1 Mayadaidi ne udiyedi tauhemuliwatani kadi boda wa ye laki ye lau. Luwadiyena, hekadiyo meta Dius tamowaidiyao taukalina Giliki,* Kalina Suau unai se wane Heleni. yo hekadiyo siya taukalina Hebelu. Mayadai kesega kesega meta kai se giyagiyahi, na taukalina Giliki yodi wabuwabu wa se soisoihemulidi. Unai taukalina Giliki wa se hetalapili taukalina Hebelu wa udiyedi. 2 Ede apostolo saudoudoi-labui wa tauhemuliwatani maudoidi se yogagogoidi na se wane, “Nige ye namwa bena Yaubada kalinana paisowana ka hekaiyawasi na ka kitalau kai giyahina unai. 3 Unai, kagu kahao, bodamiu ta udiyedi tamowai haligigi-labui kwa kaisunuwaidi, siya meta bena tamowai maudoina yodi hekasisi tamowaidiyao, yo tamowai sibasibadiyao, yo hinage Yaluwa Tabuna ye hemwayaudi. Paisowa ne kabo ka moselaei udiyedi, 4 na kai apostolo kabo ka kitalau tapwalolo yo wasaduwai mo unai.”

5 Boda maudoina apostolo yodi nuwatu wa se kawanamwanamwaei. Unai ede Setepano se kaisunuwaei, iya tausunumabayao yo Yaluwa Tabuna ye hemwayau; na kabo Pilipo, Polokolas, Nikenowa, Timona, Palamenas, yo Nikolasi. Na Nikolasi iya Antiyoka tamowaina nabada wa unai ye nuwabui ye hemala Dius. 6 Kabo tamowai wa se laedima apostolo wa udiyedi, na nimadi se tolesaedi kewadiyena na yodi se tapwalolo.

7 Kabo Yaubada wasana wa ye laki ye lau, na Yelusalema unai Yesu tauhemuliwatanina bodana wa ye laki ye lau, yo hinage taukaitalasam bodana lakilakina Yesu se sunumaei yo se kawakabiyei.

8 Na Yaubada yona kainauya ye mosei Setepano unai meta ye hegigibwali, ede laulau gigigigibwalidi* Lausoisoi ta unai kulikulina mamohoina Luka ye kulidi wa meta kabanoko yo hekihekinoi saesaedi ye ginaulidi, na kalina Saliba toletolena ye pilipili yo nige ye masalahakalili, unai laulau gigigigibwalidi mo ta hepahepaisowa. ye ginaulidi boda luwadiyena. 9 Na tamowai hekadi maidadi Setepano se haikawayagala, siya meta sunago* Sunago meta Dius yodi kabakoikoigogo yo tapwalolo numana. hesau tamowaidiyao, na sunago wa hesana ede “Yailihai Tamowaidiyao”. Tauhaikawayagala wa yodi kabalaoma ede Sailini yo Alesandiliya yo teha Silisiya yo teha Eisiya. 10 Yodi haikawayagala wa unai nige gonowana Setepano se saedikwai matawuwuna ede Yaluwa Tabuna ye hesibasiba.

11 Kabo nuwatu wadawadamyena tamowai hekadiyo se nuwakoidi bena kabo se hedede se wane, “Setepano yona hedehedede ka lapui meta Mose yo Yaubada ye hededeheyababadi.” 12 Na kabo boda yo yodi tamowai lakilakidiyao, yo hinage laugagayo taulauhekataena nuwadiyao se hesaedi, na Setepano se kabihekahini na se woyaiyama Sunedeli unai. 13 Na tamowai hekadiyo se woyaidima na hedehededelupolupo maudoidi se hedededi, se wane, “Teina tamowai ta meta huya maudoina numa tabuna yo hinage Mose yona laugagayo ye hedehededeheyababadi. 14 Matawuwuna ede yona hedehedede ka lapui meta ye wane Yesu Nasaleta tamowaina kabo numa tabuna ta ye hetatagwaligwali na kabikabi beyabeyadi Mose ye haidima wa kabo ye buidi.” 15 Na Sunedeli yona koigogo wa unai taututuli wa se kaikewadudulai Setepano se kita, na kana kao wa se kita meta doha anelu.