1 Iesu turan berberat na fafausum kia ri ka la tinaiwa, ma ri ka tapiek na maleh tutus kia. 2 Ma na Biingen Mangeh, ka tipes fausum fanu na felun lotu ma fanu fuun ae ri ongen u ri ka lala bitit, ke ri ka tara aragii, “Kaltu igii i kep u tinga e foron tier igii? Matngan tasum arafah ri ta ta u sing i, pesu ka fasih in fatapiek foron tier an fabitit igii? 3 I nenge tom tel fel sau. Ma i kalalik ke Maria, nenge tualik e Jems, Iosep, Iudas ke Saimon. Ma foron fenelik, igii sau na aisa kerer.” Pesu biil mang ri laes ini.

4 Iesu ka fas ri aragii, “Nenge poropet ri bulat la lo na fal e maleh keskes, isau le ri tom ae na maleh tutus kia, foron sikinting lo turan fanu sabin ae na fel kia biil ri bulat lo.” 5 Iesu biil mang i fasih le in fatapiek ti foron tier an fabitit aiwa, isau le ka luun lima sau na olon fal e fanu ae ri sasem ma ka faliu ri. 6 Ma ka bitit le biil ri unune lo.

Namih ka la una foron temtem tikii na maleh ma ka famam fausum fanu.

7 Ke ka kam pes sangful ini u e kalalik na fafausum kia, ka ta rakrakai usuf ri una tel ufu foron tanwa laulau, ma ka wuun ufu ri isi rin la tem u tem u.

8 Ma ka fas ri aragii, “Gong gam kep ti tier na ninla kimi, gamen kep ti buk sau una la. Gong gam kep ti inen, gong gam kep ti sara ke gong gam pus kale ti pitkalang na kaen kimi. 9 Gamen la sau ini foron su na kekmi, isau le gong gam kep ti foron kilkiliis kimi.” 10 Iesu ka fas ri sabin aragii, “Aunbiing gam kau na ti fel, gamen kiis tom aiwa papang na aunbiing gamen kang koseng maleh ae. 11 Male fanu tina nenge maleh biil ri somangat pes gam ke biil ri ongen orek kimi, ke aunbiing gam la koseng maleh ae, gamen pakte ufu piyiif tina kekmi, isi ik arae fakileng usuf ri le ri kiis na palgan ngaliaf ke God.”

12 Ke ri ka la ma ri ka fafas usuf fanu isi rin kiliis liu. 13 Ri tel ufu ifuun e tanwa laulau, ke ri ka saba wel lon fanu fuun ae ri sasem, ma ri ka liu.

14 King Erot ka ongen foron ususe lo Iesu, wara le fanu tikii ri ka usum ta lo Iesu. Fal e fanu ri use u le, “I e Jon Tom tel Bapitaiso, ka liu fis tah. Pesu ka fasih le in tel foron rakrakai na fakileng arae.”

15 Fale fanu sabin ri use Iesu le, “I e Elaisa.” Ma fal sabin ri ka tara le, “Iesu i nenge poropet arae foron poropet tin pakanini.”

16 Aunbiing Erot ka ongen foron orek arae lo Iesu, ka tara aragii, “Jon, ia ka bus ufu ta paklu, ka liu fis sabin!”

17-18 Pakanini Erot tom i wuun ta foron tom fapaket isi luse Jon. Ri ka kabet u ma ri ka fakau u na felun kamkabet, wara le Jon i tara sing i le, “Biil i tortores arae o ka telpes Erodias, ae i antu tuamlik.” Jon ka use u aragii, wara le Erot ka dat pes antu Pilip sabin tualik, ma ka telpes u. 19 Erodias i ememse Jon, pesu ka ier le rin siimete u, wara i tiu ruh ini fakekel kiruh. Isau le Erot biil i somangat ini wolwol ke Erodias, 20 wara le Erot i usum le Jon i nenge tom tortores ma i nenge kalkaluu na kaltu, ke ka soke u. Ke ka tikale ri le gong ri siimete u. Aunbiing Erot i ongen foron orek ke Jon la, biil tom i malal la ulo isau le i laes la tom le in ongen u.

21 Isau le na biingen pang ke Erot, Erodias ka wolpes nenge sal una siimete Jon. Erot ka tel nenge tara inen ke ka sising foron famfamu na matanfuntih kia, turan foron famfamu ken foron tom fapaket, ke foron laulaumet ken fan Galili, isi rin ien tura. 22 Aunbiing ri ienien la, nenge tah, i e keleflik ke Erodias, ka kau ma ka guui na matan foron ses tikii. Erot turan foron ses tikii ae ri ien turim, ri ka ram na matngan guui kia.

Pesu king ka fas tah ae aragii, “Sanih on sising iau isi, ke ian ta u sing o.” 23 Ke, ka falimlim usuf i aragii, “Matngan sanih on sising u, ian ta u sing o, taftawa le i laumet kanaka, ma i fasih ini nenge baban matanfuntih kiak, ian ta u.”

24 Tah ae ka suuh ke ka diik tina aragii, “Sanih ian sising u isi?”

Ke tina ka kiliis u aragii, “On sising u isi paklu Jon Tom tel Bapitaiso.”

25 Fanpil, tah ae ka sangar fis usuf king ma ka fas u aragii, “Igii tom on ta paklu Jon Tom tel Bapitaiso usuf iau na olon ti pelet.”

26 Aunbiing king i ongen u arae, ke ka lala purngis e bala, isau le wara na falimlim kia usuf tah ae, ke i wara sabin le foron ses ae ri ien turim, ri ka ongen ta orek ae i use ta u, pesu biil i fasih in ongen ufu sising ken tah ae. 27 Fanpil ka wuun ufu nenge tom fapaket isi kep fafis paklu Jon Tom tel Bapitaiso usuf keleflik ae. Tom fapaket ae ka la una felun kamkabet ke ka bus ufu paklu Jon. 28 Ke ka kep fafis u na nenge pelet. Ka ta u usuf tah ae ke ka ta u usuf tina. 29 Aunbiing berberat na fafausum ke Jon ri ka ongen u, ri ka la ma ri ka kep pununfo ma ri ka fakau u na nenge matanfat una luun minet.

30 Foron aposel ri ka fis ma ri ka tafe Iesu, ke ri ka fas u ini foron tier tikii ae ri tel ta u, ke foron tier ae ri fausum ta fanu ini. 31 Fanu fuun ri famam fafakiliis una aisa ri, pesu Iesu turan berberat na fafausum kia biil ti aunbiing kiri una ien. Iesu ka fas berberat na fafausum aragii, “Gam la, ma kerek la una kiptin biil isi gamek mangeh.”

32 Ke ri ka wof na nenge mon ma ri ka awes una nenge kiptin biil. 33 Isau le fanu fuun ae ri par ta ri sawe, ri iliim Iesu turan berberat na fafausum kia. Ri ka filau tina foron maleh temtem tikii, ke ri ka tapiek famu na falifuh ae Iesu ri, rin masah lo. 34 Aunbiing ri ka masah, Iesu ka par tara gur na fanu, ma ka mais kanaka ri, wara le ri arae foron sipsip ae biil tikas una parpar kale ri. Ke ka tanwaran fausum ri ini i fuun e tier.

35 Ka efef mang, ke berberat na fafausum kia ri ka la usuf i, ma ri ka fas u aragii, “Kumguui, kiptin biil sau igii, ma pisiih sabin fatat mang ik sup. 36 Wuun sarara fanu mang una foron fel ke foron maleh fatat, isi rik fiil ti inen ari.”

37 Isau le ka kiliis ri aragii, “Gam fen ri ini ti inen.”

Ke ri ka fas u aragii, “O ier le kemen la ma kemek fiil ti foron beret ari? In wu tom ngan e mar e denari* Nenge denari i fasih ini fifiil ken nenge tom foim na nenge biing in fasih una fiil inen ari!”

38 Ke Iesu ka diik ri aragii, “Ifis e beret ae sing gam? Gam la ma gamek im.”

Aunbiing ri ka usum tah na ifis e beret, ri ka fas Iesu aragii, “Ilim e beret ma ka u e kok.”

39 Ke Iesu ka fas berberat na fafausum kia le rin fakiis fanu na foron uh na olon foron rokap na fifih ae. 40 Ke ri ka kiis na foron uh, ma na temtem tikii na uh, fal nenge mar e fanu lo, ke fal ilim e sangful e fanu lo. 41 Ke Iesu ka kep ilim e beret ke iwu e kok ae, ka par una kukulii ma ka fotrokap usuf God, ke ka sibik foron beret ae. Namih ka ta u usuf berberat na fafausum kia isi rin tulus fanu ini. Ka tulus ri tikii sabin ini iun kok. 42 Ri tikii ri ka ien ke ri ka mas. 43 Namih berberat na fafausum ri ka siing fafuun nenge sangful ini u e kes ini foron tigan beret turan kok. 44 Wewes lon fanu tamat ae ri ien tah ma ri ka mas, i fasih aragii ilim e arip.

45 Fanpil Iesu ka wuun famu berberat na fafausum kia isi rik wof na mon una Betsaida ae na nenge bulin dan kawil. Ma ka kiis fis isi in wuun sararah fanu ae. 46 Aunbiing fanu ri ka sararah tah, ka tatkau una nenge pungpung isi ik sising.

47 Ma aunbiing ka sup tah e pisiih, berberat na fafausum kia ri ka awes la mang awii na fatpoton dan kawil, ma Iesu keskes mang tinawii biitom na bulin dan. 48 Iesu i par u aragii le i ngangaten kanaka ulon berberat na fafausum kia isi rin awes, wara le kif i kufkufe tina famu lo ri. Ma na piklin ien, Iesu ka la na olon dan kawil usuf ri ma fatat ik liu ufu ri. 49 Isau le aunbiing ri ka par u i la na olon dan, ri ka wol le nenge kinit. Ke ri ka ngangeh, 50 wara le ri tikii ri par u ma ri ka lala sokeh.

Fanpil Iesu ka orek usuf ri aragii, “Gong gam sokeh, iau sau igii. Gam tifat.” 51 Ke ka wof kau unawii na palgan mon tura ri, ma fanpil kif ka met. Ri ka lala bitit, 52 wara le biil ri malal rokap na fakileng ae Iesu i fatapiek ta u na beret ke na kok. Balri i kubunor.

53 Aunbiing ri ka awes paket tah, ri ka masah na Genesaret, ma ri ka kabet mon kiri aiwa. 54 Ma aunbiing sau ae ri puh tina mon, fanu sabin tinaiwa ri ka iliim Iesu. 55 Ke ri ka filau una foron maleh tikii na falifuh ae, ma aunbiing ri ongen u le Iesu ae na nenge maleh fatat, ri ka kep foron sasem ini foron salri una maleh ae. 56 Na birbiron maleh ke na foron piran maleh, ke na foron maleh fatat ae Iesu i la ulo, fanu ri faborong foron sasem na foron salan la turim. Foron sasem ae rik sising Iesu isi rik sigil sun boboh kia, ma ri tikii ae ri sigil u, ri ka liu.