JOSUÉ-GARDA
JOSUÉ
GEBE-SOGLENAID
Garda-nug
Josué-Garda. Josué birgabargus Moisés-bendaksad. Bab-Dummad, Josué-onug-imaksad, adi, Moisés-sorba Israel-dulemar-seegar. Bab-Jehová-dule-abonogedye Josué-nug obarileged.
Josué-Gardagi weyob sunmaklenaid
We-garda anmarga sunmaknaidi, Israel-dulemar birga-dulabogus (40) Egipto-yargi-wilebukwa-nosmargu, Canaán-yarse ubononigusmaladgi sunmaknaid. Bab-Dummad Abrahamʼga, Isaacʼga, degi, Jacobʼga sogsagusad, be-waganga yala-nued an ukoye, deyobi, Bab-Dummad ibmar-sogsadba sogedba imaksad. (Génesis 13:14-17; 26:3-5; 28:13-14)
We-gardagine, weyob ilemakar sunmaklenaid:
1. Canaán-Yar-sulesad (1:1–12:24).
2. Israel-Dulemarga Yar-Mimilesad (13:1–21:45).
3. Israel-sordamar-abar gannar e-yarse nadmalad (22:1-34).
4. Josué napi-sunmaksad (23:1–24:28).
5. Josué-burgwisad (24:29-33).
Be itogua.
1. CANAÁN-YAR-SULESAD
1
(1:1–12:24)
Bab-Jehová Josuéʼga-igar-uksad
1 Bab-Jehová na e-mai-Moisés-burgwisad-sorbali, Moisés-e-bendaked-Nun-machi-Josuéʼga sogded: 2 “An-mai-Moisés burgwisad. Degisoggu, be, degi, bela wegi dulemar-bukwadi Jordán-diwar obakmalargebed, adi, an Israel-dulemarga-yar-uknaidse be namalagar. 3 Ar igi Moisésʼga an sogsa-gusa, deyob an imakoed. Ar bia be gwisgudapmaloe, a-negmar bela an bemarga ukmaloed. 4 Bemar-yala dad-nakwed-argan-nuedsiki nega-dulesulidgan-naid-akale onodagoed, geb dad-nakwed-argan-sapiledsik-Líbano-yar-siidse berguoed. Dad-nakwedsikdi, Éufratesʼye-diwar-nugad-akale onodamogoed, degi, bela Het-dulemar-yarse-bakale yaba dogoed, geb dad-argwanedsik-demar-Mediterráneoʼye-nugadse bergunamogoed. 5 Be-dula-gudiidgi, dule bipisaale begi nakosulid. Ar an igi-Moisésʼba gudigusa, deyobi, an beba gudii gumogoed. An be-metosulid, walagwen an be-obegosurbalid.”
6 Bab-Jehová sogdebalid: “Gandik be sao, melle be dobguo. Ar bee be, an be-dadganga yar-ukoye-sogsagusadi, Israel-dulemargadga-guega be mimioed. 7 An-mai-Moisés bela bega Igar-Maid-sogsadba be nanadii-guegala, unnila an bega soged, gandik be sao, melle be galakuo. Melle be bipisaar we-Igargi banguo. Ar be we-Igar-Maidba be nanadiile, bela be-ibmar-imakedi bega nueganbi guoed. 8 Gardagi Igar-narmakar-maidi be gannar-gannar absodii guo. Mutikidba, degi, ibginedba egi be binsadii guo. Igi-gardagi Igar-narmakar-mai, abali be ibsadii guo. Deyob be imakele, be nasgumai guoed, degi, bela be-ibmar-imakedi bega nueganbi gudoed. 9 Bato an bega sogsad: ¡Gandik be sao, melle be galakuo. Melle be dobguo, melle be nig-argwanbalo! Ar bia be naoedba, ani an be-Bab-Dummad-Jehová, beba gudii guoed.”
10 Geb degine, Josué e-dule-dummagangala igar-uksad: 11 “Bela Israel-dulemar-danar-danar-bukwadse be namar, amarga be weyob sogmalo: ‘Mas guakwaa be urbemalo, ar ade, ibapaase bemar Jordán-diwar obaknamaloed, adi, Bab-Dummad-Jehová bemargadga-guega yar-bemarga-uknaidse be ubonamalagar.’ ”
12 Rubén-waganga, Gad-waganga, degi, Manasés-wagan-negabaladga, Josué weyob ega igar-uksad:
13 —Bab-Jehová-e-mai-Moisés bemarga weyob sogsagusadi, be ebinsamalo: ‘Bab-Dummad-Jehová bemar-obunnogega we-yala bemarga uksaye.’ 14 Degisoggu, be-omegan, be-mimmigan, degi, be-ibmar-durgan, bemarga Moisés Jordán-diwar-dad-nakwedsik-yar-uksa-gusadgi be obemalo. Bemardi bila-onomalad-gumaladi, bemar-inse be-gwenadgan-idu gingi-gani-gani obakmaloed. 15 Bab-Jehová igi-bemarga obunnoged uksa, deyobi, Bab-Jehová be-gwenadganga obunnoged-ukedse, bemar be-gwenadgan bendakmaloed. Bab-Jehová ega yar-ukoye-sogsad-suedse, bemar be-gwenadgan bendakmaloed. Geb bela weyob ibmar-gusad-sorbali, sunna bemar napa-bega-uklesadse be gannar namalad, adi, degisadegu na be begadga imakmalagar. We-napamar Bab-Jehová-e-mai-Moisés bemarga Jordán-diwar-dad-nakwedsik uksagusadid.
16 Geb Josué-abin weyob sogsamalad:
—Bela be anmarga igar-uksadba anmar ibsaoed. Bia be anmar-barmidoe, abali anmar naoed. 17 Ar igi-anmar Moisés-sogedba ibsasa, deyobi, anmar bela be-sogedba ibsamogoed. Unnila anmar egised, igi-Bab-Jehová Moisés-bendakdigusa, deyobi, bitigi Bab-Jehová be-bendakdii gusmogana gadinye. 18 Dule be-ibmar-sogsadba uayasulidaele, degi, be-igar-uksadba ibsasulile, oburgwilegoed. Josué, bedina, ¡gandik be sao! ¡Melle be galakuo!