A di fu tu brifi fu Paulus gi
Timoteus
Wan wortu na fesi
Di Paulus skrifi a brifi disi, a ben de ini straf'oso na Roma. A gersi leki Paulus skrifi a brifi disi fu gi a wroko fu en abra na den yongu tiriman fu a gemeente. Disi ben de a laste leisi di a gi Timoteus dek'ati nanga rai. Efu wi leisi a brifi disi bun, dan wi e si tak' Paulus e taki fu sani di de tapu en ati, sani di de prenspari. A e taki fu wan gesontu leri, wan tranga bribi, fu hori doro èn tak' yu mus de fu fertrow.
San de ini a buku disi:
A bigin fu a brifi (1:1-2)
Hori doro te sma e pina yu (1:3 – 2:13)
San fu du nanga kruktu leriman (2:14 – 3:9)
A eksempre fu Paulus (3:10 – 4:8)
A kba fu a brifi (4:9-22)
1
Odi
Gi Timoteus,
Disi na wan brifi fu Paulus. A ben de a wani fu Gado fu poti mi leki wan boskopuman fu Kristus Yesus, fu go ferteri tra sma fu a pramisi fu a libi di de na ini Kristus Yesus. Timoteus, mi lobi yu leki yu na mi eigi pikin. Mi e winsi tak' Gado a P'pa, nanga Kristus Yesus wi Masra, sa sori yu bun-ati, sari-ati nanga freide. * Bosk 16:1
A no mus syen gi a Bun Nyunsu
Mi e taki Gado tangi, di mi e dini nanga wan krin konsensi neleki den afo fu mi. Dei nanga neti te mi e begi, mi e taki Gado tangi ala leisi te mi e prakseri yu. Te mi e prakseri fa yu ben krei, dan mi e angri fu si yu, fu mi ati sa furu nanga prisiri. Sosrefi mi e prakseri a trutru bribi fu yu. Na so yu granm'ma Lowis nanga yu m'ma Enika ben bribi tu. Èn mi sabi tak' yu abi a srefi bribi neleki den. * Bosk 16:1 Di mi ben poti anu na yu tapu, Gado gi yu wan presenti. Dat'ede mi wani memre yu fu tan wroko nanga en. Bika a Yeye di Gado gi wi no e meki tak' wi e fredefrede. Ma A e meki tak' wi abi krakti, lobi, èn tak' wi kan basi wisrefi.
Dat' meki yu no mus syen fu ferteri tra sma fu wi Masra. Sosrefi yu no mus syen gi mi di de na strafu fu Masra ede. Ma nanga a krakti fu Gado, yu srefi mus teki pina tu fu a Bun Nyunsu ede. Gado ferlusu wi èn A kari wi fu libi wan santa libi. A no den sani san wi du meki A du dati. Ma A ben besroiti fu du en fu sori wi En bun-ati. Langaten fosi A ben meki grontapu, A ben sori wi a bun-ati disi ini Kristus Yesus. 10 A sani disi kon na krin gi wi di Kristus Yesus, wi Ferlusuman, kon. A broko a makti fu dede, èn nanga a Bun Nyunsu A sori wi a pasi fu kisi a libi pe dede no de. 11 Na fu a Bun Nyunsu disi Gado poti mi leki preikiman, boskopuman nanga leriman. * 1Tim 2:7 12 Fu di mi e du a wroko dati, mi e nyan den pina disi. Ma mi no e syen fu dati, bika mi sabi na ini suma mi e bribi. Èn mi sabi krinkrin tak' A abi a makti fu kibri a sani san A gi mi, te leki a bigi dei doro.* Un kan puru a pisi disi so tu: “A abi a makti fu kibri a sani san mi gi En te leki a bigi dei doro.” 13 Yu mus teki a bun boskopu san yu ben yere fu mi leki a eksempre fu yu libi. Du dati nanga a bribi nanga a lobi di wi abi ini Kristus Yesus. 14 Nanga yepi fu a Santa Yeye di e libi ini wi, yu mus sorgu tak' a bun leri san yu ben kisi no kenki.
15 Leki fa yu sabi, ala den bribisma fu Asia drai baka gi mi. Figelus nanga Hermogenes na tu fu den. 16 Ma mi e begi tak' Masra sa sori En sari-ati na Onesiforus nanga den sma fu en oso. Bika furu leisi a meki mi prisiri. A no ben syen gi mi tak' mi de na strafu. 17 Bika di a doro na Roma, a waka suku mi te leki a feni mi. 18 Mi e begi gi en tak' Masra sa sori en sari-ati tapu a bigi dei. Yu srefi sabi heri bun fa a ben yepi mi nanga furu sani di mi ben de na Efese.

*1:2 Bosk 16:1

*1:5 Bosk 16:1

*1:11 1Tim 2:7

*1:12 Un kan puru a pisi disi so tu: “A abi a makti fu kibri a sani san mi gi En te leki a bigi dei doro.”