Rokap na Fafas
ulo Iesu Karisito
Jon
i siit u
Orek famu
Jon i e neng lon nenge sangful ini u e kalalik na fafausum ke Iesu (par Metiu 4:21). I par foron tier ae Iesu i tel ta u ma ka ongen foron fafausum kia. I siit buk igii namih na ituul e buk ke Metiu, Mak ke Luk. I ier le keren usum lo Iesu, ke kerek unune lo, wara le lo Iesu sau ke kerek kep liu fitliu (par Jon 20:31).
Nenge tier laumet ae Jon i ier le in fas kerer ini, i aragii: Iesu i e Kalalik ke God, ma i tom e God. Na tanwaran buk igii, i famalal u le Iesu i e God ma tina tanwaran fakfakiis, ka kiis tah tura God. I fas kerer sabin ini foron rakrakai na fakileng ae Iesu i fatapiek ta u. Jon ka foteng u ini foron ‘fakileng’, wara le ri fatekentu u le Iesu i e God.
Jon i fas kerer sabin le fanu fuun biil ri unune lo Iesu. Foron famfamu ken fan Iudaia sabin biil ri unune.
Buk ke Jon i aragii:
1:1-18 Orek ka tapiek kaltu
1:19-51 Jon Tom tel Bapitaiso ke berberat na fafausum ke Iesu
2:1-12:50 Foim ke Iesu usuf fanu
13:1-19:42 Farfarop na wik turan minet ke Iesu
20:1-31 Apaptih fis ke Iesu
21:1-25 Iesu i tapiek sing berberat na fafausum kia na Galili
1
Iesu tom i e Orek
1 Tina tanwaran fakfakiis, orek ka kiis tah ma orek ka kiis tah tura God, ma orek tom e God. 2 I kiis tah tura God tina tanwara.
3 Na orek tom, God ka fakiis foron tier tikii, biil ti tier God i fakiis ta u na nenge sal keskes. Biil, na orek tom. 4 Sing i tom e liu, ma liu ae i e malal ken fanu. 5 Ma malal ka popos una kubunor, isau le kubunor biil i to usum lo.
6 Nenge kaltu asa e Jon, God i wuun ufu tah. 7 I la arae tom fafas isi famalal fanu ini malal, isi fanu tikii rik unune. 8 I tom biil e malal, i la sau isi fafas ini malal. 9 Tekentu na malal ae i ta malal la usuf fanu tikii, ik tapiek mang aga na piklinbat.
10 I kiis tah na piklinbat, ma piklinbat i tapiek sing i tom. Isau le fanu na piklinbat biil ri iliim u. 11 I la tah una maleh kia tom, isau le fanu kia tom biil ri ier isi. 12 Isau le fanu tikii ae ri ka kep ta u ma ri ka unune tah na asa, ka somangat pes ta ri isi rin tapiek berberat ke God. 13 Biil ri tapiek berberat ke God wara ri pang namin mat le namin wolwol ken kaltu le na sinangun fakekel, biil. God tom i fatapiek ri arae berberat kia.
14 Orek ka tapiek kaltu, ma ka liu na fatpoto kemem. Kemem ka par ta u e memeh kia, i e memeh ke itikii sau e Kalalik ke God ae fuun ini famais ke tekentu.
15 Jon i orek malal ini. I tautau ma ka tara aragii, “Igii mang e kaltu ae ia use ta u le, i mih pes iau, isau le i laumet lo iau, wara le i liu famu ta tom lo iau.” 16 I fuun ini famais, ma tina famais kia, kerer tikii kere ka kep fafakalok fafamih. 17 Moses i la ta ini nagogon usuf kerer, isau le Iesu Karisito i la ini famais ke tekentu usuf kerer. 18 Biil biitom tikas i par ta God, isau le Kalalik tutus sau kia, ae i kiis na baba Tama, ka par ta u ma ka famalal ta u usuf fanu.
Jon Tom tel Bapitaiso i Famalal fafis u tom
(Mt 3:1-12; Mk 1:1-8; Lk 3:1-18)
19 Jon i orek malal, aunbiing foron famfamu ken fan Iudaia tina Ierusalem ri wuun fal e pris ke foron Liwai* Liwai i neng lon nenge sangful ini u e mat tina Israel. Foron Liwai ri foim la na Felun Sising. isi rin diik u le, “Wo seh?” 20 Jon biil i fun ti orek una kiliis ri. I use famalal u tom le, “Ia biil e Mesaia.”
21 Pesu ri ka diik u le, “Wo seh, wo Elaisa?”
Ka kiliis ri le, “Ia biil e Elaisa.”
Ke ri ka diik u sabin le, “Kol wo mang e poropet ae Buk na Gogoh i fafas ta ini?† Par Lo 18:15.”
Ka kiliis ri aragii, “Ia biil.”
22 Namih ri ka diik u tala aragii, “Wo seh? On fas kemem ini ti orek isi kemek kep fafis u usuf fanu ae ri wuun ta kemem. O tara le wo e seh tom?”
23 Ke Jon i kiliis ri ini orek ae na buk ke Poropet Aisaia le, “Ia kinen nenge kaltu i tautau na falifuh foes aragii, ‘Fatortores sal sala Kumguui.’ ”
Aisaia 40:3
24 Foron Farasi ae ri wuun ta ri usuf Jon, 25 ri ka galte u aragii, “Le biil wo e Mesaia, le wo Elaisa, le poropet, isi sah o ka baptais fanu?”
26 Jon ka kiliis ri aragii, “Ia baptais fanu ini dan, isau le awii na fatpoto gam e kaltu ae biil gam usum lo. 27 I mang e ier ae in la sau na ming, i kalkaluu, pesu biil i fasih ian tel ufu su tina keke, wara le biil ia kalkaluu.”
28 Foron tier tikii igii i tapiek na Beteni‡ Iwu e maleh asruh e Betani. Neng fatat Ierusalem, maleh ke Lasarus, ma neng na nenge bulin dan na Ioridan na nenge baban dan na Ioridan na falifuh ae Jon i tel bapitaiso lo.
Iesu tom e Natun Sipsip ke God
29 Na biing namih, Jon ka par Iesu i la usuf i ke ka tara aragii, “Gam par u! Apiek e natun sipsip ke God ae in tel ufu sinang laulau ken fanu tikii na piklinbat. 30 Igii mang e ier ae ia use ta u le, ‘I mih pes iau, isau le i laumet lo iau, wara le i liu famu ta tom lo iau.’ 31 Iau tom biil ia usum ta le i e seh, isau le wara ia ka baptais fanu ini dan, isi iak famalal u usuf fan Israel tikii.”
32 Ke Jon ka ta orek an famalal kia aragii, “Ia par Tanwa Kalkaluu i filau puh arae bun tinbae na kukulii ma ka kiis lo. 33 Biil i fasih le ian usum ta lo, isau le, God tom ae i wuun ufu ta iau isi baptais fanu ini dan, i fas ta iau le, ‘Kaltu sah on par Tanwa Kalkaluu in filau puh ma ka kiis lo, i sau e ier ae in baptais fanu ini Tanwa Kalkaluu.’ 34 Ia ka par ta u ke ia ka famalal u le, i e Kalalik ke God.”
Foron Berberat na Fafausum Famu ke Iesu
35 Na biing namih Jon ka fis sabin turan iu e kalalik na fafausum kia. 36 Aunbiing Jon ka par Iesu i liu ufu rituul, ke ka tara aragii, “Kamu par u! Ae kol e Natun Sipsip ke God.”
37 Aunbiing iun kalalik na fafausum ae ru ongen Jon i use ta u arae, ru aptih sau ke ru ka mi lo Iesu. 38 Iesu ka giliim fis ma ka par ru mimih la lo, ke ka diik ruh aragii, “Sanih kamu ier isi?”
Ke ru ka kiliis u aragii, “Rabi, fia o kiis la wah?” (Rabi, le tom fafausum.)
39 Iesu ka kiliis ruh aragii, “Kamu la, isi kamuk par u.” Ru ka la ma ru ka par falifuh ae Iesu i kiis la wah. Rituul ka tapiek na ifet e aunbiing, ma ru ka melmel tura papang na aunbiing ka sup e pisiih.
40 Enru, tualik e Saimon Pita, i e neng lo ruh ae ru ongen tah Jon i use u arae, ma ru ka mi lo Iesu. 41 Tier famu ae Enru i tel u, i im isi Saimon Pita, tualik ma ka fas u le, “Kama ka tafe ta Mesaia.” (Mesaia i e Karisito.) 42 Ma ka lame u usuf Iesu. Ke Iesu ka par usuf i ma ka tarah, “Asam e Saimon, kalalik ke Jon. Rin foteng wo ini Sipas.” Na orek Grik, ri foteng u ini Pita, kamtinan orek ae le fat.
Iesu i Tawi Nataniel ru e Pilip
43 Na biing namih, Iesu ka ier isi la una Galili. Ka tafe Pilip ma ka fas u le, “Mi lo iau.”
44 Pilip i tina maleh na Betsaida na maleh sau ke Enru ru e Pita. 45 Pilip ka tafe Nataniel ma ka fas u le, “Keme ka tafe ta kaltu ae na Buk na Nagogon, Moses i use ta u le in tapiek ma foron poropet sabin ri ororek famu tah isi. I e Iesu tina Nasaret kalalik ke Iosep.”
46 Nataniel ka diik u aragii, “Tina Nasaret! Biil i fasih le ti tier rokap in tapiek tina Nasaret.”
Pilip ka kiliis u aragii, “La ugapiek, isi ok par u.”
47 Aunbiing Iesu ka par Nataniel i la isi tafe u, ka fas fanu aiwa tura le, “Igii mang kol e kaltu tekentu tina Israel ae biil ti famfabal sing i.”
48 Nataniel ka diik Iesu aragii, “O usum lo iau arafah?” Ke Iesu ka kiliis u aragii, “Ia par ta wo tom awii na piklin au na fik, aunbiing Pilip biil biitom i tawi pes o.”
49 Nataniel i ongen u arae, ke ka tarah, “Rabi! Wo Kalalik ke God, ma wo King ken fan Israel.”
50 Iesu ka tarah, “Arafah, o unune sau wara ia fas o le ia par o kiis tah awii na piklin au na fik? Namih on par in fuun biitom e tier laumet, in laumet na neng igii o ka par ta u.” 51 Ke Iesu ka fas ri sabin aragii, “Tekentu kanaka, ia fas gam, gamen par kukulii in sapeng, ma foron angelo ke God rin fen ke rik puh na Kalalik ken Kaltu.”