15
Iesu i Sotih na Mata Pailat
(Mt 27:1-2, 11-14; Lk 23:1-5; Jn 18:28-38)
1 Na biingbiing saksak, foron laulaumet na pris, foron famfamu ken fan Iudaia, foron tom fafausum ini nagogon ke foron laulaumet tikii ken fan Iudaia, ri ka kiis turim ke ri ka tapiek ini nenge wolwol. Ri ka kabet Iesu ke ri ka lame ufu usuf Pailat.
2 Pailat ka diik u aragii, “Wo king ken fan Iudaia?”
Iesu ka kiliis u aragii, “Arae tom o use u.”
3 Foron laulaumet na pris ri ka tiu u ini i fuun e tier. 4 Ke Pailat ka diik u sabin aragii, “Biil ti orek kiam una kiliis ri? Ok par u, ri tiu wo ini ifuun e tier.”
5 Isau le Iesu biil i kiliis u ini ti orek, ke Pailat ka bitit.
Ri Somangat ufu Iesu isi rin Fakulkulik u na Aupaket
(Mt 27:15-26; Lk 23:13-25; Jn 18:39—19:16)
6 Na foron bet tikii na tel inen na Liuliu Kulef, Pailat i fasuuh ufu nenge kaltu la tina kamkabet ae fanu ri tim pes u. 7 Na bet ae, nenge kaltu asa e Barabas, i e neng lon fanu ae ri fapaket tah turan matanfuntih tina Rom. Ri kiis tikii na kamkabet, wara le ri siimete ta fal e fanu. 8 Gur na fanu ri ka tapiek sing Pailat, ke ri ka sising u isi in fasuuh tikas ae i kiis na kamkabet, arae tom i tel u la.
9 Ke Pailat ka diik ri aragii, “Gam ier le ian fasuuh ufu King ken fan Iudaia usuf gam?” 10 Ka diik ri arae, wara le ka usum tah le foron laulaumet na pris, ri ta ufu Iesu usuf i ini wolwol laulau. 11 Isau le foron laulaumet na pris ae, ri ka farakrakai gur na fanu ae le rin fas Pailat isi in fasuuh ufu Barabas.
12 Pailat ka diik ri sabin aragii, “Sanih mang iak tel u ini ier ae gam foteng u le King ken fan Iudaia?”
13 Ke ri ka perek aragii, “Fakulkulik u na aupaket!”
14 Pailat ka diik sabin aragii, “Sanih e wara? Matngan sanih i tel fager ta u?”
Isau le ri ka lala perek mang tom aragii, “Fakulkulik u na aupaket!”
15 Pailat i ier isi falaes fanu, pesu ka fasuuh ufu Barabas usuf ri, ke ka ta ufu Iesu usuf foron tom fapaket isi rin pis u, ke rik fakulkulik u na aupaket.
Foron Tom Fapaket ri Morot ini Iesu
(Mt 27:27-31; Jn 19:2-3)
16 Foron tom fapaket ri ka dat Iesu una palgan ubiif kale fel ken famfamu kiri, ke ri ka tawi turim foron tom fapaket tikii. 17 Ri ka fakilkiliis u ini dolon kaen melmelek, ke ri ka tel nenge bangbang* Kaen melmelek ke bangbang i fasih arae kilkiliis ken foron king. ini finau ae i mel e si, ke ri ka luun u na paklu. 18 Ke ri ka faorek pes u aragii, “Ier, wo sau o King ken fan Iudaia!” 19 Ke ri ka famam paket paklu ini nenge au, ke ri ka ubis u, ke ri ka ilepul na mata, ma ri ka garan bulat lo. 20 Aunbiing ri ka morot tah ini, ri ka tel ufu kaen melmelek lo, ke ri ka fakilkiliis fafis u ini kilkiliis kia tom. Ke ri ka lame fasuuh u isi rik fakulkulik u na aupaket.
Ri Fakulkulik Iesu na Aupaket
(Mt 27:32-44; Lk 23:26-43; Jn 19:17-27)
21 Awii tole sal, foron tom fapaket ri ka tafe nenge kaltu tina Sairini asa e Saimon, tama Aleksenda ru e Rufus. I la tina nenge maleh isi in tatkau una Ierusalem. Ke foron tom fapaket ri ka fangongos u isi in kusep aupaket ke Iesu. 22 Ri ka lame Iesu una falifuh ae ri foteng u ini Golgota. Kamtinan as ae le, salan tuan paklun kaltu. 23 Ri ka ta wain sing i, wain ae ri ikis u turan danun au ae ri foteng u ini mir, isau le biil i to umin u. 24 Ri ka fakulkulik ta u na aupaket, ke ri ka fangfang laki isi seh tom in kep foron kilkiliis kia.
25 Na isiu e aunbiing na biingbiing, ri ka fakulkulik u na aupaket. 26 Ri ka siit orek ae ri tiu u ini bae na olon aupaket kia, aragii: KING KEN FAN IUDAIA. 27-28 Ke ri ka fakulkulik iwu sabin e tom sisii tura na iwu e aupaket, neng na mia ke neng na kaisa.† Fale tom tasum na Buk na Gogoh ri wol le fal e orek biitom na rina igii, i aragii: Ri tel u arae una fasuut orek ae na Buk na Gogoh, le, ‘Ri par u arae nenge tom lek nagogon.’ (Par Aisaia 53:12) 29 Ma fanu ae ri liuliu ufu Iesu la, ri ka famam orek laulau ulo, ke ri ka famam pakpakte paklu ri ulo, ke ri ka tarah, “Wo tara tah le on rabat ufu Felun Sising igii, ke ok faptih fafis u na in tuul e biing, 30 ok puh mang tinbae na aupaket ke ok faliu fafis wo tom.”
31 Foron laulaumet na pris ke foron tom fafausum ini nagogon sabin, ri ka morot ini Iesu na fatpoto ri tom aragii, “I faliu fal, isau le biil ifasih in faliu fafis u tom. 32 Male i e Mesaia, King ken fan Israel, ke ik puh mang tina aupaket, isi kerek par u, ma kerek unune lo.” Ke iun kaltu sabin ae ri fakulkulik ta ruh na iun aupaket na iun baba Iesu, ru ka orek laulau ulo.
Iesu i Met
(Mt 27:45-56; Lk 23:44-49; Jn 19:28-30)
33 Na sangful ini u e aunbiing na siat, falifuh tikii ka kubunor, papang na i tuul e aunbiing na efef. 34 Na i tuul e aunbiing, Iesu ka ngangeh aragii, “Eloi, Eloi, lama sabakatani?” Kamtinan orek ae, i aragii, “God kiak, God kiak, isi sanih o ka la koseng iau?”
35 Fale fanu ri sotih tah na fatat. Aunbiing ri ongen u, ke ri ka tara aragii, “Gam ongen u, i tawi Elaisa.”
36 Nenge kaltu ka filau ma ka kep nenge tier ae i duup pes dan la, ka faluum u na wain ae i mingin, ka luun u na nenge au ke ka sik u una mawe isi Iesu ik duup u. Ke ka fas ri aragii, “Gam nene, kerek par u bii, Elaisa in la isi fapuh u, le biil.”
37 Iesu ka lala ngangeh sabin, ke ka fut paket mangia.
38 Ke, tara kaen tinawii na Felun Sising ae i tempaek mua ae na palga, ka tamsih una iwu e danga tinbae na mawe ubuif na pikli. 39 Nenge famfamu ken foron tom fapaket i sotih tah awii na famu na piklin aupaket ke Iesu. Aunbiing i ongen Iesu i ngangeh, ma ka par matngan minet kia, ke ka tarah, “Tekentu kanaka, kaltu igii, i e Kalalik ke God.”
40 Fal e kelefin sabin ri sotih tapak ma ri ka par foron tier ae. Maria Makdalin, ke Salome ke Maria tina fabiro Jems ru e Joses, rituul tinaiwa turan kelefin ae. 41 Ituul e fifin igii, rituul mi la lo Iesu aunbiing i kiis tah na Galili, ke rituul tel foim la una lupes u. Ke ifuun e kelefin sabin ri la turim tah tura una Ierusalem, ri sabin tinaiwa.
Ri Faborong Pununfo Iesu na Matan Fat
(Mt 27:57-61; Lk 23:50-56; Jn 19:38-42)
42-43 Biing ae, i e biingen geges, ma i e biing famu na Biingen Mangeh. Iosep tina Arimatia, i e nenge laulaumet ken fan Iudaia ae ri bulat la lo, ma i nene la isi matanfuntih ke God. Biil i sokeh, pesu ka la usuf Pailat, na efef aunbiing pisiih biil biitom i sup, ke ka sising u isi pununfo Iesu. 44 Pailat ka bitit aunbiing i ongen u le Iesu ka met tah. Ke ka kam pes famfamu ken foron tom fapaket, ke ka diik u aragii, “Tekentu tom le Iesu ka met tah?” 45 Pailat ka ongen ta orek ken famfamu ken foron tom fapaket ae, pesu ka mangte ufu pununfo Iesu usuf Iosep. 46 Ke Iosep ka fiil fal e rokap na kaen, ke ka fapuh pununfo Iesu, ma ka afit u ini. Namih ka faborong u na matanfat una luun minet, ae ri kef ta u na balan fat, ke ka fabulbulis nenge tara fat una babat kale matanfat ae. 47 Maria Makdalin ke Maria tina Joses, ru par ta falifuh ae ri faborong ta Iesu lo.