2
HOLI SPIRIT RII YATO
Worek, Pentikos yadii yar. Yarek, Jisas riina hiki siitiichichar ma ye podat eemek ya yopo yichar. Worek, wosawosa nerek tari heechi ameya ya sakar. Sowaga eecha yar. Yari eeta yichar aka takiikiisiir. Worek, karakada hi tarekwoyiga eecha her. Herek, i ye yar. I ye yari, saniga saniga i ye yir. Worek, yecha Holi Spirit takiikiisiir. Takiikiisiirek, eeta Holi Spirit rii otiirek, yecha maji akar saniga saniga bar.
Nagwa nagwa hiki tar Ju ma ye akar akaman heechi Jerusalem akamabak yichar. Diita ma yecha diita wosawosa tar boboyen meejirek, eena nokwapa nokwapa ye ya yopo wuchi yichar. Yecha eyey nyegerabor. Yecha meejir ma ye yechi majik barek meejir eena ye nyegerabor. Nyegerabochiniga, henebarabochiniga yecha eecha wor, “Kata ma yecha diita majik batawey ye eeta Galii ma. Boyewak yecha batawa maji noti majiga eecha meejito? Nota Patia ma, Midia ma, Ilam ma. Nota Mesopotemia nosapek heechir. Nota Judia nosap, Kapadosia nosap, Pontas nosap, Esia nosap, 10 Prisia nosap, Pampiia nosap, Isip nosap, Sairini nosap Libia nosap har tawey, nota heechi ya tawa. Ma kaw Rom akaman heechi yar. 11 Nota Ju ma kaw. Nota shebo shebo tar ma kaw Ju ma yechi boboyen herin eena hiki siitiichichu. Ma kaw ye Krit nosap heechi yar. Ma kaw ye Arebia heechi yar. Wowak, nota meejitawey, yecha noti majik God riita harapa otiir boboyek bato.” 12 Hikisha tari, somoyetari, yecha awasen awasen wohe maji batar. “Boy boboyek otiitawak eeta maji eecha bato?” 13 Worek, akar ma ye hiki siitiichichar ma yenya wokwoyarek wohega wor, “Yecha wain ukun aniga beyatar.”
PITA RIITA YENYA MAJIN SAWOR
14 Worek, Pita rii 11 aposel yechaka eecha siitiichi harapa aya ma mima yenya uwa batar, “Ju ma, kwo Jerusalem akamak tawey, ada bana majin napa wagetey tanak, napa meeji ta. 15 Kwo eecha hik tawey, diita ma ye saka beyatawak. Dii eeta niyega nedii. 16 Wowak Piirapet Joel rii eeta boboyen eecha wor:
17 ‘God rii eecha wor: “Komas nedii adapa diita
boboyen otiikiita: Ada eeji spiriten eyey
yenya gwotiipowkiita.
Gwotiipownak, kwoti yikapwa ye maji piirapet
yecha batawaga eechaba batakiita.
Anapa saniga saniga boboyen kwoti hadiiyey ma yenya
mukuchikiita.
Kwoti apokosaba ma yepa wa sukwi yakiita.
18 Ayo, kata nedii ada eeji Spiriten eeji wakasa
man eeji wakasa miman yenya gwotiipowkiita.
Gwotiipownak, yecha eeji maji sawukiita.
19 Ada harapa boboy mayakan howuk nerek otiikiita.
Ada nosapen eechaka harapa boboy mayakan
otiibakiita.
Pi, hirika, he ye eecha takiita.
20 Ya niy siikiita.
Niiwiika siipa nayim siik piga siikiita.
Komas Harapa Ma riiti nedii yakiita.
21 Eeta nedii kata ma ye Harapa Ma riiti hin habatanak,
riipa yenya yesokwa yichikiita.’
 
Wowak, piirapet Joe rii eecha wor.
22 “Isrel ma, kwota diita maji na meeji. Ada Nasaret Jisas riina bato. God riita riina hisiirek, riita harapa nyegerabo tar boboy mayakan otiir. God riita otiirek, riita harapa siirenoboka eecha otiir. Kwotak otiir kwo hechi hikitar. 23 God riita riiti inyakak mapo hikichi otiirek, Jisas riina kwoti tapak how tar. Riina how harek, kwota riina sowakwor. Kapasek otii tar ma yecha riina mek ji siitii chir. 24 Harek, God riita riina awasen yesokwar. Otii yesokwarek, Jisas riiti kapa meeji tawa boboyen ha tawa boboyen riita kwoyavar. Ha tawa eem eeta riina neekikasakech. 25 Devit riita diita Jisas riiti majin eecha wor:
‘Ada hecho Harapa Ma rii adaka tawa.
Riita eeji mama yepak tawa.
Tawak ada akiikasakech.
26 Eena eeji inyaka wopu eeta kwoya hikitu.
Ada maji batawey,
an wopu sato.
Ada mabak tawey, ada yihapakatawak Harapa
Ma riin kowutu.
27 Miita eeji mayin ha tawa eemek saka yeechi
heechikiitawak.
Miita miiti hehar otii tar Kepi Ma kwopa siitawa
eemek saka yeechi heechikiitawak
28 Miita eechaba eechaba takiitawa nobo ana mukuchir.
Miita adaka eecha tanak, eeji inyaka iipa
kwoya hikitakiita.’
29 Pita rii kawka eecha wor: “Yaka kumwoy, ada noti wayega Devit riina kwona maji geenyik bakiita. Rii harek, eeta chirek, riiti tiiriimo apa notaka tawa. 30 Rii eeta piirapet. Worek, rii God riita riina wochar majin hiki siitiichir. God riita riina wochar, Devit riiti neja por anapa otiiniga aka tabo yima siikiita. Riita tarebaga riiti neja riipa eechaba siikiita. 31 Devit rii mashi her eeta boboyen God riitapa komas eecha otiikiita, rii Kraist saniyeechi sokwa tawa boboyen eena wor: ‘Riina ha tawa eemek saka yeechi heechirek. Riiti maba saka kwopa siirek.’ 32 Diita Jisas riina God riita otii saniyeechi yesokwar. Eecha otiirin, nota her. 33 Riina God riita riiti mama yepak yesokwa yichir. Yesokwa yichi riita riina Holi Spiriten har. Riina wocharin eena har. Ma mima akar majin batawey, no hecho apa riita nona gwotii tawey, kwota meeji taweyn, hechaweyn eena hawa. 34 Devit riita diita majin wori, rii hevenek takasakech. Rii eecha wor,
‘Eeta God rii eeji Harapa Ma riina eecha wor,
“Eeji mama yepak diika na yi.
35 Yichanak, miiti o ana pichawa man ada otiiniga
 
yepa miiti yatii seechitar worebega eecha siikiita.’ ”
36 “Worek, eyey Isrel ma mima sa hiki ta eeta Jisas riina kwota mek ji siitiichiri, God riita otiirek, rii eeta Harapa Ma siir. God rii otiirek, rii eeta Kraist.”
NOKWAPA NOKWAPA MA MIMA YENYA UKU YEECHIR
37 Ma mima ye diita maji meejirek, yechi bii harapa nomoyar. Nomoyarek, yecha Pita riina anadii aposel yenya eecha woher, “Yaka kumwoy, nota boy shecha otiik?”
38 Pita rii awasen wor, “Kwota eyey noti kapasek boboyen na kayek heechi Jisas Kraist riiti hik na uku yeetii ta. Wonyak, kwoti kapasek boboyen rii kwoyava yakiita. Wonyak, kwota God riita ha tawa boboyen, eeta Holi Spirit eena yakiita. 39 God riita wochar boboyen kwona kwoti neja yenya har. Nokwapa nokwapa ma mima yepak tawey yenya har. Kata ma yenya noti Harapa Ma, noti God, riita mayama habatawey, wochar majin har.”
40 Pita riita diita majin yenya wochar. Riita akar kiyapo majin yenya babatar. Rii eecha wor, “Kwo na mayama yesokwa yichi. Harapa kapasek otii tawa boboy diita kapasek tawa ma yechak yakiita. Opoche kwona diina yabatanakech!” 41 Worek, nokwapa nokwapa ma mima ye riita sawor majin meejichi hiki siitiichirek, uku yeechir. Eeta 3,000 ma mima kaw yecha hiki siitiichirek, ye Jisas riina hiki siitiichichawa ma yenya ya yopo yichabar.
MAPO KRISTEN SIITAWA MA YECHA OTII TAWA ABO
42 Worek, yecha aposel yecha pokii tar majin meeji tar. Yecha awasen awasen kiyapotar. Awasen awasen a tar. Awasen awasen God riina maji batar. 43 Nokwapa nokwapa merikal nokwapa nokwapa nyegerabo tawa boboyen Aposel yecha otiir. God riita otiirek, yecha otiir. Otiirek, eyey ma mima ye henebarabor. 44 Eyey Jisas riina hiki siitiichichawa ma ye awasen awasen kiyapochi otiitar. Yecha yechi sagan awasen kiyatayechi tar. 45 Yecha yechi saga akar man harek, yan yeechi Jisas riina hiki siitiichichawa ma yenya homachir. Ma yen dopotarek, eena homachi har. 46 Eyey yadii yecha Ju ma yechi lotu akak ya yopo yichir. Yecha yechi akak aboboy kwoya hikichiniga atar. 47 Yecha God riiti hin habaniga yesokwa yichitar. Akar ma ye yenya hechi kwoya hechar. Eyey yadii nedii God riita otiirek, ma mima kaw ye ya hiki siitiichicharek, ye Jisas riina hiki siitiichichar ma yenya ya yopo yichabar.