DAVID TUKU MUNE
MUNE WAŊE
DAVID TUKU MUNE
51
David nu Batseba ndoŋ unekina le tuan taŋgo Natan pro David mbar maŋau kina ta tuku sana le David nu mune te kuyarna.
O Kuate, kume pur maŋau ta ne tugu.
Ne sine make patikate wam ta mata suŋgokanu.
Ta tuku ne ye mapeyumba ye tuku une ŋakmba sauka kile-sika.
Ne ye tuku mbar maŋau ŋakmba sauka gilaiŋga le ye ne am mbolŋge tiŋreknu purfeŋnu mayok ka.
Ye siŋka mbaren sulumba une maŋau ken. Wam ta ye mara mindek idusmba minet.
Ye ne am mbolŋge mbaren. Mbar ta ne kumammba ken.
Ta tuku ne kumumbi ye tumba pasa mbolŋge pilit.
Ye inaŋge te-pile ndakina ait ta ye une ŋak minen.
Nu ye te-pilna le ye mbar maŋau kam tuku ndo mayok kan.
Ye maŋau purfeŋnu tugusek ndo dubiki ŋga ne wamdus suŋgo ŋak minit. Ta tuku ne wamdus kuyar mayenumbi ye sinzaŋya.
Ne ye tuku une ta ŋakmba sauka kile-sika.
Taŋawa le ye ne am mbolŋge purfeŋnu ndo mayok ka.
8-9 Ne ye piti suŋgo sina le ye tuku saŋgri ŋakmba kuganaig.
Ne ye tuku mbar maŋau ta kile-sikumba ye tuku une ta nduiye gilaiŋga.
Taŋamba ne naŋe gare maŋau ta ye sa le ye maŋ gare-gareki.
10 O Kuate, ne ye tuku ŋgamuŋgal purfeu sera sulumba ye tuku wamdus te-tiwe sa le ye ne ndo dubinam idusi.
11 Ne ye pitai ndayumba naŋe Tukul Guwa mata ye yai ndaya.
12 O buk ne ye te-luka tina le ye gareyina.
Taŋamba ndo ne naŋe gare maŋau ta sa le ye maŋ gare-gareki.
Ye mara mindek ne ndo dubinam tuku wamdus tambi sinzaŋya.
13 Taŋawa le ye une ŋak mbal ne tuku wam tugusek ta tumniŋgi le nane mbilka ne dubinamŋgaig.
14 O Kuate, ye ndare kutuwen ta idusmba ne ye kasuryumba pasa mbol pile ndaka.
Ne ye mapeyumba ye te-luka ta le ye ne tuku maŋau tiŋreknu ta idusmba mune-munekamŋgit.
15 O Suŋgo, ne ye sinzaŋya le ye maŋ yiŋe miŋgembi ne tuku nyu te-duŋgi.
16 Ye ne tuku atrauka agaŋmor kilmba bale farmba pasoki le ugwaig ta ne nzali ndanate.
17 O Kuate, ye tuku atrau agaŋ ta ye yiŋe nyu te-ibeŋmba ne kumnemŋge mini ta ne nzalinate.
Ye ŋgamuŋgal biye mbilmba ne tugum prowi ta ne ye pitaiye nda.
18 Ne Yerusalem fonde kareŋnumbi te-kormba naŋe nzali dubimba Sion mbal sinzaŋniŋga le nane mine magewaig.
19 Taŋamba nane tukul dubimba makau pailnu kilmba ne tuku atrauka agaŋmor ta bale farmba pasoka ugwaig le ne gare-garekamŋgat.