Leta Famu
Pol i siit u usuf
Fan Tesalonika
Orek Famu
Aunbiing Pol i kiis tah na Korin, ke ka siit ta u e leta igii, leta famu i siit u usuf foron tom unune na Tesalonika.
Tesalonika i e nenge tara maleh na falifuh na Mesedonia. Na fatuul u e ninla ke Pol una Tesalonika, ke ka fafas usuf ri, par Aposel 17:1-14. Fale fanu ae ri sokiliis ta liu kiri, ri fan Iudaia, isau le fal e fanu tina fal e maleh keskes. Foron famfamu ken fan Iudaia na Tesalonika ri ka balkut aunbiing ri par u aragii le fal e fanu kiri ri ka unune mang lo Iesu, pesu ri ka fes ufu Pol tina maleh kiri. Ke Pol ka la una Beroia. Namih ka wuun ufu Timoti usuf ri ke Timoti ka fas Pol ini ri.
Na leta igii, Pol i fot rokap usuf God wara le fan Tesalonika ri tifat na unune kiri aunbiing ri tafe foron tatawin, ke ri ier sabin isi Pol. Pol i ier sabin isi farakrakai unune kiri na leta igii, ke ka kiliis fagalte kiri isi foron minet.
1 Tesalonika i aragii:
1:1 Tanwara
1:2-10 Pol i laes ini ri
2:1-3:13 Foim ke Pol na Tesalonika
4:1-12 Matngan liu ae God i ier isi
4:13-5:11 Paipai fis ke Kumguui
5:12-28 Farfarop na orek ke Pol usuf ri
1
1 Iau Pol, Sailas ke Timoti, kemtuul sisiit usuf gam foron tom unune na maleh na Tesalonika, gam fanseh gam unune lo God Tama kerer ke Kumguui Iesu Karisito.
Famais turan siaroh ke God usuf gam.
Liu ke Unune ken Fan Tesalonika
2 Kemtuul fot rokap la usuf God isi gam tikii. Ke kemtuul ka wol pes gam la na foron sising kimemtuul usuf God. 3 Aunbiing kemtuul sising la usuf God Tama kerer, kemtuul wol pes foron tier ae gam tel u la, wara na unune kimi, ke kemtuul wol pes foron foim ae gam tel u la, wara na famais kimi. Ke kemtuul ka wol pes tifat kimi sabin, wara le gam nene ini unune kimi usuf Kumguui kirer Iesu Karisito.
4 Foron tualik kemtuul, ae God i ier kanaka tah isi gam. Kemtuul usum le God i tus pes ta gam. 5 Wara na Rokap na Fafas ae kemtuul fas ta gam ini, biil e orek foes sau, biil. I la turim tom turan rakrakai ke turan Tanwa Kalkaluu, ma gam ka par failiim tara na unune kimemtuul. Gam usum rokap tom na sinangu kemtuul aunbiing kemtuul kiis tah na fatpoto gam, isi una rokap kimi. 6 Gam ka mi tah na sinangu kemtuul ke na sinangu Kumguui. Taftawa le fanu ri falaulau gam, isau le gam posefat tom na foron orek turan laes ae Tanwa Kalkaluu i ta ta u usuf gam. 7 Pesu gam ka finngas rokap na sinang tah usuf foron tom unune tikii na iun falifuh na Masedonia ke na Akaia. 8 Foron orek ke Kumguui ae gam fafas tah ini ka la sararah tah arae kinen nenge gamtih ae i ninih una tapak. Biil na Masedonia ke na Akaia sau, biil. Foron maleh tikii ri ka usum tah na unune kimi usuf God, pesu sanih sabin kemtuul en use u. 9 Wara le ri tom, ri use famalal foron sinangu gam, aunbiing gam somangat pes ta kemtuul. Ke ri use u sabin le gam ka la koseng ta foron god famfabal, ke gam ka ta liu kimi mang sing God tekentu ae i liu, ma igii gam ka foim mang sing i. 10 Ke gam ka nene ke Kalalik ae in puh tinbae na Kukulii, ae God i faptih fafis ta u tina minet. I e Iesu ae i faliu pes ta kerer tina ngaliaf ke God ae in tapiek.