A Bun Nyunsu soleki fa
Markus
skrifi en
Wan wortu na fesi
A skrifiman Markus poti en prakseri moro tranga na tapu den sma di no de Dyu, di teki bribi ini Masra Yesus. Ma sonleisi a e taki tu fu den gwenti fu den Dyusma (Mrk 7:3). A pruberi fu skrifi a tori soleki fa den sani psa, baka makandra, funamku fa Yesus waka kmoto fu Galilea go na Yerusalem. Fosi Yesus no ben wani fu sma sabi tak' na En na a Mesias. Ma Markus wani sori wi spesrutu tak' Yesus na a moro trangawan. Nanga En wortu, ma moro furu nanga den wroko fu En, a broko a makti fu didibri (Mrk 3:7-20).
San de ini a buku disi:
A bigin fu a Bun Nyunsu (1:1-13)
A wroko fu Yesus ini Galilea (1:14 – 9:50)
Yesus e go na Yerusalem (10:1-52)
A laste wiki (11:1 – 15:47)
Yesus opo baka na dede (16:1-20)
1
Yohanes a Dopuman
Mateus 3:1-12; Lukas 3:1-18; Yohanes 1:19-28
Disi na a Bun Nyunsu fu Yesus Kristus, a Manpikin fu Gado. A bigin soleki fa a profeiti Yesaya ben skrifi taki:
Yere, Mi e seni Mi boskopuman
go na Yu fesi,
di sa meki a pasi klari gi Yu. * Mal 3:1
Wan sma e bari wroko
ini a dreisabana taki:
Meki pasi klari gi Masra,
puru ala boktuboktu gi En. * Jes 40:3
A boskopuman disi ben de Yohanes a Dopuman. A ben de ini a dreisabana e bari a boskopu tak' den sma mus drai den libi èn teki dopu. Na sowan fasi Gado bo gi den pardon fu den sondu. Sma ben kmopo fu ala sei fu Yudea nanga Yerusalem kon na Yohanes. Dan a dopu den ini a Yordanliba te den ben taki sortu sondu den du. Yohanes ben e weri krosi san ben meki fu kameel-wiwiri, èn a ben e tai wan leribuba na en bere. A ben e nyan sprenka nanga bus'oni. * 2Kon 1:8 A taigi den sma taki: “Baka mi a Wan di abi makti moro mi, e kon. Mi no warti srefi fu bukundu lusu En susu puru na En futu. Mi ben dopu unu nanga watra, ma En o dopu unu nanga a Santa Yeye.”
A dopu fu Yesus
Mateus 3:13–4:11; Lukas 3:21-22; 4:1-13; Yohanes 1:32-34
Na a ten dati Yesus kmopo fu Nasaret ini a distrikti Galilea, go na Yohanes. Dan A meki Yohanes dopu En ini a Yordanliba. 10 A srefi momenti di Yesus kmopo ini a watra, A si fa heimel opo èn fa a Santa Yeye e saka leki wan doifi kon na En tapu. 11 Ne wan sten kmopo fu heimel taki: “Yu na Mi Manpikin di Mi lobi. Mi abi prisiri nanga Yu.” * Gen 22:2; Ps 2:7; Jes 42:1; Mat 3:17; 12:18; Mrk 9:7; Luk 3:22; 9:35
12 Dan wantron a Santa Yeye seni Yesus go na ini a dreisabana. 13 Fotenti dei langa Satan ben tesi En ini a dreisabana. Drape A tan na mindri den bus'meti, èn den engel ben sorgu gi En.
Den fosi man di bigin teki leri fu Yesus
Mateus 4:18-22; Lukas 4:14-15; 5:1-11
14 Baka di den kisi Yohanes poti na ini straf'oso, Yesus go na Galilea fu tyari a Bun Nyunsu fu Gado. 15 A taki: “A ten doro kba. Her'esi Gado o bigin tiri libisma. Un drai un libi èn bribi a Bun Nyunsu.” * Mat 3:2
16 Di Yesus ben e waka na a syoro fu a Meer fu Galilea, A si Simon nanga en brada Andreas e fisi nanga den tyasneti. Den man disi ben de fis'man. 17 Yesus taigi den taki: “Un kon waka nanga Mi, dan Mi o meki un tron fis'man fu libisma.” 18 Wantron den poti den tyasneti na wan sei, èn den bigin waka na Yesus baka.
19 Di Yesus waka go pikinso moro fara, A si Yakobus nanga Yohanes, den tu manpikin fu Sebedeus. Den ben de ini den boto e lapu den tyasneti fu den. 20 Fa Yesus si den, A kari den kon. Dan den libi den p'pa Sebedeus nanga den wrokoman fu en ini a boto, èn den bigin waka na Yesus baka.
Yesus puru wan takruyeye na wan man tapu
Lukas 4:31-37
21 Dan Yesus nanga den man fu En go na Kafarnaum. Tapu a sabadei, Yesus go wantron na ini a Dyukerki dan A bigin gi den sma leri. 22 Den sma no ben sabi san fu taki fu a leri fu En. Bika A no ben gi leri leki fa den sabiman fu Gado wèt ben e du, ma A ben du en leki a sma di kon nanga a leri. * Mat 7:28-29
23 A srefi momenti dati wan man ben de ini a kerki di ben abi wan takruyeye na en tapu. 24 A bari taki: “Yesus fu Nasaret, san Yu wani nanga unu? Na kon Yu kon fu puru un na pasi? Mi sabi suma na Yu. Yu na a Santa Wan fu Gado.”
25 Ma Yesus bari en taki: “Tapu yu mofo èn kmopo na a man tapu!”
26 Ne a takruyeye naki a man stoipi, èn nanga bigi babari a kmopo tapu a man. 27 Ala den sma ben ferwondru. A wan ben aksi a trawan taki: “San na a sani disi? Na wan nyun leri nanga makti! A e taigi den takruyeye san den mus du, èn den e du san A taki.” 28 Wantron a nyunsu fu san Yesus du, panya ini a heri kontren fu Galilea.
Yesus dresi furu sikisma
Mateus 8:14-17; Lukas 4:38-41
29 Di Yesus kmopo ini a Dyukerki, A go langalanga na a oso fu Simon nanga Andreas. Yakobus nanga Yohanes go nanga En tu. 30 Now a m'ma fu a frow fu Simon ben didon nanga korsu. Fa Yesus doro, den sma taigi En taki a frow e siki. 31 Yesus go na a frow, A hori en na en anu èn A meki a opo tnapu. Ne a korsu saka, dan a frow poti nyanyan nanga dringi gi den.
32 Mofoneti di a son saka, den sma tyari ala den sma di ben siki, noso di ben abi takruyeye na den tapu, kon na Yesus. 33 Ala den sma fu a foto ben kon tnapu na mofodoro fu a oso. 34 Dan Yesus dresi furu sma di ben abi ala sortu siki, èn A puru furu takruyeye tapu sma. Ma A no ben gi den takruyeye primisi fu taki, bika den ben sabi suma na En.
Yesus tyari a Bun Nyunsu gi den sma fu Galilea
Lukas 4:42-44
35 Musudei mamanten Yesus opo dan A go na wan presi dorosei fu a foto pe sma no e libi. A go begi drape. 36 Ma Simon nanga den mati fu en, go suku pe Yesus de. 37 Di den feni En, den taki: “Ala sma e suku Yu.”
38 Ma Yesus taigi den taki: “Kon meki un go na den tra presi ini a birti dya, fu Mi kan preiki drape tu. Bika na fu dati ede Mi kon.” 39 Na so Yesus waka ini heri Galilea e preiki ini den Dyukerki èn A ben puru takruyeye tapu den sma. * Mat 4:23; 9:35
Yesus dresi wan gwasiman
Mateus 8:1-4; Lukas 5:12-16
40 Wan dei wan gwasiman kon na Yesus. A saka go tapu en kindi, dan a begi En taki: “Masra, efu Yu wani, Yu kan meki mi skin kon bun baka.”
41 Yesus firi sari-ati gi a man. A langa En anu fasi a man, dan A taigi en taki: “Iya, Mi wani! Kon betre!” 42 A srefi momenti dati a man kon betre, èn en skin kon bun baka.
43-44 Yesus seni a man gwe wante, ma A warskow en taki: “Sorgu tak' yu no e ferteri no wan sma san psa nanga yu. Ma yu mus go na a Dyudomri, meki a si tak' yu kon betre. Dan fu sori ala sma tak' yu kon betre, yu mus tyari a offer gi Gado leki fa Moses skrifi tak' yu mus du te yu kon betre fu gwasi.” * Lev 14:1-32
45 Ma di a man gwe, a bigin ferteri na ala sei san ben psa nanga en. Dat' meki Yesus no ben man go moro ini wan foto fu sma si En. So A ben tan dorosei fu den foto, na presi pe sma no e libi. Ma toku sma ben kon na En fu ala sei.

*1:2 Mal 3:1

*1:3 Jes 40:3

*1:6 2Kon 1:8

*1:11 Gen 22:2; Ps 2:7; Jes 42:1; Mat 3:17; 12:18; Mrk 9:7; Luk 3:22; 9:35

*1:15 Mat 3:2

*1:22 Mat 7:28-29

*1:39 Mat 4:23; 9:35

*1:43-44 Lev 14:1-32