MIQUEAS-GARDA
MIQUEAS
GEBE-SOGLENAID
Garda-nug
Miqueas-Garda. Miqueasʼde Moresetʼginedid. Miqueasʼgi binsaleged we-dulede, Amósʼyobi sapurgi arbadii gusmoye. Doa Bab-Jehováʼyobidye, Miqueas-nug obarileged.
Miqueas-Gardagi weyob sunmaklenaid
Miqueas, Rey-Jotam-ibagangi, Rey-Acaz-ibagangi, degi, Rey-Ezequías-ibagangi gudii gusad.
Miqueas, Judá-neggweburgi Bab-gayaburbagi sunmakdii gusad. Degi, Israel-neggweburgi sunmakdii gusbalid. Miqueas, sogdii gusad, yoedsega David-e-neguyagine, Rey-Dummadi gwalulenonikoye. We-Mesías, Belén-Efrata-neggweburgi gwalulenonikoye. We-gaya-sunmaksadi, Jesús-gwalulenonikoedgi sunmaksad. (Mateo 2:6)
We-gardagine, weyob ilemakar sunmaklenaid:
1. Bab-Dummad Israel-dulemarga, degi, Judá-dulemarga igar-nabosad (1:1–3:12).
2. Bab-Jehová bela napneg semaid (4:1–5:15).
3. Israel-dulemar-isgusad, degi, Bab-Dummad Israel-dulemar-wiledaksad (6:1–7:20).
Be itogua.
1. BAB-DUMMAD ISRAEL-DULEMARGA, DEGI, JUDÁ-DULEMARGA IGAR-NABOSAD
1
(1:1–3:12)
Samariaʼga, degi, Jerusalénʼga naibi-itosad
Judá-dule-e-reymar Jotam, Acaz, degi, Ezequías, negsemamaid-ibagangine, Bab-Jehová dule-Moreset-neggweburgined-Miqueasʼye-nugadga sunmaksad. Miqueas, Samaria-yalagi-negguoed, degi, Jerusalén-yalagi-negguoed weyob negburgan daksad.
Bab-Jehová-danikoed
Miqueas, Bab-Jehová-ega-sogsadba weyob sogded:
“Dulemar, bela we-yalagi-bukmalad be an-itomar,
bela napneggi-bukmalad, nue-bogimakar be itomalo.
Bab-Dummad-Jehová-Bela-Gangued-Nika-Maid, ese-goled-neg-akale, bemargi-gwisguega sunmakoed.
¡Dakmala! Bab-Jehová, e-maidgi bato noalid, bato aidealid,
yar-mullugan-imbaba gannamakdanikid.
E-nanaedbali yarmar abin maludoed.
Ibmar-gwallu-soo-abin-daluddaedyobi yar gudoed,
igi diwar-noedbali, nebagan negabar-argaddae,
deyobi, nebagan argadoed.
Bela we-ibmarmar Jacob-wagan-Bab-Dummadgi-gwisgusadbali guoed.
Israel-dulemar-isgued-ular, deyob, guoed.
¿Ar bia Jacob-wagan Bab-Dummadgi gwisgusmala?
¿Ar Samaria-neggweburgi isgusmarsursi?
¿Ar Jerusalén-neggweburgi, Judá-dulemar e-bab-dummaganse-gorleged-neggi isgusmarsursi?
A-ulale, Bab-Jehová soged:
‘An Samaria-neggwebur akwamarbi dunnumaksii an imakoed.
E-akwamar nebaganba an mioed,
bela swanga an imakoed.
Unnila e-yala uvaʼmar-digega guoed.
Bela e-bab-dummadyob-imaklemalad bibislegoed.
Bela bab-dummagan-neggi-gambasamaladga ibmar-uklesmalad, ogumaklegoed.
Bela we-ibmarmar-soblesmalad an obelogoed.
Ar ade, galagwensuli-nanamalad-manigi, we-ibmarmar-soblesadi, gannar amar-maniga an imakoed.’ ”
Miqueas, Israel-dulemar-ular, bukib-itosad
Miqueas sogded:
“Agala, an booed,
bukib-binsaedba an binnasuli goloed,
nag-swili an gudii guoed,
uka-swili an gudii guoed.
Achu-boeyobi an gordii guoed.
Irmonyobi an akigindii guoed.
Ar ade, Samaria-e-naibigusadi, gege nudakleged.
E-naibigusadi, bela Judá-yalase warmaksad.
Bela Jerusalén-neggweburse an-dulemar-bukwadse nasgusad.
10 Melle be bomalo,
melle Gat-neggweburgi be ibmar sogmalo.
Napayala nunmakedba, Bet-Le-Afra-neg-ukubgi be bindumakmar.
11 Safirʼginmalad, uka-swiri binged-abalagi be-yargi be nomar.
Zaanánʼginmaladdi, ainiega sikirmaksamalad.
Betesel-neggweburgi ogormakdemalad, bar bemar bendaklegosulid.
12 Marotʼginmalad, ibmar-nued-gued abebukwad,
ar Bab-Jehováʼdi, Jerusalén-neggwebur-dogedse bonigan barmialid.
 
13 ”Laquis-dorgan, bemar ur-bila-onomaladgi moli be nasikmar.
Ar ade, be-neggwebur-Jerusalénʼgi isgued noalid,
bemargine, Israel-dulemar-e-isgued noalid.
14 Degisoggu, Moreset-Gat-neggweburga degimaloye be sogmalo.
Aczib-neggwebur-e-negmar, Israel-dulemar-e-reymar-yardakega gued.
 
15 ”Maresa-dorgan, dule-wargwen be-ibe-yarsuega, an bemargi barmidoed.
Adulam-akwasaila-yaa-ollogwadyaba Israel-dule-bulegan dukunamaloed.
16 Degisoggu, be-mimmigan-sabed-ulale, be bukib-binsae,
aku-siga be esie,
mula-nono-swirigwadyobi be-nono swiri be imake,
ar ade, be-mimmigan yogasaar-gales dikasuli begi seledmaloed.”