Fawu u e leta
Pol i siit u usuf
fan Tesalonika
Orek famu
Aunbiing Pol i kiis ta na Korin, i siit ta u e leta igii usuf fan Tesalonika.
I ongen ta u le fal e fanu lo ri i mel iwu e wolwol kiri kunan paipai fis ke Iesu. Fal lo ri, ri tara le Iesu ka fis tah isau le fal ri ka tara le biil. Na buk igii, Pol i famalal ri ini paipai fis ke Iesu, ma ka fas ri le tom lek nagogon in tapiek famu ma in lame fager in fuun e fanu. Namih lo, Iesu ik fis sabin ma ik nagogon foron tom tel sinang laulau. Pol i fas ri sabin le gong ri tapiek foron tom angos, rin rakrakai tom na tel foron rokap na sinang.
Fawu e Buk ke Pol usuf fan Tesalonika i aragii:
1:1-2 Ororek malal na foron tier na palgan buk
1:3-12 God in nagogon fanu
2:1-17 Taptapiek ken tom lek nagogon ma namih Iesu Iesu in fis sabin
3:1-15 Rin tel foron rokap na foim ma gong ri angos
3:16-18 Farfarop na orek ke Pol usuf fan Tesalonika
1
1 Iau Pol, Sailas ke Timoti, kemtuul sisiit usuf gam foron tom unune na Tesalonika, gam fanseh ae gam unune lo God Tama kerer ke Kumguui, Iesu Karisito.
2 Famais ke siaroh usuf gam sing God Tama kerer ke Kumguui Iesu Karisito.
God in Ta Fangungut na Nagogon usuf Fanu
3 Foron tualik kemtuul, i rokap le kemtuul en fot rokap la usuf God isi gam. I tortores le kemtuul en tel u arae, wara le unune kimi i kuum lalala, ke famais kimi usuf temtem tikii lo gam sabin i kuum lalala. 4 Ma i e wara ke kemtuul ka ususefages gam la usuf foron tom unune na fal e maleh. Kemtuul usefages gam la na unune kimi, ke na tifat kimi na palgan foron tatawin ae gam kalsakai ta u, ke foron fangungut ae fanu ri ta u sing gam.
5 Tifat kimi na tatawin i famalal u le, nagogon ke God i tortores. Gam kalsakai fangungut, wara le gam fakuum matanfuntih kia. Arae God i tawi pes ta gam arae foron tom tortores una matanfuntih kia. 6 God i tortores ma in ta fangungut usuf fanseh ae ri ta fangungut usuf gam. 7 Ke in famangeh gam, ae gam kalsakai fangungut ma in tel u sabin arae lo kemtuul. God in tel u arae, aunbiing Kumguui Iesu in puh tinbae na Kukulii ini tara na karfian yiif, ke turan foron rakrakai na angelo kia. 8 In ta fangungut arae fifiil una foron sinang laulau ken fanseh ae biil ri usum lo God, ke seh ae biil i misuut na Rokap na Fafas ke kirer Kumguui, Iesu. 9 Fanu ae rin kalsakai fangungut ae biil in to farfarop, i e fiu fitliu, ma rin kiis tapak koseng Kumguui ma ini memeh na rakrakai kia. 10 Nagogon ae in tapiek na biing ae, aunbiing Kumguui in fis, isi fanu kalkaluu kia rik me u, ke fanseh ae ri unune lo, rin usefages u. Gam sabin tura ri, wara le gam unune tah na foron orek ae kemtuul fas ta gam ini.
11 I e wara, ae kemtuul ka sising la isi gam. Kemtuul sising la usuf God kirer le in foteng gam le gam tortores isi gamek mi na matngan liu ae i tawi pes ta gam isi. Ke na rakrakai kia, in lupes gam, isi gamek tel fasuut foron rokap na foim ae gam ier isi tel u, ke foron sinang tikii ae unune kimi i fatapiek u la. 12 Kemtuul sising arae, isi asa Iesu Kumguui kirer ik kep memeh, wara lo gam. God sabin in ta memeh usuf gam. Foron tier tikii igii i tapiek, wara na famais ke God kirer ke Kumguui, Iesu Karisito.