SANTIAGO-GARDA
SANTIAGO
GEBE-SOGLENAID
Garda-nug
Santiago, Jesús-e-urbad. E-babdi, José. Santiago, gwenadgan-Jerusalénʼgi-bukmalad-e-dummadga gusad. We-Santiago, Pablo-unasgusad, adi, Pablo gwenadganga oyogegar, ede Moisés-Igar-Maidba nanadimoye. (Gusmalad 21) Binsamardo, Santiago birga 62ʼgi burgwisargebye, degisoggu, a-birga-idu we-garda narmaklesye.
Santiago-Gardagi weyob sunmaklenaid
Santiago, Bab-Dummad-Burba-Isligwaledbali gwenadgan-neggwebur-baid-baidgi-bukmaladse garda narmaksad, ega sogega, Jesúsʼba-nanaimalad igi nanamalargebe. Sogsabalid, isguedse-dule-wilubdakleged, Bab-Dummadgi danisurye. Santiago sogsabardo, bela dulemar emarbi be dakmaloye. Bab-Jesúsʼba dule nagunonikir, e-daedgi mag-dakledaye, wede bule-nue Bab-Jesúsʼba-naid-sunnadi. Santiago garda-narmaksad-bergunaidgi gwenadganga binsaed uksiido, igi nanamalargebe.
We-gardagine, weyob ilemakar sunmaklenaid:
1. Gebe-sikwas-soglenaid (1:1).
2. Jesúsʼba-nanaimalad wilubdakleged (1:2-18).
2a. ¿Ibiga Jesúsʼba-nanaimaladse wilubdakleged nodanikid? (1:2-12).
2b. Jesúsʼba-nanaimaladse wilubdakleged, ¿bia-danikid? (1:13-18).
3. Jesúsʼba-nanaimalad Babgi bensuli-daed (1:19–5:6).
3a. Bab-Gayaburbaba-ibsamalad (1:19-27).
3b. Bela be emarbi dulemar-dakmaloed (2:1-13).
3c. Ibmar-imakedba, Bab-Jesúsʼgi-bensuligued oyoleged (2:14-26).
3d. Gwabinduku-bargaed (3:1-12).
3e. Binsaed-nikarba-gued-sunsoged Babgi danikid (3:13-18).
3f. Bab-Jesúsʼba-nanaimalad nued nanamalargebed (4:1-12).
3g. Banedse-ibmar-guoedba mer be san-dummarbaa itogo (4:13-17).
3h. Mani-ibgan-dule-wiomaladga ibmar-soglenaid (5:1-6).
4. Jesúsʼba-nanaimalad obinoed (5:7-20).
4a. Naibi-itogedgi na san-bargaed, Bab-Jesús-danikidse (5:7-12).
4b. Bensulidgi dule-uellemaladga Bab-Dummadse-goled (5:13-18).
4c. Gwenad Bab-Jesúsʼgi bangudele, gannar Babba nue-naiguega be alamako (5:19-20).
Be itogua.
1. GEBE-SIKWAS-SOGLENAID
1
(1:1)
Ani Santiago, Bab-Dummad-e-mai, degi, Bab-Jesucristo-e-maibar. Israel-dulemar-sogambe-gakabo (12) we-napneggi-aisakis-bukwadga nued-sogeye sogsiid.
2. JESÚSʼBA-NANAIMALAD WILUBDAKLEGED
(1:2-18)
2a. ¿Ibiga Jesúsʼba-nanaimaladse wilubdakleged nodanikid?
(1:2-12)
An-gwenadgan, bemar igar-bulegangi akar-akar-wilubdaklealile, bemar yeer-itogewilubmalad. Bemar wismalad, be-Bab-Jesúsʼgi-bensulid-wilubdakleged, bemarga ukurmakar-ibmar-imaksulid uked. We-ukurmakar-ibmar-imaksulid, ibmar-imaklenaid weligwaledgi obelogergebed, adi, bemar dule-innikigwadga guega, dulemar mer be-nug-oichogega, degi, bela bemar unniguar ibmar nikuegar. Ar bemar gwenna-gwenna amba binsaed-nikagued sulile, Bab-Dummadse be egismar, ar Bab-Dummad bega ukoed. Bab-Dummad dule-gwen-obansuli bela dulemarga binsaed-nikagued ise-obinagwar uked. Ar be bensulidgi Bab-Dummadse binsaed-nikagued egisergebed. Ar dule-bened-nikad, demar-mulluganyob gued. Demar-mullugandi unnila burwa-goledba seleddaed. Ar dule deyob-daedi mer binsao, Bab-Dummad ega ibmar ukodeeye. Ar a-dule, e-binsaed innikisulid, emi ibmar-soggwengi-binsaed, banegi bato ibmar-baidgi binsabalid. Geg innikii nanaed, e-daed gwage-gwage daed.
Gwenad-wis-wilesakwaa-gudiid Bab-Dummad-asabin-nug-dummarba-nikadba weligwar itogewilubbid. 10 Gwenad-mani-ibeddi, Bab-Dummadse nug-bipi-imaklenonikile, weligwar itogewilubmogad. Ar dule-mani-ibed dutuyob baisursunna bergudoed. 11 Ar dad-ibeler nakwialile, na e-dutusur-gaedba, dutu-e-gagan odingudaed. E-dutu argwatoed, e-yeerdakleged bergudoed. Debayobi dule-mani-ibed na e-ibmar-nikadi e-ibe bergudmogoed.
12 Dule isguedgi-wilubdaklenaidgi sikirmaksulile, Bab-Dummad we-dulegi nued binsaed. Ar wilubdaklenaidgi obichale, Bab-Dummad na e-sabmaladga dula-gudigued-ologurgin-ukoye-sogsad ega ukoed.
2b. Jesúsʼba-nanaimaladse wilubdakleged, ¿bia-danikid?
(1:13-18)
13 Ar dule-wargwen isguedgi wilubdaklear-sogele, mer sogo: “Bab-Dummad isguedgi an-wilubdaknaiye.” Ar Bab-Dummad isguedse geg wilubdakleged, deginbali, Bab-Dummad isguedgi dulemar-wilubdaksurbalid. 14 Ar anmar isguedgi wilubdaklealir, anmar-ibmar-isgana-imakbied, degi, galagwensuli-binsaed, isguega anmar-imaked. 15 We-ibmar-isgana-imakbiedgi isgued noardaed. We-isgued-imaklesad-sorba, burgwed nonisunnoed.
16 Gwenadgan-sabesailamalad, mer be yardaklemala. 17 Bela ibmar-nuegan, degi, ibmar-innikimalad, Bab-Dummadgi nibneggi danikid. Bab-Dummad-nibneggi-gwallumar-obinnisadgi danikid. We-Bab-Dummad niisgwamar-gwagdedaeyob gwagsulid, degi, burbamaryob bergusulid. Degisadegu maid. 18 Bab-Dummad na e-binsaedba, E-Gayaburba-Nued-napiragwad-sogedba anmarga burba-dulad uksad, adi, e-ibmar-obinnisad-abargi anmar-inse e-mimmiganga guegar.
3. JESÚSʼBA-NANAIMALAD BABGI BENSULI-DAED
(1:19–5:6)
3a. Bab-Gayaburbaba-ibsamalad
(1:19-27)
19 Gwenadgan-sabesailamalad, we-ibmar an bega sogsokalid nue itomalo: Bemar ibmar-sogleged-itogega bela guakwaa gudii gumalargebed. Be-sunmakeddi, be-urweddi, na be bargamalargebed. 20 Ar dule-urwedi Bab-Dummad-asabin igar-innikigwad imaksulid. 21 A-ulale, bela igar-isgana-imaked, degi, ibmar-isgana bukidar-nikadi be mimarsun. Adi, Bab-Dummad-Gayaburba-be-gwagegi-diglesad be san-bipi-itogedgi abingamalagar. Ar we-Gayaburba be-san-burba-abonogega gangued nikad.
22 Bab-Dummad-Gayaburba-itogedginbi mer be yeer-itomar, bur eba be ibmar-imakmar. Ar degisulile, na be dukin yardakdimardo. 23 Ar dule unnila Bab-Dummad-Gayaburbabi-itogele, eba dasulile, dule-wargwen na isbegi wagar-dakeyob gued. 24 Geb na isbegi wagar-daksad-sorbali, nadele, na yog-iear naddaed ede igi-daklege. 25 Ar dule-wargwen ibmar-itosad iesulirdi, aka bur igar-innikigwad-dule-ollor-imakedgi nue atakele, degi, egi alamaknaile, Bab-Dummad egi nued binsaoed.
26 Ar dule-wargwen Bab-Dummad-igarba nue-nanadiiye binsaele, degi-inigwele, na wissur gwabin bargaele, na dukin yardakdiid. Bab-igar-wisye-sogdiid, binsa gordido. 27 Ar anmar-Bab-Dummad-asabin e-igar-nuedba-swilidik-nanaedi, wedo: Dule-sergan-sated bendaked, mukwamar-sui-ei-burgwismalad-wile-itodimalad bendaked, degi, san-swilidik-gudiguega we-napneggi-ibmar-isganagi bangued.