Mepepelime mo Ufaru ma̱ Bulu a̱ tyo ya̱
A̱za̱ a̱ Korinti
Ucuɗuwu wa aatagada a nda
Bulu ɗana ta̱ mepepelime ma nda na̱ mepepelime mo ro a̱ tyo a̱za̱ e Itoni o ro a̱tsuma̱ a̱ Korinti. Korinti a̱ba̱jini a̱ lyuci a ɗa zuzu na̱ ngeꞌen m mala. Ama ba̱ta̱ ba̱ta̱ a̱ da̱na̱ ta̱ ɗe na̱ nden. Lyuciꞌi u da̱na̱ ta̱ na ala a vama adama a mayan me iwuya ko ili yi idaba pe. Iroci yi ili i na a dansa a̱yi ɗa a̱a̱ꞌisa̱ a̱ a̱ma̱li a Afurodata, uba̱ta̱ u na a zuwai ashakala ukpakukupa (1,000) adama o ulinga wa aza a na aa yuwusaan ure we epen a̱ga̱nda̱. Bulu ꞌya̱wa̱ ta̱ ɗe reve u linga adama u tsura̱ ikebe yi ili i na wa̱a̱ da̱na̱ a lyuwusa waru o ritosu ama adama e Yesu. A̱za̱ e Itoni na̱ a̱bunda̱ alambi a ɗa a̱ da̱na̱i a mantsa mo ndolo, amma ama o ro gba shi a̱ shi ta̱ nu ucira.
A̱tsuma̱ e mepepelime ma nda, Bulu rito ta̱ a̱za̱ e Itoni cine a yuwan nden n le uba̱ta̱ u na ama a̱ a̱bunda̱ a̱ ri a yuwusan ili yi idaba. U damma ta̱ a̱za̱ e Itoni a yuwan nden ma ankuri na akapi a ama a na a buwai, she a̱ da̱na̱ wukasu wan. U rito ta̱ ama she a yuwan tsipere wan ko iwuya i ro wan. U cuɗuwa ta̱ cine wu ntsayi lolo da̱na̱. E mepepelime ma nda Bulu damma ta̱ cine icigi i ri nu ucira lon. U roco ta̱ cine waru wu ntsayi a yuwan a̱ga̱nda̱. O ukosu, u cuɗuwa ta̱ ulyuwu wa aci e Yesu na a̱ ꞌya̱sa̱in diga o ukwa̱, ne ɗa fo a̱za̱ e Itoni a̱ yi suru a̱a̱ da̱na̱ nu ulyuwu wa aci.
Ulyuwu wa aci e ekere o ukwa̱ u ta̱wa̱a̱ ta̱ nu ucira e ekere a̱za̱ e Itoni. Icigi yi ili yu uvaɗi a̱ba̱jini e ili i wuya i ɗa. Aatagada a nda a damma tsu ta̱ ulyuwu wa aci e Yesu Zamawawa e ekere o ukwa̱ a laꞌa ta̱ icigi yi ili yu uvaɗi, ne ɗa za vi Itoni a gura suma ili yu uvaɗi reve u kuru Zamawawa ulobonu.
Ili i na i ri pe a̱tsuma̱ a aatagada a nda
1. Ica̱su na avasa a̱ Bulu (1:1-9)
2. Ipati adama o uɓolu wa aci (1:10–4:21)
3. Addama a̱tsuma̱ a̱ tsuꞌutsa̱ (5:1–7:40)
4. Tsutoni na̱ A̱sula̱ o una̱ wa̱ a̱ma̱li (8:1–11:1)
5. Uritosu cine a yuwan a̱ga̱nda̱ na̱ wuma wa̱ a̱a̱ꞌisa̱ (11:2–14:40)
6. Ulyuwu wa aci a̱ Kristi Zamawawa a aci o ukwa̱ (15:1-58)
7. Sadaka adama a alambi (16:1-4)
8. Ifoɓi yi mmalu ma̱ Bulu (16:5-12)
9. Majiyan ma̱ Bulu ni ica̱su ya̱ yi (16:13-24)
1
Ucuɗuwu
1 A̱mu Bulu ɗa n ɗanaa nɗu a̱a̱ꞌisa̱ a̱ a̱za̱ e Itoni† a̱tsuma̱ a̱ Korinti mepepelime ma nda. N ta̱ lyungusa̱a̱ ɗu ni ica̱su. Iꞌutsa̱ i tsu Satsani fo u ta̱ lyungusa̱a̱ ɗu ni ica̱su. A̱sula̱ e ɗe mu ta̱ a̱mu Bulu, mo oꞌwo aajiya e Yesu Kristi Zamawawa, adama a na ne ɗa u cigai. 2 A̱sula̱ e ɗe ɗu ta̱ yo oꞌwo ama a akiza a̱ yi. U ka̱mba̱to ɗu ta̱ na akiza e ekere e Yesu Zamawawa. U yuwaan ta̱ ne fo aza a na a yuwaan niyi a̱ga̱nda̱ a̱tsuma̱ a Zagbain Yesu Zamawawa ba̱ta̱ kokoꞌo. Zamawawa ɗa Zagbain tsu na akapi ama fo.
3 Lyawa A̱sula̱ Dada tsu oɓolo na̱ Zagbain Yesu Zamawawa a ca ɗu isaꞌani na asuvu nden.
Bulu godyoo ta̱ A̱sula̱
4 N tsu godyoo ta̱ A̱sula̱ kuci adama e neꞌe na u ca nɗu, gogo a na yo oꞌwoi a̱za̱ e Yesu Zamawawa. 5 E re suru yo oꞌwo ta̱ a̱za̱ o utsuru, a̱tsuma̱ a adanshi nu urevu suru adama a na yo oꞌwo ta̱ ili i ta̱ na̱ a̱yi. 6 A̱yi nda u roco ta̱ ili i na n damma nɗu adama a̱ yi amayun a ɗa. 7 Adama o ndolo, i ushi ta̱ neꞌe suru na Ruhu va̱ A̱sula̱ aa casu, a̱ɗu a pura uka̱mbu wu Zagbain Yesu Zamawawa. 8 U ta̱ ɓa̱na̱ ɗu nu ucira hali o ukosu adama A̱sula̱ o goro ɗu a̱tsuma̱ e ili i ro o urana u na wa̱a̱ ta̱wisa̱ waru wan. 9 Amayun a ɗa A̱sula̱ a ta yuwaan ɗu ne, adama a na u tsu yuwan ta̱ ili i na u dammai, u ɗangwa ɗu ta̱ yo oꞌwo ili i ta̱ na̱ Mawun ma̱ yi, Zagbain tsu Yesu Zamawawa.
Ama e neꞌeshen ta̱ re re
10 Ama a̱ va̱, n ta patishi ɗu, adama o tsugono tsu Zagbain tsu Yesu Zamawawa, na suru nɗu i usula̱i. She yi kasa wan, amma i ɓoluloi aciya̱ɗu uba̱ta̱ u ta̱ adama i da̱na̱ no okolo a̱ ta̱ na̱ majiyan ma̱ ta̱. 11 Ama a̱ va̱, ama o ro aza a na a̱ ri ɗe nden o uꞌwa wa̱ Kuluwi* Kuluwi ka ɗa, waru o uta̱ yi a alanga e eteshe ko amaꞌa a̱za̱ a̱ yi a ɗa ko a̱za̱ a̱ yi a ɗa shi, waru ko agbashi a ɗa ko ama a na a̱ ri pe na̱ nden a̱tsuma̱ o uꞌwa wa̱ yi u ɗa shi. a damma mu ta̱ a na i ta̱ a mawasan va̱ni ɗu. 12 A damma ta̱ vuma suru ta yuwusan adanshi a̱ yi koꞌo. Vuma ro damma, “N te itoni ya̱ Bulu.” Za ro a dansa “N te itoni ya Apolo.” Za ro waru a dansa, “N te itoni ya̱ Bituru.” Za ro gba a dansa, “N te itoni yi Zamawawa.”
13 A ta gura neꞌeshen Zamawawa za na ri vuma ta̱ kokoꞌo? Oꞌo! Bulu kuwa̱ ta̱ adama a̱ ɗu a akpata?† Oꞌo! A̱ rumbu ɗu ta̱ tsa̱ra̱ yoo oꞌwo otoni a̱ Bulu? Oꞌo! 14 N godyo ta̱ A̱sula̱ a na n rumbuyi ko vuma ta̱ a̱tsuma̱ a̱ ɗu shi, she Kirisibu na̱ Gayu. 15 Gogo babu vuma na aa damma a̱ rumbu yi ta̱ a̱tsuma̱ a ala a̱ va̱. 16 (Kai, n cuwan ta̱ gogo! N rumbu ta̱ Istifana na̱ ka va̱ yi na̱ muwun ma̱ yi, waru maa gura cuwan ko n rumbu ta̱ nanza shi.) 17 Zamawawa† lyungu mu n rumbu ama shi. U lyungu mu ta̱ n yuwan alajiya a Alabari a Saꞌani. Na̱ n damma Alabari a Saꞌaniꞌi, she n yuwan nu ugbozu wa ama wan, adama a na n ciga ucira wu ukwa̱ wu Zamawawa zuva va akpata wo oꞌwo pere shi.
Zamawawa ɗa ucira nu ugbozu wa̱ A̱sula̱
18 Na ama a na a̱ ri o ure wu ukwa̱ a uwwa ikaka adama o ukwa̱ wu Zamawawa, u tso oꞌwo le ta̱ gashi tsulo. Na̱ a̱tsu na A̱sula̱ a wawusa tsu uwwa yi, ucira wa̱ A̱sula̱ u ɗa. 19 A ɗana ta̱ a̱tsuma̱ a Adanshi a̱ A̱sula̱:
“N ta̱ lungusa̱ ugbozu wa aza a na a tarai aciyele a̱ ta̱ nu ugbozu.
N te geshe urevu wa̱ a̱za̱ o urevu.”◊ Isha. 29:14.
20 Nye i ɗa i ri ulobonu a̱tsuma̱ o uvaɗi wa̱ a̱za̱ o urevu wa adanshi, na̱ munlu n wila̱, na aza a ndammulai? A̱sula̱ a zuwa le ta̱ suru o oꞌwo olo waru u roco ta̱ ugbozu u le u ri na̱ a̱ɓula̱ shi. 21 A̱sula̱ za na ri nu ugbozu o foɓo ta̱ ama o uvaɗi u nda a̱a̱ tsura̱ yi shi, no o toni ugbozu u le. O una̱ u ndolo, u ɗangwa ta̱ u wawa aza a na a̱ ushiyi ikaka i na tsu yuwain alajiya, ikaka i na yo oꞌwoi gashi tsulo. 22 Aza a Israꞌila a ciga ta̱ ee ene ili ya asalama tsa̱ra̱ u roco a na A̱sula̱ a̱ ri o ulinga. Atakpaci a ciga ta̱ a̱ tsura̱ ugbozu. 23 Adama o ndolo, ana tsu yuwain alajiya a na Zamawawa kuwa̱ ta̱ a akpata,† aza a Israꞌila a tara yi ta̱ gashi unusu, a̱vu Atakpaci a damma ili i tsulo tsa ɗa. 24 Amma ikakaꞌa a̱ tyo e ekere a aza a na A̱sula̱ a ɗangwai, aza a Israꞌila oɓolo na Atakpaci, a̱yi ɗa nda: Zamawawa, a̱yi ɗa ucira wa̱ A̱sula̱ waru a̱yi ɗa ugbozu wa̱ A̱sula̱. 25 Ko na̱ A̱sula̱ a yuwan gashi u tu ulo, u laꞌa ta̱ vaɗilima̱ ugbozu, ko na̱ wo oꞌwo gashi babu ucira, u laꞌa ta̱ vaɗilima̱ ucira.
26 Ama a̱ va̱, cuwain cine i da̱na̱i ana A̱sula̱ a ɗangwa nɗu. Ama o uvaɗi u nda a jiyan gashi waꞌa ɗa a̱tsuma̱ a̱ ɗu a̱ ri nu ugbozu. Ama waꞌa ɗa a̱ da̱na̱i azagbain a̱ lyuci a̱tsuma̱ a̱ ɗu. Waru waꞌa ɗa uta̱i a̱tsuma̱ a̱ ɗu o uꞌwa u tsugono. 27 Amma, A̱sula̱ a ɗangwa ta̱ ili i na ama a tarai tsulo tsa ɗa tsa̱ra̱ u zuwa aza a na a tarai aciyele a̱za̱ o ugbozu a uwwa wono. Waru u ɗangwa ta̱ aza a na a̱ ri nu ucira shi, tsa̱ra̱ u ca a̱za̱ o ucira wono. 28 U ɗangwa ta̱ ili i na ama o uvaɗi a tarai ili shi, ko babu a̱ɓula̱, ko babu ili i ro ko keꞌen, a̱vu u linga ne ele adama ili i na ama a tarai ili ya̱ a̱ɓula̱ yo oꞌwo babu a̱ɓula̱. 29 U yuwan ta̱ ne tsa̱ra̱ vuma ro yuwan uvaɗu a̱ ma̱ka̱ka̱n ma̱ yi wan. 30 A̱sula̱ a ɗa za na zuwa nɗu yo oꞌwo uɓolu na̱ Yesu Zamawawa. U ka̱mba̱to ta̱ Zamawawa na aciya̱yi wo oꞌwo ugbozu adama a̱ tsu. Adama a̱ yi a ɗa A̱sula̱ a̱ usu ntsu. U ka̱mba̱to tsu ta̱ aza a akiza, waru u ca ta̱ aciya̱yi tsa̱ra̱ wu uta̱a̱ tsu uba̱ta̱ wu unusu. 31 Adanshi a̱ A̱sula̱ a damma ta̱, “Vuma na cigai yuwan uvaɗu, u yuwan goon a̱tsuma̱ e ili i na Zagbain yuwain.”