JEREMÍAS-GARDA
JEREMÍAS
GEBE-SOGLENAID
Garda-nug
Jeremías-Garda. Jeremías, Bab-Dummad-gayaburba-barsogedid. Bab-Jehová dule-nug-odummogedye, Jeremías-nug obarileged.
Jeremías-Gardagi weyob sunmaklenaid
Jeremías, Anatot-neggwebur-senigwadgi gwalulesad. E-baba dule-irwa-Bab-Dummadse-goledid. Deginbali, Jeremías ome-nikussulid, degisoggu, mimmigan urbissulid.
Jeremías napi-Judá-yar-selemaigusadgi gudii gusad. Israel-dulemar isgudiidba egi bonigan danikoye sogsad. A-ukinbali, Jeremías na e-sunnad e-isdarmalad neggwebur-ebirisbukwad daksad, degi, Jerusalén-sulesad daksabalid. Deginbali, Jeremías e-sunnad Jerusalén-neggwebur-oitolesad daksabalid, degi, Babse-goled-neg-obelolesad daksabalid. Degi, e-sunnad Judá-e-rey-selesad, degi, dulemar-nued-mergu-selesad daksabalid. Jeremías Bab-gayaburba-barsoged-baisur-daklesadid. Aka egi gwisgusgusmalad, sabsur-imaksamalad. Degi-inigwele, Bab-Dummad dulemarbo-igar-bini-mesoed ega sogsabalid.
We-gardagine, weyob ilemakar sunmaklenaid:
1. Judá-dulemarga, degi, Jerusalén-dulemarga gayaburbamar-soglenaid (1:1–26:24).
1a. Jeremíasʼse-gorlesad (1:1-19).
1b. Jeremías, Judá-dulemar-e-isgusad-ular ega sabsur-sunmaksad (2:1–10:25).
1c. Jeremías neg-bibisgoedgi iduakwaa sunmaksad (11:1–20:18).
1d. Jeremías, Judá-sapin-dummagangi gwisgusad (21:1–26:24).
2. Jeremías-gudigusad (27:1–45:5).
2a. Judá-dulemar, Babilonia-yarse selenonikoed (27:1–29:32).
2b. Judá-dulemar gannar e-yargi bukuoye soglesad (30:1–33:26).
2c. Bab-Dummad-iduar sabsur-odurdaklegoye-sogsad nonikid (34:1–45:5).
3. Neggwebur-baiganga gayaburba-soglenaid (46:1–51:64).
4. Jerusalén-yala-obelolesad (52:1-34).
Be itogua.
1. JUDÁ-DULEMARGA, DEGI, JERUSALÉN-DULEMARGA GAYABURBAMAR-SOGLENAID
1
(1:1–25:38)
1a. Jeremíasʼse-gorlesad
(1:1-19)
Gebe-soglenaid
Hilcías-machi-Jeremías we-gayaburbamar sogsad. Jeremíasʼde dule-irwa-Bab-Dummadse-gormalad-e-gwenadgansik danikidid, Anatot-neggweburginedid. Anatot-neggweburde, Benjamín-yalagi siid.
Deunni, Amón-machi-Josías reyga birgambe-gakapaagus (13) Judá-yargi-maidgi, Jeremíasʼse Bab-Jehová-gayaburba nonikid.
Deginbali, Josías-machi-Joacim Judáʼgi reyga-maigusadgi, Bab-Jehová-gayaburba Jeremíasʼse nonigusbalid.
Josías-machi-Sedequías Judáʼgi birgambe-gakagwensak-gaka-nii-walataledgi reyga-maid-bergusadse, Bab-Jehová-gayaburba Jeremíasʼse nonigusbalid.
Wegisundo, a-ibagangi, deunni, Jerusalén-dulemar Babilonia-neggweburse gales-selesgusmalad.
Bab-Dummad Jeremíasʼse-gochad ega-arbaegar
Bab-Jehová-gayaburba anse nonikid, weyob anga nonikid:
“Jeremías, amba yoo be sapibeneggi-mege bato an be-susad.
Amba yoo be gwalulege, bato angadga an be-imaksad.
Dulemar-yar-baid-baidgi-bukmaladga an-gayaburba-barsogedga bato an be-nug-imaksad.”
An weyob Bab-Jehová-abin sogded:
“¡An duledar-wiles! Bab-Dummad-Jehová, amba an machi-swilid.
An wissulid, igi an dulemar-abargi sunmakoe.”
Degi-inigwele, Bab-Jehová anga sogded:
“Melle be soge: ‘Amba an machi-swiliye.’
Ar bia an be-barmidoe, aba be naoed.
An bega-ibmarmar-sogoedi, bela dulemarga be sogmogoed.
Ani an Bab-Jehová-guedgi bega soged:
Melle be dulemar-abin gwayo.
Ani an be-bendakega beba gudii guoed.”
Geb agine, Bab-Jehová e-argan anse-oyoalid, geb an-gakuli ebusad. Agine weyob anga sogded:
“Be-gwabindukugi an bega, an-gayaburbamargi-sunmakoed an nasiksad. 10 Emi-ibagi, yarmar-selemamaidgi, degi, dulemar-yar-baid-baidgi gargangued-nika an be-imaked:
Adi, be dulemar-ononnogega,
yar-selemamaid-obelogegar,
Dulemar-osulogega,
yar-selemamaid-bibisgegar.
Gannar dulemar-urbega,
gannar yarmar-selemamai guegar.”
11 Geb Bab-Jehová anga soged:
“Jeremías, we-ibmar, ¿ibu-ibmar be dake?”
Bab-Jehová-abin an sogded:
“We an dakedi, sapi-almendro-ana an daked.”
12 Degi, Bab-Jehová anga sogded:
“Nabir-be-soge, inniki be daksad. An-ibmar-sogsadi, sogedba-guega an imakedsegad.”
13 Geb Bab-Jehová gannar anga sognonibalid. Weyob anga sogded:
“¿Jeremías, we-ibmar, ibu-ibmar be dakbali?”
Bab-Jehová-abin an sogded:
“We an dakedi, bormogi-dii-gwakwarmaknai an daked. A-dii-gwakwarmaknaid dad-nakwed-sapiled-akar aryodani an daked.”
14 Geb Bab-Jehová anga odaloded:
“Dad-nakwed-sapiled-akale, bela we-yalagi-dulemar-bukwadgi, boni-dummagan an barmidoed.”
15 Bab-Jehová weyob soged:
“Dulemar-dad-nakwed-argan-sapiledsik-bukmaladse an golesokalid.
A-dulemar Jerusalén-neggwebur-doged-yawagakse, e-ambikued-negmar urbenonikoed.
Bemar-galu-matusulid-akwabiid-asabin ambikunonimaloed,
degi, bela Judá-neggweburmargi gwichigunonimaloed.
16 Dulemar bela-belad-isgusmalad-ular, an egi gwichiguoed.
Ar ade, angi bangudmalad.
Bab-dummad-baiganga ina-wawadikid ogumakar ukdemalad.
Degine, e-ibmar-sobsamalad, e-bab-dummadyobi imakdemalad.
17 ”Jeremías, bedi guakwagudii sao. An bega bela-ibmar-sogoedi, be sognao. Melle be we-dulemar dobguo. Degisulile, ani an dulemar-asabin-gwayega an be-imakoed. 18 Emi-ibagi, neggwebur-gandikidyob an be-imaksad. Bubawar-esgorobiidyob, an be-imaksad, degi, galu-matusulid-esgoro-gordikidbiidyob, an be-imaksad. An be-ogannosadi, bela we-yalagi dulemar-bukwadgi-yolegega an be-imaksad. Judá-e-reymargi-gwichiguega an be-imaksad, e-dummagangi-gwisguega an be-imaksad. Degine, e-dule-irwa-anse-gormaladgi-gwisguega an be-imaksad. Bela dulemar-e-neggweburginmaladgi-yolegega an be-ogannosad. 19 We-dulemar bela begi gwisgunanai gumaloed, degi-inigwele, begi obinosurmalad. Ar ani an, be-bendakega beba gudii guoed. Ani an Bab-Jehová-guedgi, we-ibmar an bega soged.”