10
Yesus boi nola Niakaan maktuir naꞌin sanulu resin rua
(Markus 3:13-19; Lukas 6:12-16)
Nunia hotu, Yesus bolu nola maktuir naꞌin sanulu resin rua atu libur malu. Nia latan beran baa sia atu teꞌur sai diabu, nodi nadiꞌak nola ema moras oi-oik. Maktuir naꞌin sanulu resin rua mak Nia boi nia atu dadi baa Niakaan klosan, siakaan naran mak neꞌe:
Mak dala uluk, naran Simon (nia mak ema temi naꞌak ‘Petrus’),
no alin, naran Andreas.
Hotu Yakobus
no alin, naran Yohanis (sia naꞌin rua nia, Sebadeus oan).
Noo tenik Filipus
no Bartolomeus.
Hotu Tomas
no Mateus (ema maksisi bea).
Hotu Yakobus (Alfeus oan)
no Tadeus.
Hotu Simon (mak tuir partee politik Selot)* Partee Selot neꞌe buka dalan nebee ema Yahudi sia hakbois nosi ukunrai Roma. Sia moos nanaran partee neꞌe naꞌak ‘Patriot’.
no Yudas Iskariot (nosi ikus, nia mak faꞌan lakon Yesus).
Yesus solok Niakaan maktuir sia
(Markus 6:7-13; Lukas 9:1-6)
5-6 Nunia hotu, Yesus solok Niakaan maktuir naꞌin sanulu resin rua nia nodi naruka naꞌak, “Haꞌu ksolok emi baa itakaan ema Yahudi sia tan sia waꞌin la tuir Naꞌi Maromak dalan. Sia hanesan bibi malae mak laꞌo sala dalan. Tan lia nia, emi musti baa sia dei. Keta baa ema seluk nuꞌu ema Samaria. Baa katak haꞌak, ‘Naꞌi Maromak Niakaan oras toꞌo tiꞌan, nebee ema hotu-hotu bele tama dadi baa Niakaan hutun-renu.’ Baa hadiꞌak hola ema moras, halo ema maten moris nikar, hadiꞌak hola ema moras funi mea, no teꞌur sai diabu sia. Naꞌi Maromak foo waꞌin baa emi tiꞌan, mais Nia la nusu nikar sa-saa. Tan lia nia, oras neꞌe emi musti baa foo waꞌin baa ema seluk sia, mais lalika husu hikar sa-saa. Baa laꞌo tanan dei. Lalika hodi osan, 10 bakae, tais selu, kaso, lale ai knoꞌan. Tan ema musti foo baa ema serwisu, saa mak sia fatan simu. 1 Korintus 9:14; 1 Timotius 5:18
11 Kalo emi tama baa kota, lale baa leo, buka ema mak nakara simu emi. Hotu hein iha nia toꞌo laꞌo hela. 12 Kalo tama baa ema uman, hasee sia haꞌak, ‘Dame!’ 13 Kalo sia simu emi diꞌa-diꞌak, hakroꞌan nebee Naꞌi Maromak natuun matak-malirin baa sia. Mais, kalo sia la simu emi, Naꞌi Maromak moos la natuun matak-malirin baa sia. 14 Kalo ema la noꞌuk nanono baa emi, sai hosi uma nia, lale kota nia. Hotu hisik hela ahukresan hosi emikaan ain atu dadi baa tadak naꞌak, sia naꞌin nataa duꞌuk baa siakaan hahalok. Kristus Klosan Lian 13:51 15 Nosi ikus, kalo Naꞌi Maromak natuun kastikar baa ema raiklaran neꞌe, nanis Nia natuun kastikar todan baa ema Sodom no ema Gomora mak uluk aat basuk nia. Mais rona, tan Haꞌukaan dalen neꞌe, tebes no loos! Naꞌi Maromak atu natuun kastikar todan liu tan tenik baa ema mak la noꞌuk simu emi.” Lukas 10:4-12; Mateus 11:24; Lia Uluk Fohon 19:24-28
Yesus katak baa Niakaan maktuir sia naꞌak, sia atu netan susar
(Markus 13:9-13; Lukas 21:12-17)
16 “Hanoin! Haꞌu ksolok emi hanesan Haꞌu ksolok bibi malae baa asu fuik krakat leet. Tan lia nia, emi musti hodi kakutak hanesan samea matenek. Emikaan neon moos musti loos hanesan manu lakateu sina mak la natene buka lia. Lukas 10:3 17 Sintidu, tan ema atu naloot emi hanesan asu fuik krakat tata noꞌo bibi malae. Sia atu dada nodi emi baa moon-metan fatin. Sia moos atu taꞌe emi iha uma hamulak laran sia. 18 Sia atu dada nodi emi baa hataa gubernur no naꞌin sia tan tuir Haꞌu. Mais emi musti hodi leet nia atu katak baa sia hosi Haꞌu. Hodi nunia, ema mak la natene Naꞌi Maromak moos bele rona lia nosi Haꞌu. 19 Baa oras sia dada nodi emi nunia, emi lalika hataꞌuk haꞌak, ‘Haꞌu atu kdale kaꞌak saa? Haꞌu atu kataa kaꞌak saa?’ Lalika hataꞌuk nunia, tan toꞌo baa niakaan oras, emikaan Ama iha laleꞌan atu katak lia saa mak emi musti dale. 20 Baa oras nia, saa mak emi dale, la nahabut baa emi duꞌuk, mais nahabut baa Naꞌi Maromak Kmalar Lulik mak atu nanorin emi atu dale saa. Markus 13:9-11; Lukas 12:11-12, 21:12-15
21 Emi lei haree! Kalo noo ema mak fiar baa Haꞌu iha uma ida laran, niakaan maun-biin-alin duꞌuk atu buka dalan noꞌo nia. Kalo oan fiar, niakaan ama mak buka dalan noꞌo nia. Kalo inan-aman fiar, siakaan oan duꞌuk mak buka dalan noꞌo sia. Markus 13:12; Lukas 21:16 22 Lei haree! Ema hotu-hotu atu hirus emi tebe-tebes tan tuir Haꞌu. Mais ema mak naterus aan bei-beik toꞌo mohu, Naꞌi Maromak atu sori nia. Mateus 24:9, 13; Markus 13:13; Lukas 21:17 23 Kalo ema naloot emi iha kota ida, hiꞌit aan halai baa kota seluk. Rona, tan Haꞌukaan dalen neꞌe, tebes no loos! Haꞌu neꞌe, Ema Raiklaran Isin nosi laleꞌan. Emi sei la laꞌo hasiri mohu dauk kota hotu-hotu iha rai Israꞌel neꞌe, mais Haꞌu kmai kikar tiꞌan. Nunia tebes!
24 Kalo ema la nakara ema manorik ida, sia moos la nakara niakaan maktuir sia. Kalo ema la nakara ema boot ida, sia moos la nakara niakaan ema serwisu sia. Lukas 6:40; Yohanis 13:16, 15:20 25 Kalo maktuir nanorin aan toꞌo matenek manesak no niakaan ema manorik, nia noran toꞌo tiꞌan. Kalo ema serwisu nanorin aan toꞌo matenek manesak no niakaan ulun, nia moos noran toꞌo tiꞌan.
Hanoin! Kalo ema dale nahaat uma ida naꞌin naꞌak, ‘O neꞌe Baalsebul mak diabu ulun!’ ema uma laran moos nanis netan naran aat liu tan.” Mateus 9:34, 12:24; Markus 3:22; Lukas 11:15
Yesus katak baa Niakaan maktuir sia nebee keta hataꞌuk ema raiklaran
(Lukas 12:2-7)
26 Hotu Yesus dale baa Niakaan maktuir sia naꞌak, “Lalika hataꞌuk baa ema mak sakar emi. Nosi ikus, lia mak oras neꞌe sei subar, ema hotu-hotu atu natene. Markus 4:22; Lukas 8:17 27 Lia mak haꞌu kanorin baa emi mesan, emi musti katak baa ema hotu-hotu. Lia mak Haꞌu katak no-nook baa emi, emi musti katak hasirin fatin hotu-hotu. 28 Keta hataꞌuk ema raiklaran. Masik sia bele noꞌo emi moos, sia la bele noꞌo emikaan kmalar. Musti hataꞌuk Naꞌi Maromak dei, tan Nia mesan mak noo beran atu natama emikaan isin no kmalar baa haꞌi naraka. 29 Emi musti hakbiit neon. Ema faꞌan manu harek nodi folin kmaan basuk. Mais la noo manu ida kois mak monu mate, kalo emikaan Ama iha laleꞌan la foo leet. 30 Emikaan Ama iha laleꞌan moos lituk emi toꞌo lia mak kiꞌik oan basuk sia. Emikaan fuuk lahon iha ulun moos, Nia sura nola tiꞌan. 31 Dadi keta hataꞌuk! Naꞌi Maromak nafoli emi liu nosi manu harek nia sia.”
Yesus katak baa Niakaan maktuir sia nebee keta moe katak sain lia Yesus
(Lukas 12:8-9)
32 Nunia hotu, Yesus dale tenik naꞌak, “Ema mak nakberan aan katak sain Haꞌu iha ema lear oin iha raiklaran neꞌe, Haꞌu moos atu katak sain nia iha Haꞌukaan Ama oin iha laleꞌan kaꞌak, ‘Ema neꞌe, Haꞌukaan ema.’ 33 Mais ema mak neli Haꞌu iha ema lear oin naꞌak, nia la natene Haꞌu, nosi ikus Haꞌu moos atu katak baa Haꞌukaan Ama iha laleꞌan kaꞌak, ‘Haꞌu la katene ema nia.’ ” 2 Timotius 2:12
Yesus katak baa Niakaan maktuir sia naꞌak, Niakaan mamain atu nalo ema sakar malu
(Lukas 12:51-53, 14:26-27)
34 Hotu Yesus dale naꞌak, “Keta haneo haꞌak, Haꞌu kmai kodi dame baa raiklaran. Lale. Haꞌu kmai atu kalo ema raiklaran sakar malu. 35 Haꞌu kmai tuir saa mak Maromak makoꞌan dale kedan hori uluk naꞌak,
‘Oan mane sakar aman,
oan feto sakar inan,
oan feen sakar banin feto,
36 tan ema uma laran duꞌuk atu funu malu.’ Mika 7:6
37 Ema mak nakara tuir Haꞌu tebe-tebes, musti nadomi Haꞌu liu hotu-hotu: liu nosi inan no aman, no liu nosi oan sia. Kalo lale, nia la fatan dadi baa Haꞌukaan ema. 38 Ema mak nakara tuir Haꞌu, mais la noꞌuk natiu susar, nia moos la bele dadi baa Haꞌukaan ema. Mateus 16:24; Markus 8:34; Lukas 9:23 39 Ema mak nadiꞌa aan mate tan tuir Haꞌu, nia atu netan moris nima-nimak no Naꞌi Maromak. Mais ema mak moris bodik isin lolon duꞌuk, niakaan moris atu lakon nunia dei!” Mateus 16:25; Markus 8:35; Lukas 9:24, 17:33; Yohanis 12:25
Yesus katak baa Niakaan maktuir sia naꞌak, Naꞌi Maromak atu selu nikar ema mak simu sia
(Markus 9:41)
40 Hotu Yesus dale naꞌak, “Ema mak simu emi diꞌa-diꞌak, sia moos simu Haꞌu. Ema mak simu Haꞌu, sia moos simu Maromak mak solok Haꞌu. Markus 9:37; Lukas 9:48, 10:16; Yohanis 13:20 41 Kalo ema simu Maromak makoꞌan ida tan sia fiar naꞌak makoꞌan nia tebe-tebes mai nosi Maromak, nosi ikus Naꞌi Maromak atu selu baa sia hanesan Nia selu baa makoꞌan nia. Kalo ema simu ema ida mak neon loos, tan sia fiar naꞌak ema nia tuir Maromak hakaran, nosi ikus Naꞌi Maromak atu selu baa sia hanesan Nia selu baa ema loos nia. 42 Ema mak simu emi tan tuir Haꞌu, Naꞌi Maromak nanis selu nikar baa sia. Rona! Haꞌukaan dalen neꞌe, tebes no loos! Masik ema foo wee moon hemu fatik ida dei moos, Naꞌi Maromak la naluꞌa.”

*10:4 Partee Selot neꞌe buka dalan nebee ema Yahudi sia hakbois nosi ukunrai Roma. Sia moos nanaran partee neꞌe naꞌak ‘Patriot’.

10:10 1 Korintus 9:14; 1 Timotius 5:18

10:14 Kristus Klosan Lian 13:51

10:15 Lukas 10:4-12; Mateus 11:24; Lia Uluk Fohon 19:24-28

10:16 Lukas 10:3

10:20 Markus 13:9-11; Lukas 12:11-12, 21:12-15

10:21 Markus 13:12; Lukas 21:16

10:22 Mateus 24:9, 13; Markus 13:13; Lukas 21:17

10:24 Lukas 6:40; Yohanis 13:16, 15:20

10:25 Mateus 9:34, 12:24; Markus 3:22; Lukas 11:15

10:26 Markus 4:22; Lukas 8:17

10:33 2 Timotius 2:12

10:36 Mika 7:6

10:38 Mateus 16:24; Markus 8:34; Lukas 9:23

10:39 Mateus 16:25; Markus 8:35; Lukas 9:24, 17:33; Yohanis 12:25

10:40 Markus 9:37; Lukas 9:48, 10:16; Yohanis 13:20