi.
13 Gamu pu koa va seu, mi avosi gua sapu ele evaṉi Rau;
gamu pu koa tata, mi gilania sa Qua ṉiniraṉira!”
14 Sari tie kaleadi pa Zaione si matagutu sisigiti;
kamoi na neneqara sari tie sapu loke dia tamasa meke zama si arini:
“Esei koa gita si kote boka koa turaṉia sa nika susulu?
Esei koa gita si kote boka koa turaṉia sa nika sapu halala ninae rane?”
15 Sa tie sapu ene pa tinoṉoto
meke zama ni sapu gotogoto,
asa sapu lopu tavetavete nia sa nana ṉiniraṉira pude hiko poata,
meke kopu ni sari limana pude lopu vagi sari tinabara golomodi,
asa sapu tukui taliṉana koari na hiniva pude va mate tie
meke tukui matana koari na binalabala kaleadi,
16 asa tugo sa tie sapu kote koa pa vasidi ululudi,
sa nana tometomeana si panaulu pa toa.
Nana bereti si kote ta poni nia sa,
meke na kolo napo si lopu kote qaga nia sa.
Sa Popoa Tolavaena Vugo Repere
17 Kote dogoria gamu pa matamia sa tinolava tanisa Baṉara
meke kote tiro gorea gamu sa popoa sapu nipulu la tu pa seu.
18 Pa mia binalabala si kote balabala pulei gamu sari tinasuna holadi:
“Avei sa tie pu tavete vura takisi?
Avei sa tie vagivagi takisi?
Avei sa tie pu naei sari vetu hakehakei ululudi?”
19 Lopu kote dogoro pulei gamu sari tie kaleadi arini,
sari tie sapu votikaena dia zinama,
meke dia vinekala si tasuna pude tumae nia.
20 Mi doṉo la pa Zaione, sa vasileana lavata vasina hoke ta tavete sari nada inevaṉa qetuqetu;
sari matamia kote dogoria sa popoa Zerusalema,
na kinoa bulebulena, na ipi sapu lopu kote tava rizu;
sari doduru tupili tanisa si lopu kaqu ta daku vura,
sari ikuna si lopu kote tava kumata.
21 Vasina si kote koa sa nada Tie Ṉiṉirana se Zihova.
Kote guana vasina sapu koa ia na ovuku labedi meke na tototolo.
Loke vaka sapu koa i na qelu si kote ale koa rini,
loke vaka nomadi si kote tepe sage koa rini.
22 Ura e Zihova sa nada tie varipitui,
e Zihova sa nada tie tavete tinarae,
e Zihova sa nada Baṉara,
meke Asa tu kote harupu gita.
23 Sari ikudi rina tepe si sigoto hoboro dia:
Sa dedegerena sa tepe si lopu soto va nabu,
meke sa tepe si lopu repaha.
Sari vinagi sokudi pa mudi vinaripera si kote tava hia koari na tie te Tamasa
meke ari na ike ba kote paleke dia hinia.
24 Lopu keke koa rini pu koa pa Zaione si kote zama, “Kei, moho qua,” gua;
ura, arini pu koa vasina si kote ta leosae koari na dia sinea.