Ala xa masenyi Annabi Naxumu bɛ
Masenyi nde yi Kitaabui xa fe ra
Asiriya xa mangɛya nu bara sɛnbɛ sɔtɔ ɲɛ kɛmɛ solomasaxan beenu Annabi Isa xa bari Isirayila bɔxi ma tɛmui naxɛ. Na waxati ɲamanɛ birin nu na a xa yaamari xɔrɔxɔɛ bun ma. Ninewe nu findixi a xa mangataa nan na. Asiriyakae mu nu birama Alatala xa sɛriyɛ fɔxɔ ra fefe ma.
Na kui Annabi Naxumu Isirayilaka naxa yi masenyi ti e xa fe ra. Masenyi na a ra naxan xɔrɔxɔ, barima e xa fe mu nu rafanxi Ala ma. Annabi Naxumu to gɛ Ala xa sɛnbɛ magaaxuxi masende Asiriyakae bɛ, a naxa a fala e bɛ e fama gbaloe ɲaaxi sɔtɔde e xa yunubie xa fe ra. Na kiiti nu fatanxi Ala nan na. Ala naxa Babilɔnkae xɛɛ Ninewe kanade ɲɛ kɛmɛ senni beenu Annabi Isa xa waxati.
Na masenyi nu xɔrɔxɔ Asiriyakae bɛ, kɔnɔ a nu findixi fe fanyi nan na Isirayilakae bɛ, naxee nu tɔɔrɔma e yaxuie xa yaamari bun ma. Annabi Naxumu naxa a masen e bɛ a yunubitɔɛe fama e xa kobiɲa sare sɔtɔde Alatala yi ra. Ala xa kiiti xɔrɔxɔɛ Asiriyakae bɛ, a nu limaniya fima Isirayilakae ma.
Hali to, Ala xa ɲama nɔma sɛɛwade na xa fe ra. E xa a kolon Alatala fama mixi ɲaaxie makiitide, a fa e sare ragbilen e ma. Won birin a kolon tinxinyi fan, kɔnɔ a nɔma lude won bɛ alɔ tinxintareya na sɔɔnɛyafe yi duniɲa kui, barima fe ɲaaxi gbo, tinxintɔɛe fan na tɔɔrɔfe. Yi kitaabui a masenma won bɛ tinxintare mu geenima, Alatala xa tinxinyi nan mixi geenima duniɲa bɛndɛ fuɲi fari nun aligiyama. Ala xa mixi birin makiiti a xa sɛriyɛ ra. Amina.
Ala xa masenyi Annabi Naxumu bɛ
1
Ala xa xɔnɛ Ninewe xili ma
1 Masenyi xɔrɔxɔɛ nan ya Ninewe xa fe ra, Ala naxan masen Annabi Naxumu Elekosika bɛ.
Alatala magaaxu, a gbeɲɔxɔfe mu kanama.
2 Alatala a gbeɲɔxɔma nɛ,
a xa xɔnɛ sɛnbɛ gbo a yaxuie mabiri,
a mu diɲɛma e ma mafuren mafuren.
3 Kɔnɔ Alatala mu xɔnɔma mafuren mafuren,
a sɛnbɛ gbo han.
Alatala mixi ɲaaxi sare ragbilenma nɛ fe ɲaaxi rabae ma.
A xa ɲɛrɛ luma nɛ alɔ turunnaadɛ naxan xube ratema,
a tixi nuxuie fari.
4 A na xaaɲɛ baa ma, a xɔrima nɛ,
a xure birin naxara,
a Basan nun Karemele findi gbengberenyi ra,
a Liban sansie lisima nɛ.
5 A geyae rasɛrɛnma nɛ, e xunu alɔ kumi ture.
Bɔxi sɛrɛnma nɛ a ya i, duniɲa mixie bɔɲɛ minima nɛ.
6 Nde nɔma tide a xa xɔnɛ ya ra?
Nde nɔma tide a xa bɔɲɛte ya i?
A xa xɔnɛ luma nɛ alɔ tɛ, naxan gɛmɛe bulama.
7 Alatala fan, a kantari fima nɛ tɔɔrɔmixie ma,
a mɛɛnima nɛ mixie ma naxee e yɛtɛ taxuma a ra.
8 Kɔnɔ a Ninewe xun nakanama nɛ,
a a yaxuie kerima dimi nan kui.
9 Ninewe, wo fɛɛrɛ mundun fenfe Alatala xili ma?
A tan nan sɔntɔɛ tima kerenyi ra.
10 E fama nɛ lude alɔ e kankanxi tunbe kunsie nan na,
alɔ e siisixi beere nan na,
alɔ sɛxɛ xaraxi naxan ganxi feo.
11 Nineweka nde bara fe ɲaaxi raba Alatala ra,
a mixie rasixi fe kobi nan ma.
12 Ala xa masenyi nan ya e xa fe ra:
«Hali wo yaxuie wuya, e xun fama nɛ rakanade, e ɲɔn.
N bara wo tan Yudayakae tɔɔrɔ,
kɔnɔ n mu na rabama sɔnɔn.
13 Yakɔsi n wo bama nɛ wo yaxuie xa nɔɛ bun ma,
n luutie bolon wo xirixi naxee ra.»
14 Alatala xa masenyi nan ya wo tan Ninewekae xa fe ra:
«Wo bɔnsɔɛ fama nɛ ɲɔnde.
N wo xa kuye masolixie nun wo xa kuye naxee yailanxi wure ra,
naxee na wo xa alae xa banxie kui, n nee birin kanama nɛ.
N wo sɔntɔma nɛ, barima wo ɲaaxu.»