NAMAKLEGED-BIRIGINED-GARDA
CANTARES
GEBE-SOGLENAID
Garda-nug
Namakleged-Birigined-Garda. We garda, Hebreo-gayabali, Shir-Hashirimʼye bileged. “Namakleged-biriginedye” sogleged.
Namakleged-Birigined-Gardagi weyob sunmaklenaid
We-namaklegedi, sabguedgi namakleged. Degi, abirgin-abegedgi namakleged. Machigwa-wargwen bunagwa-abesiidgi namaked.
We-namaklegedi soganergwagi akar-akar-namaklemalad naid. Machigwa bunagwa-ebo na abesimalad muchub-muchub sunmaknanaid. We-namaklegedi bukidara egi akar-akar ibmarmarba-dakagwale sunmaklenaid.
We-namaked-garda oyobalid igi-Bab-Dummadi Israel-dulemar-sabgusa. Degisoggu, emi-ibasega amba deyob Bab-sordamala Jesucristo-sabguedgi sunmakmarmogad.
We-garda sunmakbalid, igi Cristo iglesia e-omeyobi na dake, a-burbagi anmarga sunmaked.
Binsaleged, we-garda Rey-Salomón narmaksaye.
We-gardagine, weyob ilemakar sunmaklenaid:
1. Namakleged-gebed (1:1–2:7).
2. Namakleged-sogbogwad (2:8–3:5).
3. Namakleged-sogbaagwad (3:6–5:1).
4. Namakleged-sogbakegwad (5:2–6:3).
5. Namakleged-sogataled (6:4–8:4).
6. Namakleged-soganergwad (8:5-14).
Be itogua.
1. NAMAKLEGED-GEBED
1
(1:1–2:7)
Ome-abirgin-nikad-e-namaked
Salomón we-namakleged-birigined narmaksad.
Ome-nue-sabgulediid namaked
¡Bitigi be an-wagar-usana gadina!
Be-sabgued vino-goblegedbali, bur bule yeer itoleged.
Be-ina-wawadikid-e-yapannedi, nue-yeer yapanned.
Ar be-sunnadi, ina-wawadikidyob gued.
¡Agala, yagana nue-bebina sogmalad!
 
¡Be an-nide! ¡Gwae beba be an-nide!
¡An-rey, be-gabednegse be an-sede!
Anmar wergumarsun,
anmar yeer-itomarsun.
Be-sabguedgi, vino-goblegedbali, bur bule anmar egi wergue.
¡Agala, bebina nue sogmalad!
 
¡Jerusalén-neggwebur-bunamala! An uka sichii gued, an yeer dakleged.
Cedar-dulemar-dordoneg-sichigan-bubukwadyob an-uka sichii dakleged.
Salomón-mor-dummaganyob an yeer dakleged.
Mer an-uka-sichigwadgi be atakmala,
ar dad-ibeler-gaedba, deyob an gusad.
An-susmar anse ulusmalad,
e-uva-dub-nainu-akwega an-imaksamalad.
A-ulale, an-uva-dub-nainu bar an nue akwissurgusad.
 
¡An-sui-nue-sabesailad! Anga be soge, be-sibadmar-gagangi-omanaegala, ¿bia be omanaddae?
¿Bia yorukudba be obunnogega seddae?
¿Ar ibiga an dule-negsuligudidaeyobi,
be-aimar-sibad-bukwad-abargi an be-amidii guoe?
E-aimar bular namaked
Omegan-yeerdaklemaladba, bur be yeer dakleged.
Be-sui-nue-sabesailad-amiegala, sibad-gannarba be nae.
Be-sibad-burwigan masgi-omanae,
dule-sibad-edarbemalad-e-dordoneg-dikarba be omanae.
Sui-nue-sabgulediid namaked
Be, an-ome-nue-sabesailadid.
Bee be Faraón-ur-ebipimalad-moli-omegan-nuegan-yeerdaklegedyob be gued.
10 Ibiyob be-wagar yeerdaklege,
be-wagar oluamar-abargi yeer dakleged.
Ibiyob be-dukar yeerdaklege,
wingwamar-naid-abargi yeer be-dukar dakleged.
11 Anmar bega oluamar-olobiid soboed,
oluamargi manimar-nanai bega imakoed.
Ome-nue-sabgulediid namaked
12 Rey e-megedgi yollekwaa megisale,
an-ina-wawad, wawadik-oburmakdedaed.
13 An-sui, ina-wawadikid binasgargi-atinnar-sagu-bipigi-seledidaedyob, anba gabdiid.
14 An-sui, Engadiʼye-neg-nugadgi dutu-nuegan-nigwichiyob, anga gued.
Sui-nue-sabgulediid namaked
15 An-ome-nue-sabesailad, ¡ibiyob be yeer daklege!
¡Doggus nued be dakleged!
¡Be-ibyamar, nuumaryobi gued!
Ome-nue-sabgulediid namaked
16 ¡An-sui-nue-sabesailad! ¡Ar ibiyob be yeer daklege!
¡Machered-nued be daed!
Sui-nue-sabgulediid namaked
Gaganmar-aramakmamaidi anmar-gabedga guoed,
17 anmar-neg-nagubirmar urwarmar mamaid,
anmar-neg-uas ciprés-e-urgomar mamaid.