Títɛlɛ́ lírũ kɛ Pɔɔli uu Tɛsɑloniki pikɔ́ n wɔ́i
Lɛlɛɛ rítɛlɛ́ ntí-i ń we
Títɛlɛ́ lírũ ntí yɛ nsímɛ́ kɛ Pɔɔli uu Tɛsɑloniki pikɔ́ rifoí kɛ́mɛɛ n wɔ́i pisímɛ́ kpɑ́lɛnlɛ. Li pɛɛ pi cɔ́ŋlɛnlɛ rɛ íye kɑi wɑ kɛ Upíimɑ Yeesu úu kɑhɑnɛ m pɛɛmɛ. Pinyinɛ yɛ pɛɛ Tɛsɑloniki-i símɑɑnkɛɛ rɛ Upíimɑ kɛyɑɑ yɛ pikɑ́mɛ mɑsilɛ. Picɔ pɔ́ɔ lɛ̃ nnyɑ pikɛi n yulu.
Ifɑɑci iyɛ̃ mɛkériinɛ yɛ mmɛ́:
1. Pɔɔli yɛ Uléécɑɑ pɔɔnɛsɛ rɛ Tɛsɑloniki pikɔ́ yɛ nfɑtɛnɛ kɛ́mɛɛ pɑpisi nnyɑ. Uu kɔ mɛsɛ nɛ mɛsɛ Upíimɑ welu rɛ ukɛ́ nŋmɔ́ɔ́pú pi hɛ likɛ́ hɑ nɛ ukɛpɛɛmɛyɑɑ tu (1:1-12).
2. Pɔɔli yɛ Kirisi mɛpɛɛmɛ kɛcɑ́ɑ́ icélɑɑ pɑ uu kɔ lɛlɛɛ n wɑinɛ likɛ́ kɛlenɛ lɛ̃ n wɑ nkɔ́ símisi (2:1-12).
3. Ikɑri pikpɑ́sɛ nɛ iwelɛ (2:13-17).
4. Pɔɔli yɛ Kirisi pikɔ́ pisɛ rɛ pikɛ́ Uléécɑɑ n yɑ́ɑ́si. Uu kɔ pɛpɛɛ ɑ́pi pikɛi piwɑi ń lɑ nkɔ́ kɛcɑ́ɑ́ icélɑɑ pi pɑ (3:1-15).
5. Iyɑ́hɑɑ tɔrɔɔ (3:16-18).
1
Iyɑ́hɑɑ
1 Nɛ̃́ Pɔɔli nɛ Silɑsi nɛ Timotee, tɔ́ɔ nɔ̃́ Tɛsɑloniki Uléécɑɑ icɑ́pinɛ pikɔ́ pɛ̃ kɛ Urɔ́sɑ́ɑ Uléécɑɑ nɛ Urɔ́píimɑ Yeesu Kirisi ɑpi n te rítɛlɛ́ wɔ́ipɔ. 2 Urɔ́sɑ́ɑ Uléécɑɑ nɛ Urɔ́píimɑ Yeesu Kirisi pikɛ́ ípɛɛlɛ́ɛ nɔ́ nyísɛ ɑpi kɔ nkíŋniŋɛ nɔ́ hɛ.
Kirisi yɛ wemɛlɛ ukɛ́ nɛ pisoi túhɑɑnɛ
3 Pimɑ́rɛcɔ, li pisɛ rɛ tɔkɛ́ mɛsɛ́rɛ nɔ̃́ nnyɑ Uléécɑɑ n yɑ́ɑ́si rɛ nɛ upikɛi. Li nɛ risɑ́lɛ rɛ tɔkɛ́ li wɑ, likumúŋɛ́ rɛ nɔ́nnɛ́fɑtɛnɛ yɛ pelulɛ, lɛ̃ kɑni n lɑ́kɑɑnɛ lin kɔ mɛsɛ́rɛ kɛ́yu-mɛ̃ sĩ. 4 Lɛ̃ nnyɑ kɑri Uléécɑɑ icɑ́pinɛ pikɔ́ inipɛɛ-i nɔ̃́ nnyɑ rikɔ́kɔri wɑi rɛ ḿpɑ́ nɛ íwɛ kɑni n le nɛ piwéékusɛ nnɛ́í kɑni n yɛ́nɑɑlɛ̃, nɔ riŋmɔ́ɔ́púlɛ ɑni nfɑtɛnɛ m mɑ́. 5 Kei kɛ Uléécɑɑ uu yɛ nyísɛ rɛ ukɛtɑhɑi yɛ kɛcírɛ welɛ. Li lɛ̃ wɑlɛ rɛ nɔkɛ́ nɛ pɛpɛɛ mɑsí uiyɔɔpi kɛ́mɛɛ n loninɛ mɛcɔ n we nnyɑ. Uléécɑɑ iyɔɔpi iyɛ̃ nnyɑ kɑni nní íwɛ le. 6 Uléécɑɑ yɛ ɑsei mɑ́lɛ. U yɛ́ pɛpɛɛ nní íwɛ nɔ́ n wɑi íwɛ iyɛ̃ cɛɛi. 7 Amɑ́ u yɛ́ kɑm uu tíyɛsɛ tɔ́ nɛ nnɔ̃́, tɔ́ɔ nní íwɛ n le, ɑri wéntɛ. Kumúŋɛ́ kpɛ-i kɛ Upíimɑ Yeesu uú hɑ kɛyómɛcɑɑ-pɔ n kpɑ́fúmɛnɛ ḿpɑ́ úye ukɛ́ u yɛ̃ nɛ upileecɑɑtumɛ nɑŋɛ-nɑŋɛ kɑi lɛ̃ wɑinɛ. 8 Inɑlempi kɛcɔpɛ kuu cɛ́pimɛnɛ ukɛ́ pɛpɛɛ ɑ́pi ń lɑ pikɛ́ Uléécɑɑ céri ɑ́pi kɔ Urɔ́píimɑ Yeesu Nsímɛ́ Kɛcirɛ pɑkɑrɛlɛ̃ kpɑnii. 9 Akpɑnii kɑpi n yɛ́nunɛ nyɛɛ ncɑɑi tɛnɛcirɛ́, kei kɑpi yɛ́ Upíimɑ nɛ Unnɑŋɛ mulɛ-mulɛ nɛ kɛtɑɑ ń we. 10 Kumúŋɛ́ kpɛ-i kuú hɑ sɔ́nti rɛ pɛ̃ kuu n wɛ́ɛ pikɛ́ ríyu u wɑisɛ, pɛpɛɛ nɛ kɛfɑ n tɛnɛ pikɛ́ u nyɑ́nɛi. Nɔ̃́ ticuruu, nɔ́ hɑ pisoi pɛ̃ kunɑi kɛ́mɛɛ n welɛ, kɑni nsímɛ́ kɑri nɔ́ n símisi nɛ kɛfɑ n tɛnɛlɛ̃ nnyɑ. 11 Lɛ̃ nnyɑ kɑri mɛsɛ́rɛ nɔ́kɛnɛ́cɑ́ɑ́ kɛyómɛ yɑ́ɑ́si. Tɔ nɛ Uléécɑɑ ténilɛ rɛ ukɛ́ tíyɛsɛ nɔkɛ́ pɛpɛɛ nfɑ́ɑ mmɛ̃ nnyɑ kuu nɔ́ ń sée n yɛ̃́ mɛcɔ n we. Tɔ nɛ u ténilɛ rɛ ukɛ́ tíyɛsɛ lɛ̃ kɑni n hɔ́lɛ̃ tɛ nɔkɛ́ wɑ likɛ́ wɑ, ukɛ́ kɔ lɛ̃ kɛ nɔ́nnɛ́fɑtɛnɛ nn piwɑi ń lɑ kɛ́mɛɛ nɔ́ lɛ̃́. 12 Lin lɛ̃ n wɑ, nɔ́ Urɔ́píimɑ Yeesu rinyiri ríyu wɑisɛ, uyɛ̃ uu kɔ nɔ̃́ tíyu wɑisɛ. Urɔ́léécɑɑ nɛ Urɔ́píimɑ Yeesu Kirisi pikɛi yɛ pɛ̃.