2
Jonanöŋ gajugaju kömgokŋe ahöba köuluköyök.
Jonanöŋ söra uruŋe ahöba Kembu Anutuŋi köuluköm waŋgiba kewö jiyök: “Nöŋön wahöjaliŋ uruŋe Kembu köuluköm gihibiga göŋön ölöp keuni mötzan.
Ni uŋem senjom kömgokŋe ahöba uleralga göŋön ölöp uletni mötzan. Göŋön köwet röndum ketauŋe tötal niŋginöŋga gezal.
Göŋön köwet söŋsöŋauŋaŋgöt dutŋe tuapkönöŋ eralga göulu ketauŋan esuhum niŋgizap.
Göhöreŋ qölqöl-söutsöut pakpak mi musulumgöm niŋgizap.
Göhöreŋ siri pakpak mi qeba turuba nem ulahöm niŋgizap. Mia möta kewö mötmörizal: Göŋön ni göhöt jemesoholgeyök közöl niŋginöŋga maljal. Mi töndup nöŋön möp kunbuk göhöreŋ jöwöwöl jike kömbukŋe göröken jenan ubi anma. Mi kunbuk kude ekileŋahak kun. O aka omanjaret mi nöŋgöt qakne öŋgöba turum niŋgim teközap.
Röndumnöhök möp liliköm niŋgim teközap.
Köwetköt kumburereŋi miaŋön möp nöröp jupni köpeiba esuhuzap. Ni kunduŋaŋgöt röndaŋ könaŋaŋgöt dop yuhuyaŋgöreŋ eral. Röndaŋgöt botŋi miaŋön möp nöŋgöt qakne jöhöm qözöŋda jöhöm qözöŋ köhöizap.
Yuhu maljalmö, o Kembu Anutuni, göŋön möp neka röndaŋ dutŋeyök kunbuk öröm niŋginöŋga malmalnöŋ kotmam. Nöŋgöt malmalnan qahöwakŋamgöt aiga nöŋön nalö miaŋgöreŋ Kembu, gi mötmörim gihibiga köuluknan öŋgöba göhöt Suep jike kömbukŋe euyaŋgöreŋ öŋgöba göhöreŋ aŋgotmap. Ambazip kopa-bemlopioŋ omaŋi göda qem eŋgimakzei, yeŋön mewö aka kalem möriam Toŋi gi andö guhumakze. Andö mewö guhumakzemö, nöŋön möp möpömöpösei löŋet omsa köla naluk ala jöwöwöl ohom gihimamgöt mötzal.
Nöŋön yuaigöt keuŋi jim jöhözali, miaŋgöt dop möp ak sorokömakŋam.
O Kembu, gi mohotnöŋ nöŋgöt malmalnaŋgöt bohoni jöhömamgöt köhöizan. Keu mi ölŋap.”
10 Mewö köuluköm teköiga Kembunöŋ möp söra mi jim kutum waŋgiiga kaba kota Jona loŋniga gölme oronŋe erök. Mewö.