Rau Tau Paulus Iboode Pa Yes Galesia
Galesia—Galatians
1
Maaron tauu ta ighur Paulus pa uraat tooni
Yau Paulus, mbaŋooŋa to Yesu Krisi, ta nabood rau tane. Uraat tau naghamghamu ne, tamtamon eta ighur ghau pani mako, ve lupuuŋ eta to taan tighur ghau pani mako. Yesu Krisi gha Taama Maaron tau ipaburigini pa mateegh na, yesuru ta tighur ghau pa uraat tane. * Mbaŋ 9:15
Toŋvetaz tisov to Krisi tau tileep tomani ghau ne, yeŋa nibood rau tane pa yam lupuuŋ to Krisi tau aleep irau taan sirivu to Galesia na. * Mbaŋ 16:1-6, 18:23
Poia to Tamaan Maaron ve Tiina toit Yesu Krisi izaa tsiam, ve tiŋgin gham aleep poia toman lolomim luuma. Krisi iyoki tauu gha imaat itaghon Tamaan Maaron loolo, leso ireu sosor toit, ve ipas ghiit pa saghati tapiri tau aazne igheen irau taan. * Mk 10:45
Tauvene tapait Maaron eeza pa tapiri ve poia tooni ta aazne, ve taghon taghon gha ila. Onoon.
Vaaru poia eemon ighengheen
6-7 Oyai, yau nagham ŋgar naol pa yam Galesia. Aghita. Ila uraat to Yesu Krisi ve poia tooni, Maaron ipoi gham amin le wa. Eemon yam rekia mon aghur murimim pani, ve aghe ataghon vaaru poia ite. Ve vaaru poia eemon ta ighengheen. Ite paam mako. Alooŋ. Tamtamon siriv tau tilepleep tomani gham na, yes titortoor vaaru poia to Krisi, ve tikaukau ŋgar tsiam. Zeran tawe, saveeŋ toozi isapir kat. * Mbaŋ 15:1, 24; 2Kor 11:3+
Tauvene yam alooŋ zi sov. Alooŋ. Isaav ighe tamtamon eta, ma aŋela to sambam eta ivotia vaaru poia payam, ve saveeŋ tooni isapir pa vaaru poia tau muuŋ yei nivotia payam, ene aatyavyav to Maaron aat izaa tooni ve ivaghamunia. Yei paam, isaav ighe nigham tauvene, aatyavyav to Maaron aat izaa tsiei ve ivaghamun ghei. Tauvene saveeŋ tau nisavia gha alooŋa wa, tauta aazne nayoli muul. Isaav ighe tamtamon eta ivotia saveeŋ payam, ve saveeŋ tooni isapir pa vaaru poia tau muuŋ yam aghamu na, aatyavyav to Maaron aat izaa tooni ve ivaghamunia. * Syg 22:18+
10 Yam agham ŋgar mindai? Saveeŋ tsiau tane, yau nasavia to nagham tamtamon lolozi poia payau? Mako. Yau nasavia leso Maaron loolo poia payau. Ve mindai? Yam aghe yau nazuari ghau to nagham tamtamon lolozi? Mako kat! Isaav ighe nagham tauvene, ene yau besooŋa to Krisi mako. * 1Tes 2:4; Yems 4:4
Yesu Krisi tauu ta ipaghazoŋai Paulus pa vaaru poia
11 Yam toŋvetaz, yau naghe yam awatagh kat tauvene: Vaaru poia tau yau nasavia payam na, ene ivot ila to tamtamon eta to taan mako. 12 Pasaa, yau naghamu ila to tamtamon eta mako. Ve tamtamon eta ipaghazoŋai ghau pani mako. Yesu Krisi tauu, ta ipaghazoŋai ghau pani. * 1Kor 11:23; Ep 3:3
Paulus ipaesia eez tau i itoor ŋgar tooni, ve Yesu Krisi ighuru imin mbaŋooŋa tooni
13 Ŋgar tau muuŋ naghamghamu na, yam aat alooŋa wa. Saawe tau nataghon yes Yuda pa tutuuŋ ve suŋuuŋ toozi, naghur pataŋani tintiina izazaa to yes tau tileep ila lupuuŋ to Maaron na, ve nagham zi tileep saghat kat. Pasaa, naghe le nareu zi, ve napasov lupuuŋ toozi le isov kat. * Mbaŋ 8:3, 26:9+; 1Tim 1:13
14 Saawe tana, yau nazuari ghau kat pa suŋuuŋ ve tutuuŋ to yei Yuda, le naliiv zetagŋa naol tau yeŋa tumbuuŋ eemon na. Pasaa, ŋgar tsiau iyaryaaŋ kat naghe le nataghon duduŋai tutuuŋ tisov to tibugŋa tau tigheen muuŋ ve ilam. * Mbaŋ 22:3; Pil 3:6
15-16 Eemon, saawe tau tinaŋ ipoop ghau soone, Maaron isiigh ghau pataghaaŋ wa. Ve murei ra, i ipoi ghau namin le, itaghon tauu loolo ve poia tooni, ve itotoi Naatu payau, leso navotia vaaru pa yes tau Yuda mako na. Saawe tau gabua tana ivot payau, yau nala nail ŋeer eta to taan to ipaghazoŋai ŋgar tsiau ne mako. * Yer 1:5; Mbaŋ 9:15; Ro 1:1
17 Ma rekia nazala Yerusalem pa ghitooŋ yes tau timin mbaŋooŋa to Krisi imin maata payau na mako. Malmalig nala naleep izi taan sirivu to Arabia. Naleep le isov, ra namuul nala pa nugh Damaskus.
18 Ndaman tol isov, ra nazala Yerusalem pa ghitooŋ Petrus, ve yeiru nileep irau mboŋ saŋavul ve liim. * Mbaŋ 9:26+
19 Saawe tana, naghita mbaŋooŋa siriv to Krisi mako. Naghita Yakobus tau Tiina toit taazi na mon. * Mt 13:55
20 Saveeŋ tau naboode payam ne, ene karom mako. Ila Maaron maata, ene saveeŋ onoon.
21 Yau naghita Petrus le isov, ra nala naleep izi taan sirivu to Siria ve Silisia. * Mbaŋ 9:30
22 Saawe tana, lupuuŋ to Krisi tau tileep irau taan sirivu to Yudea na, tighita naghog mako. 23 Tiloŋlooŋ varug mon tauvene: “Ŋeer tau muuŋ ighurghur pataŋani pa iit tamtamon tau taghur ila Krisi saveeŋ tooni, ve ireureu ghiit, tauta aazne ivovotia saveeŋ tana pa tamtamon.” 24 Tauvene yes tilooŋ varug pa ŋgar tau Maaron igham payau na, ve tipait eeza pa tapiri ve poia tooni.

*1:1: Mbaŋ 9:15

*1:2: Mbaŋ 16:1-6, 18:23

*1:4: Mk 10:45

*1:6-7: Mbaŋ 15:1, 24; 2Kor 11:3+

*1:9: Syg 22:18+

*1:10: 1Tes 2:4; Yems 4:4

*1:12: 1Kor 11:23; Ep 3:3

*1:13: Mbaŋ 8:3, 26:9+; 1Tim 1:13

*1:14: Mbaŋ 22:3; Pil 3:6

*1:15-16: Yer 1:5; Mbaŋ 9:15; Ro 1:1

*1:18: Mbaŋ 9:26+

*1:19: Mt 13:55

*1:21: Mbaŋ 9:30