Xapu̱lh xcarta̱ hua̱ntu̱ tzokli̱ San Juan
XATAPAJMUJUN TACHIHUIN:
Acxni̱ cajcu xtzucuko̱ni̱t chixcuhuí̱n li̱pa̱huanko̱y Cristo, na̱ chuná̱ cani̱huá̱ xtalakapuntumi̱ma̱ aktum tlanca ta̱ksaní̱n, sa̱mpi̱ xuancán pi̱ xma̱n hua̱ tla̱n nakalhi̱y akapu̱táxtut hua̱nti̱ tze̱k xma̱xqui̱ko̱ni̱t aktum talacapa̱stacni, xa̱huá̱ xli̱skalala Dios, hua̱mpi̱ mat ni̱ lhu̱hua̱ hua̱nti̱ naakapu̱taxtuko̱y. Cumu chuná̱ xla̱akskahuimi̱ma̱kó̱ huá̱ xpa̱lacata̱ Juan li̱tzokniko̱lh yuma̱ carta ca̱najlaní̱n laqui̱mpi̱ yuma̱ c-xcarta nama̱akata̱ksni̱ko̱y hua̱ntu̱ luhua xtaluloktat xtachihui̱n Dios. Acxni̱ Juan huan pi̱ “Dios hua̱ xkakánat”, antá̱ lacatancs quilhuama̱ pi̱ hua̱ntu̱ xpa̱lacata Dios ni̱ pala pu̱lactum anán hua̱ntu̱ xlá̱ ni̱ catzi̱y, usu pala tí̱ tla̱n nama̱tze̱kniy hua̱ntu̱ tlahuama̱.
Xa̱huá̱ xuilakó̱ makapitzí̱n hua̱nti̱ kalhtum xuanko̱y pi̱ Cristo ni̱ xli̱ca̱na̱ hua̱ yumá̱ hua̱nti̱ xli̱mínat xuani̱t, hua̱nti̱ xli̱ca̱na̱ xCam Dios. La̱ntla̱ yuma̱ ta̱klhú̱hui̱t hua̱ntu̱ xanama̱, u̱nú̱ ca̱rta̱ li̱xa̱katliko̱cán, chu̱ ma̱lacapa̱stacako̱cán pi̱ nia̱lh mini̱niko̱y tí̱ nali̱xakatliko̱y a̱tanuj talacapa̱stacni, sa̱mpi̱ xlacán kalhi̱ko̱y Espíritu Santo hua̱nti̱ quinca̱ma̱siyuniyá̱n xli̱pacs xtalacapa̱stacni Dios hua̱ntu̱ xlá̱ quinca̱ma̱catzi̱ni̱putuná̱n; xa̱hua̱ Espíritu Santo li̱ma̱luloka̱ pi̱ Dios lama̱ c-xlatama̱tcan yumá̱ hua̱nti̱ li̱pa̱huanko̱y Cristo, chu̱ ca̱cni̱naniko̱y sa̱mpi̱ Xpu̱chinacán.
Xa̱huá̱ li̱katsputa̱ yuma̱ carta anta̱ni̱ xli̱pacs tapa̱xuhuá̱n huan pi̱ xli̱pacs hua̱nti̱ lakapasa̱ Dios pa̱xqui̱ko̱y xta̱lá, usu xta̱chixcucán, sa̱mpi̱ Dios huá̱ tapá̱xqui̱t, usu hua̱nti̱ xali̱ucxílhti̱t la̱ntla̱ quili̱pa̱xqui̱natcán.
1
Hua̱ Jesús xtachihui̱n Dios hua̱ntu̱ ma̱siyuy la̱ntla̱ nakalhi̱ya̱hu xaxli̱ca̱na̱ latáma̱t
1 Unú̱ c-quincarta̱ hua̱ntu̱ cca̱tzoknimá̱n quit cca̱li̱ta̱chihui̱naná̱n xpa̱lacata yuma̱ cha̱tum hua̱nti̱ xlamajá̱ hasta xamaka̱n quilhtamacú̱ acxni̱ ni̱ naj tú̱ xa̱ma̱lacatzuqui̱y Dios. Hua̱ quit cuanima̱ Cristo hua̱nti̱ huanicán Xtachihui̱n Dios sa̱mpi̱ huá̱ ma̱siyuy la̱ntla̱ nakalhi̱ya̱hu xaxli̱ca̱na̱ latáma̱t, chu̱ quin ma̱n ckaxmatni̱tahu la̱ntla̱ huan, chu̱ ma̱n cli̱ucxilhni̱tahu quilakastapucán la̱ntla̱ luhua tasiyuy, huá̱ luhua li̱huana̱ cli̱lakapasni̱tahu pi̱ kalhi̱y xtiyatli̱hua̱ la̱ntla̱ cati̱hua̱ chixcú̱ sa̱mpi̱ ma̱n quimacancán cli̱toklhni̱tahu, chu̱ ctalulokni̱tahu pi̱ hua̱ tamá̱ xkalhi̱y tachihuí̱n hua̱ntu̱ ma̱sta̱y latáma̱t. 2 Sa̱mpi̱ hua̱ yuma̱ xma̱sta̱na latáma̱t, ma̱n quinca̱tasiyunini̱tán, chu̱ quin ma̱n cucxilhni̱tahu, tancs cma̱luloka̱hu pi̱ xli̱ca̱na̱ lama̱, chu̱ cli̱akchihui̱nanima̱hu xli̱pacs tachixcuhuí̱tat pi̱ cali̱pa̱huanko̱lh yumá̱ hua̱nti̱ xma̱sta̱na latáma̱t hua̱ntu̱ xa̱li̱ankalhí̱n niucxni̱ nalaksputa̱ xlakasi. Xapu̱lana̱ xlá̱ xta̱lama̱chá̱ Quintla̱tican Dios c-akapú̱n hua̱mpi̱ huata ma̱n quinca̱lakmini̱tán laqui̱mpi̱ nalakapasa̱hu. 3 Quin xma̱n huá̱ cca̱li̱xakatli̱má̱n hua̱ntu̱ ma̱n cucxilhni̱tahu, laqui̱mpi̱ huixín na̱ macxtum naquinca̱ta̱kalhi̱yá̱n yuma̱ tapa̱xuhuá̱n tu̱ ckalhi̱ya̱hu, xta̱chuná̱ la̱ntla̱ quin macxtum cta̱pa̱xuhuama̱hu Quintla̱tican Dios, xa̱hua̱ Xcam Jesucristo. 4 Hua̱mpi̱ hua̱ntu̱ luhua xpa̱lacata̱ cca̱li̱tzokniyá̱n yuma̱ ca̱rta̱ laqui̱mpi̱ acxni̱ nacucxilha̱hu pi̱ na̱ tzucuyá̱tit makcatzi̱yá̱tit c-milatama̱tcán yuma̱ tlanca quintapa̱xuhua̱ncán, quin hasta xali̱huacá̱ nacpa̱xuhuaya̱hu.
Cali̱latama̱hu cxkakanat Dios hua̱ntu̱ kalhi̱y
5 Hua̱ yuma̱ xtachihui̱n Quimpu̱chinacan Jesucristo tu̱ quinca̱ma̱siyunín, na̱ huatiyá̱ cma̱siyuniko̱y xli̱pacs tachixcuhuí̱tat, huan pi̱ Dios huá̱ li̱taxtuy xkakánat, chu̱ c-xlatáma̱t ni̱tú̱ kalhi̱y, chu̱ ni̱ ananiy hua̱ntu̱ tapaklhtú̱ti̱t. 6 Lapi̱ quin huana̱hu pi̱ tapaksiniya̱hu Dios hua̱mpi̱ lapi̱ c-quilatama̱tcán li̱lama̱hu hua̱ntu̱ xala c-tapaklhtu̱ti̱t tascújut, xli̱ca̱na̱ pi̱ li̱aksani̱nana̱hu quintachihui̱ncán, chu̱ quilatama̱tcán. 7 Chí̱ hua̱ lapi̱ aksti̱tum li̱lama̱hu ca̱xkakaná̱, la̱ntla̱ xlá̱ ca̱xkakaná lama̱, xli̱ca̱na̱ tla̱n ma̱luloka̱hu pi̱ tapaksiniya̱hu Dios, chu̱ xkalhni xCam Jesucristo hua̱ntu̱ stajmákalh c-cruz quinca̱li̱chaka̱makaniyá̱n xli̱pacs quintala̱kalhi̱ncán.
8 Hua̱mpi̱ lapi̱ nahuana̱hu pi̱ ni̱tú̱ kalhi̱ya̱hu quintala̱kalhi̱ncán, na̱ acstuta̱kskahuiya̱hu, chu̱ ni̱tú̱ talulóktat c-quilatama̱tcán. 9 Hua̱mpi̱ lapi̱ ta̱yaniya̱hu, kalhapalaniya̱hu Dios pi̱ tlahuani̱tahu tala̱kalhí̱n, entonces tla̱n nali̱pa̱huana̱hu pi̱ xlá̱ naquinca̱ma̱kantaxti̱niyá̱n hua̱ntu̱ ma̱lacnu̱ni̱t, naquinca̱ma̱tzanka̱naniyá̱n quintala̱kalhi̱ncán, chu̱ naquinca̱chaka̱niyá̱n xli̱pacs hua̱ntu̱ li̱xcájnit kalhi̱ya̱hu c-quilatama̱tcán. 10 Hua̱ palapi̱ kalhtum huana̱hu pi̱ ni̱tú̱ tlahuama̱hu tala̱kalhí̱n c-quilatama̱tcán, xli̱ca̱na̱ pi̱ huata li̱ya̱huaya̱hu Dios xta̱chuná̱ la̱mpala huata huá̱ xaaksani̱ná; lapi̱ chuná̱ tlahuaya̱hu ni̱ xli̱ca̱na̱ makamaklhti̱nani̱tahu xtachihuí̱n, chu̱ ni̱ xli̱ca̱na̱ li̱pa̱huana̱hu.