Apostolo Azaḡa Haḡai
Ḡoere Ḡadaheḡa
Buka ꞌadiꞌe “Apostolo azaḡa haḡai” Uare (Kware) ḡoereo tiro. Uare ḡoereꞌe Garihe (Garia) ḡoere teite ago tiba. Uare zu Gariheo ḡoereꞌeteꞌe azaḡaꞌe niduꞌa 1300. Zeꞌe Central Province, Rigo District habaꞌano radiuꞌohe. Aꞌe Port Moresby-onoꞌo 70 kilomita south-east onameꞌohe.
“Ḡoere huga”ꞌe buka ꞌadi ḡonagano tiro, ḡoere aduga ga iḡaiḡa mene igiꞌeteꞌe ḡoeꞌa buka zaḡoḡano tiroteꞌe huga ihozoga veize.
1
Buka mazaḡa
1 Hari ꞌadiꞌe Teofilo veize tiꞌohe. Eḡeꞌa ibite tirotaꞌaꞌe, Iesuꞌa gauidoteꞌe zuni ihozidoteꞌe niduꞌa, ebu 2 onamo Vine Zaḡoḡaniꞌa ibitohauꞌenaꞌa apostolo azaḡa ḡoere ziniro, ebu adure ḡoha mae itiro. Apostolo azaḡaꞌe Iesuꞌa inahe meiroteꞌe azaḡa. 3 Iesu ani zaharaneadu rudaroteꞌe enogano, mada ḡae ḡazaḡa gaubanana (40) apostolo azaḡa mazao fureraro. Eꞌe zamaḡano ani ꞌize ḡaboga raꞌeteꞌe ihozoga veize haḡai ḡehaḡa fureno zinido, ebu Badiꞌaꞌa zuhiꞌaziꞌuma ḡoeꞌa rae furenido. 4 Zeḡeꞌa nuꞌoraroteꞌe madaḡa ꞌahogano Iesuꞌa ḡoere ziniro, raenaꞌa, “Ierusalema neḡano geno radoꞌi, onamo Mamaꞌa rae tiroteꞌe ḡoeꞌaniꞌa hudanoga veize guhianoꞌi! Eꞌe ḡoeꞌaꞌe za eḡe mazaonoꞌo igiro, raenaꞌa, 5 Ioane Babatisoꞌe vu hina bapatizozido rehano, zaꞌe, mada ḡehaḡa ꞌizema mougano, Vine Zaḡoḡa hina bapatizoziꞌuma.”
Iesu adure ḡoha mae ḡihine itiro
6 Mada ꞌahogano ze bare nuꞌoraroteꞌe zamaḡano, Iesu ḡadiniro, raenaꞌa, “Zuhiꞌa Boro, eꞌe madaḡanoꞌe emeḡeꞌa Isaraela habaꞌa bare madu emeḡeꞌa emeḡe bare ḡiafoga veize ibitofiꞌuma hehe?”
7 Iesuꞌa naenae zinaꞌa, “Eꞌe madaḡaꞌe Mamaꞌa ane niḡano rae tiro. Zaꞌe mene ederiꞌuma ḡauḡa. 8 Rehano Vine Zaḡoḡaniꞌa zae vaḡe ovamiꞌuma madaḡano zaꞌe gigiꞌaḡa meꞌuma. Ebu zaꞌe eḡe hari rae fureniꞌuma, Ierusalema neḡano, Iudea habaꞌano, Samaria habaꞌano onamoo haba ḡonaga.”
9 Iesu ani, ꞌouge reiroteꞌe enogano, zeḡe ubumao adure ḡoha mae ḡihine itiro, ebu ḡozeꞌa ꞌuiro. 10 Iesuꞌa adure ḡoha iteꞌenogano, ze adure ḡohani gagau ḡiane rune radiunu. Ebu ḡianoꞌi! Aneru aheuꞌa zeḡe genaḡano edaro. Ze dabua ꞌuruḡa haḡairo, 11 ebu raenaꞌa, “Galilea azaḡa, za nougadu deꞌea edauꞌenaꞌa adure ḡohani ḡianeꞌohe? Iesu ani zae mazaonoꞌo adure ḡoha mae ḡihine iteha. Aniꞌe ꞌouge itateꞌe horonateꞌe teige vesuꞌu bare ovamiꞌuma.”
Hitaga neḡano kurau nuꞌoraro
12 Ebu ze Olive maḡanonoꞌo bare Ierusalema neḡa itiro. Eꞌe ibiḡaꞌe kilomita tiba heuḡa. 13 Ze Ierusalema neḡa feurirotene, hitaga neḡa itadu zeḡeꞌa radiuꞌeteꞌe habaꞌa diuḡiro. Eꞌe zamaḡanoꞌe, Petero, Ioane, Iakobo, Aniderea, Firifo, Tomasi, Batolomeo, Mataio, Alofeo ubuga, niḡa Iakobo, Zelote vazeḡa, niḡa Simona, ebu Iakobo ubuga, niḡa Iuda. 14 Zeḡe niduꞌa nuꞌoruꞌenaꞌa, zamaze tibunadu iḡaiḡa kuraunu. Roḡae nu, zu Iesu viꞌa Maria, zu Iesu negoḡa duḡuru zuni zeḡe teite nuꞌoraunu.
Matiaꞌa Iuda iḡuri meiro
15 Eꞌe madaḡa ꞌahogano Zuhiꞌa Boro mone azaḡa nuꞌonuꞌo boꞌaḡano Peteroꞌa iḡune edaro. Zeḡe niduꞌaꞌe maḡa tiba zu ḡae aheu gaubanana (120) heuḡa. 16 Ebu zinaꞌa, “Nego nabudi, ibite Vine Zaḡoḡaniꞌa Davida neadu, buka zaḡoḡano tirotaꞌaꞌe hudaro. Aꞌe Iudaꞌa Iesu obone tiroteꞌe azaḡa ibito ziniroteꞌe hariḡa. 17 Iudaꞌe Iesuꞌa inahe meiroteꞌe tahiꞌaḡa ꞌahoga. Ane zuni emeḡe teite gau tiba haḡaido. 18 Rehano aniꞌe reva moniḡa hina haba ꞌahoga hoitiro. Eꞌea vadini ibine uite ovoiro, ebu ahiꞌaniꞌa fuꞌuradu isiḡaniꞌa ḡudau rururaro. 19 Hari ꞌadiꞌe Ierusalema azaḡa niduꞌa igiro. Eꞌanoꞌo zeḡeꞌa haba aꞌaꞌe zeḡe ḡoereo Akeledama rae huniro. Ḡoere eꞌe hugaꞌe ru habaꞌa.
20 Mazaḡa Salamo zamaḡano ꞌahige tiro, raenaꞌa,
'Ane habaꞌe ḡahuturanoꞌi!
Vaze tiba zu eꞌea mene radiꞌuma.' (Salamo 69:25)
Ebu
'Vaze ꞌahoganiꞌa ane gau iḡuꞌa meꞌuma.' (Salamo 109:8)
21 Eꞌanoꞌo emeꞌe vaze ꞌahoga meꞌuma, Iuda iḡuri mouga. Zuhiꞌa Boro Iesuꞌa emeḡe teite radiudoteꞌe madaḡa niduꞌa, emeḡe teite raudoteꞌe vazeḡa ꞌahoga meꞌuma. 22 Eꞌe madaḡaꞌe, Ioaneꞌa Iesu bapatizoniroteꞌeanoꞌo onamo Iesu emeḡe mazaonoꞌo adure ḡoha mae ḡihine itiroteꞌe. Ebu ane zuni Iesuꞌa bare ḡabode iḡuniroteꞌe rae furenifine.”
23 Eꞌanoꞌo zeḡeꞌa vaze aheu meiro. Vaze ꞌahogaꞌe Barasaba rae huneꞌeteꞌe Iosefa, niḡa ꞌahogaꞌe Iusito, ebu vaze ꞌahogaꞌe Matia. 24 Ebu ze Badiꞌa uminiro, raenaꞌa, “Zuhiꞌa Boro, ḡaꞌe vaze zama niduꞌa edeḡa. Eꞌanoꞌo ihofoꞌi, vaze aheu ꞌadi boꞌaḡano ḡaeꞌa mateꞌe vazeḡaꞌe iniu? 25 Iudaꞌa modiroteꞌe apostolo gauḡa iḡuꞌa mouga veize. Iudaꞌe ane haḡai sauꞌa uꞌano aneꞌa radiꞌuma habaꞌa diuḡiro. 26 Ebu zeꞌe eꞌe veize kaḡusi arahoḡa haḡairotene, Matia meiro. Eꞌanoꞌo Matia ani apostolo azaḡa gaubanana tiba fare teite meꞌode tibuniro.