John Letta Numba Shree
1
A John, de elda een de choch, da write ta me deah fren Gaius, wa A lob fa true.
Me deah fren, A da pray say ya keep well an dat all ting da gwine fine fa ya, jes like all ting fine wid ya soul. A been too heppy wen some Christian broda dem come an tell me how faitful ya been ta de trute, jes like ya da waak een de true way. Ain nottin mek me mo heppy den fa yeh say me chullun da waak een de true way.
We Oughta Hep We Christian Bredren
Me deah fren, ya faitful fa true een wa ya da do fa de Christian bredren, eben wen ya ain neba been see dem. Dey beena tell de choch people bout hommuch ya lob um. E gwine be a good ting fa ya fa hep um git ready fa go on dey journey gin een de way dat mek God heppy. Cause dem bredren done set out pon dey journey fa sake ob Christ name, fa do e wok, an dey ain tek nottin fom dem wa ain bleebe pon God. So den, we wa trus een Christ oughta hep people like dem bredren yah. Cause dat way we da wok wid um fa de true way.
Diotrephes an Demetrius
A done write ta de choch, bot Diotrephes wa lob fa pit esef head ob de res ob de choch people, e ain pay no mind tall ta wa A tell um. 10 So den, ef A come, A gwine taak bout wa e da do, da shrow slam at we. Bot dat ain nuff fa um. Wen Christian bredren come, e ain welcome um. An wen oda people wahn fa welcome um, e stop um, an e dribe dem wa wahn fa hep outta de choch.
11 Me deah fren, mus dohn folla de ebil way. Jes folla de good. De one wa da do good, e God chile, bot de one wa da do ebil, e ain neba see God. 12 Ebrybody da taak, say Demetrius da do good. De trute esef tell we dat e do good. We da say e good too, an oona know we da taak de trute.
De Las Wod een Dis Letta
13 A got plenty ting fa write oona, bot A ain wahn fa set all dem down wid pen an ink. 14 A hope fa come ta oona an see oona soon, an we gwine taak face ta face.
15 Peace be pon ya.
We fren dem yah da tell ya hey. An tell all we fren dey hey fa we, ebry one ob dem.