1 Zuwa lya kwesela lolimalile, Maliya Madelena na Salome na Maliya mayake Yakubu, nawagula mafuta ga kunhunyilila wakaubakalize lukuli lwa Yesu. 2 Lufuku zuwa lya jumapili, nawafika kuli chilaga, lusanya lyolwaluche kulawila. 3 Na hewo nawali wochilonjela, “Yalikohi yotuhejezela alila iganga hamlango mwa chilaga?” Nalyo lyali ling'hangala lukami. 4 Nalyo lyali ling'hangala lukami ila lowalolile, nawalyona iganga mina lihejezigwe hafungo. 5 Lowenjile mchilaga, nawamona msongolo yumwe yavalile ikanzu izelu, yekale nzingo ya kudilo, nawabubuwala aku wodumba ng'hatu.

6 Ila ayo msongolo nakawalonjela, “Mleche kububuwala na kudumba. Mwangumpala Yesu yalawile Nazaleti yawambigwe mumsalaba. Kazilipuka, haduhu hano. Mlute honhu howamuwichile. 7 Lelo mlute mkawalonjele walanguswa wa heye hamwe na Petili. Kanguwalongolani kula Galilaya. Ako momona kota vyoyawalonjeleni.”

8 Lelo, nawalawa hala mchilaga wobilima, ena nawakakama kwa kudumba na kububuwala ng'hatu, nahawamlonjele munhu yoneche chinhu, kwa vila nawadumba lukami.

9 Yesu loyazilipuche kung'hali lufuku Jumapili, nakelajila tandi kwa Maliya Madelena, yula yalavigwe vijeni vihile saba. 10 Maliya Madelena nakaluta, nakuwalonjela wala wawele hamwe na Yesu na mhela awo wali wolomboleza na kulila. 11 Ila lowahuliche kota Yesu kamkomu na kota Maliya Madelena kamona, hawamkundile.

12 Hamba Yesu nakawalawila walanguswa weli yawele vinji. Awo walanguswa wali woluta kumgunda. 13 Na hewo kahi nawaluta, nakuwalonjela wayao. Nabaho hawakundile.

14 Hamba Yesu nakawalawila awala walanguswa kumi na yumwe lowali wolya hamwe mchisanya. Nakawang'hanuchila lukami kwa kuwa hela makundo na ibamba lyao, mina nahawawakundile wala wamuwene hala loyazilipuche. 15 Lelo, nakawalonjela, “Luteni kuli isi zeng'ha mkadamle Mbuli Inojile kwa wanhu weng'ha. 16 Yalingukunda na kubatizigwa koloholigwa. Yohambeyakunde kotagusigwa kwa wihe. 17 Na ulajilo awu, wochibanda naula wa wala wawele kunda, kwa itagwa lyangu wolavya vijeni na wolonga kwa ulonzi unji. 18 Wone webate izoka, au wone wang'hwe chinhu choneche chiwele na dunga, haiwawifya hebu. Wowawichila moko watamwa, nawo wowa wakomu.”

19 Mkulu Yesu loyasindile kulonga nawo, nakaholigwa kilanga, nakekala nzingo ya kudilo kwa Nguluwi. 20 Walanguswa wa Yesu nawaluta wodamla chila honhu. Mkulu nakadita mijito hamwe nawo na kwimiza usenga awo kwa ulajilo uwele hamwe na hewo.