AINILESAD-GARDA
ÉXODO
GEBE-SOGLENAID
Garda-nug
Ainilesad-Garda. We-garda, Garda-Sogataled-sogabogwadid. We-garda, Septuaginta-gardagine, Éxodoʼye onugsasmalad. We sogleged, “ainilesadye.” Hebreo-gayabardina, Shemothʼye nugad. A-sogleged, “dule-nugye.” We-garda, Ainilesadye nugad, ar ade, Moisés, Israel-dulemar-Egipto-yargi-onosgu, idumai-gusadgi bur sunmaked.
Ainilesad-Gardagi weyob sunmaklenaid
Ainilesad-Gardagine, Israel-dulemar birgabargus Egipto-dulemar-maiga bukwa gusmalad. Degine, Israel-dulemar Egipto-yalagi-wilebukwa-onolesadgi sunmaklenaid.
We-gardagine, weyob ilemakar sunmaklenaid:
1. Bab-Dummad Egipto-yargi Israel-dulemar-onosad (1:1–15:21).
1a. Israel-dulemar Egipto-yargi sabsur-odurdaklebukwa gusad (1:1-22).
1b. Moisés-gwalulesad, degi, Bab-Dummad Moisésʼse gochad (2:1–4:31).
1c. Bab-Dummad, Moisésʼba Egipto-dulemarga bonigan-onosad (5:1–11:10).
1d. Dule-oburgwed-baliwitur Egipto-yargi-nasad (12:1–13:22).
1e. Demar-Ginnidye-nugadgi obaksamalad (14:1–15:21).
2. Israel-dulemar Sinaí-yarse nadegusad (15:22–18:27).
3. Sinaí-yargi Bab-Dummad Israel-dulemarbo igar mesisad (19:1–24:18).
4. Babse-goled-neg-sunna-seleged-soblegoed-igar (25:1–31:17).
5. Bab-Dummad Israel-dulemarbo gannar igar-mesisad (31:18–34:35).
6. Bab-Dummadse-goled-neg-sunna-seleged (35:1–40:38).
Be itogua.
1. BAB-DUMMAD EGIPTO-YARGI ISRAEL-DULEMAR-ONOSAD
1
(1:1–15:21)
1a. Israel-dulemar Egipto-yargi sabsur-odurdaklebukwa gusad
(1:1-22)
Israel-dulemar Egipto-dulemarse sabsur-odurdaklebukwa gusad
1 Wemar-Israel-masmala na e-babba Egipto-yarse nonigusmalad:
2 Rubén, Simeón, Leví, Judá,
3 Isacar, Zabulón, Benjamín,
4 Dan, Neftalí, Gad, degi, Aser.
5 Jacob-e-gwenadgan bela dulapaa-gakambe-mergu (70), Egiptoʼse nonimalad. Joséʼdi bato Egipto-yargi maid.
6 Ibagan-nadedba José, e-gwenadgan, degine, bela na e-unni-sergumaladi burgwismalad. 7 Ar Israel-dulemar mimmigan-ichesur-nikussoggu, yaisur merguded. Degisoggu, dutusur gunonimalad. Egipto-yargi Israel-dulemar bela-bela-mergu ambikunonimalad.
8 Undar birgamar nasad-sorba, Egipto-yargi rey-baid megnonikid. A-rey wissulid, José doa-dule gusa.
A-reyde e-dulemarga sogded: 9 “Be dakmar, Israel-dulemar anmarba bur melumalad, degine, anmarba bur dutusurmarbalid.
10 ”Degisoggu, anmar ise-itoar igar-amiergebed, adi, melle bar sordamar ega merguegar. Ar degisulile, anmar bila-onoalile, abakalegi anmar-isdarmaladba-akadele, anmargi aibinnalile, ar degiile, dule-dummaganga gudmaloed.”
11 A-ulale, Egipto-dulemar dummagan-onugsasmalad, adi, Israel-dulemar arbaed-dutusulidgi oarbamalagar. Egipto-dulemala Faraónʼga-mas-sabogega neggweburmar-sobega Israel-dulemar-imaksad. We-neggweburmarde, Pitónʼye, degine, Ramesésʼye nugad.
12 Ar Egipto-dulemar bur bule Israel-dulemar-sabsur-imakmaidba, aka bur bule Israel-dulemar mergumaid. Degisoggu, Egipto-dulemala bela-bela Israel-dulemar-nue-dobguarmarsunnad.
13 Egipto-dulemala e-maiga Israel-dulemar bela-bela sabsuli imaksad. 14 Nue wiosmalad, arbaed-dutusulid ega ukdamalad, napsa-obured, degi, napsa-ginnid akwayob-sobega, deginbali, bela sapurba-arbaleged amarga uksabalid. Bela wemargine, Israel-dulemala sabsur imakledamalad.
15 Deginbali, Egipto-e-rey Hebreo-omeganga-sikwigamaladga sunmaksad. A-mukwa-gwensak Sifraʼye nugad, baiddi, Fúaʼye nugad. Amarga Faraón sogded:
16 —Bemar Hebreo-omeganga sikwigaarmalale, nue be dakmalo, wede machigwadibe, bunolodibe. Machigwale, oburgwemalo. Bunolordina, melle oburgwemalo.
17 Degi-inigwele, mukwamar-sikwigamalad Bab-Dummad-dobe itosmalad. A-ulale, Egipto-rey-ega-sogedba imaksasurmalad, machimala-oburgwissurmalad.
18 Geb degine, Egipto-rey mukwamarse gochad, amarga sogded:
—¿Ar ibiga wede bemar machimala-oburgwedasurmala?
19 Mukwamar Faraón-abin sogdemalad:
—Ar ade, Hebreo-omegan Egipto-omeganyobsulid. Ar Hebreo-omegandi dutusulid, amba yoo anmar ese warmake, bato ugakgusdaed.
20 Bab-Dummad mukwamar-sikwigamaladgi nued-binsasad. Israel-dulemardi mergumai, degine, bur bule dutusurgumai gusad. 21 Ar mukwamar-sikwigamalad Bab-Dummad-dobe-itosmarsoggu, Bab-Dummad egi nued-binsasad, bukidar-mimmigan-nikuega imaksad. 22 Ar Faraónʼdi na e-dulemarga igar-mesisad: “Hebreo-dule-gwalulesale, machigwadibe, bela diwarse metemalo. Bunolordina, melle oburgwemalo.”