COLOSENSES
Pabloou Colosapienag ẽsap phã deepʉ̈itarr
Chi phãtarr. Chamʉg cartajã ĩchab Efesios dʉ̈i Filipensejö ich jöoi Pabloou cárcel deg simua phãtarrau (1:24; 4:18). Ãb sim ĩchab cárcel deg simua agjö ichdëu Filemonag phãtarr. Mag jöoi Filemón Colosapierr ajim aajem. Mʉkhʉʉn carta thum jayapwe Tíquico Onésimo dʉ̈i pʉ̈iwi am gaau deepʉ̈itarrau (4:7-9).
Chijã khʉʉn atheeta phãjĩ. Pabloou ũurwai Colosaam iglesia ee maestronaan anʉmta sĩi sëukha nem jaau nʉrrjëem khʉʉnjã nʉm ajim aajem. Makhʉʉnau ag eyaajã khaba sĩi parhoob nem jaau nʉmua ʉ̈u chadcha ʉ̈kha durrum khʉʉndam warag khaibagta wau wënʉrrajim anaabá. Magta Pabloou Colosapien chi ʉ̈kha durrarr khʉʉnag mʉg ẽsapdam phã deepʉ̈ijim aajem, mag nʉrrjëem khʉʉnag ʉdʉʉr amach khũgur aum ugua.
Amau jaauwai Cristo iek ʉ̈kha nʉm khʉʉnaujã angelnaan chi thierrnaan ʉ̈gthar nʉmʉgta jëeuju aai nʉm a jaaujeejim anʉm. Mag nʉm dʉ̈i ĩchab dich mehëujã phʉʉrbichpinaa tagam ley Moiseeu phã pʉatarrjã ʉʉrkhaju aai nʉm aajeejim aajem. Mamʉ magpaijã khaba, amau nem khaigbacha jaaujerran, õrag jaauwaijã Jesús chan Ẽwandam khaba sĩi angeljöpaita sim a jaaujeejim anaabá, warag i serbiibag phë nʉm iekhau.
Khan jawaag ajĩ. Mag sĩi nem agchajã jaauba nʉrrjëem khʉʉnag ʉ̈u maach peerdʉajem iek ʉ̈kha durrum khʉʉn khũgurpimaaugauta Pabloou amag ajapha jaaujim, jãga sĩerrʉ́ Cristo maimua khani jãgjĩ mag Cristoou maach kõit (1:15-23; 2:8–3:4). Biblia gaai libro khapan thʉnʉm gaai mag iek jʉrkhiin, mʉg Colosenses gaai jaau sim khãai ajapcha jaau sĩsidʉm oobaju.
Mʉg carta Colosapienag deepʉ̈itarr thʉ̈ʉrwai peer Efesopienag deepʉ̈itarrjö paimʉʉ sim, khĩirjug dakha naawai. Mag naab mamʉ, chi tema chaar amau jaau nʉmʉn khĩethuupai sĩsidʉm. Efesios gaai chi carta ëntër oowai, jãga maach Cristo iek ʉ̈kha nʉm khʉʉnta i morkhanaa i iglesiakha nʉ a simta jaau sim. Maimua jũrr mʉg Colosenses gaai jaauwai, Cristo Ẽwandamkhanaa ichta mag iglesia Pör aawai ichdëupaita õor ich aar öbërju ayaa apiejem a sim.
1
Salud
1-2 Mʉʉn Pabloou, ich Ẽwandamau khõsi sĩerrjö ich Jesucristooucha ich i jaaumkhĩir jʉr autarr. Muata mʉg ẽsap phã deepʉ̈i chirʉm, Colosas phöbör ee Cristo iekta ogdʉba ʉ̈kha durrum gaaimua Ẽwandam õorkha nʉm khʉʉnag. Mua pãar kõit maach Aai Ẽwandamag jëeu chiraajem, ʉ̈u dʉ̈rrcha pãar eeg oonaa pãar khõinaa phë wai sĩemkhĩir. Maach ermano Timoteo mʉig mʉ dʉ̈i sim; i iek iruajã pãrag salud aajem.
Pabloou chi ʉ̈kha durrum khʉʉn kõit Ẽwandamag jëeujerr
3-4 Mau marag jaaucheewai mag pãrau Jesucristo iek pãachdëu thãraucha ʉ̈khatarrta ogdʉba ʉ̈kha nʉm dʉ̈i ĩchab thum Ẽwandam õorkha thʉnʉm khʉʉn dʉ̈ijã agdaujö kha khõsi nʉm a ũr naawai, pãar kõit maach oraa nʉmpierr Ẽwandamagta ʉ̈u ajim a durraajem, ajapcharan maach Pör Jesucristo Ayagma. Marau khaphʉ nʉm, mag chadcha thum agdaujö wir aigjã pãach khapeen daupii nʉmʉn, pãachjã thum Ẽwandamau ich aar auwi ich mag i dʉ̈i nʉisiju khaphʉ nʉm gaaimuata mag nʉm. Warrcha chadcharam iek pãachdëu ũrwi ʉ̈u peerdʉ nʉisierr edwe Ẽwandamau pãach ich dʉ̈i mag phë aujujã khaphʉ ajierram. Ich jãg pãachig jaaubaawai pãrau ʉ̈khatarr iekpaita ĩchab deeum khʉʉn eejã durrpierr aaidʉmam. Mag jaau nʉm ũrwi ʉ̈khamam khʉʉnjã khapaana paaukhamam dʉ̈i ĩchab õor pöoma warr amach khaigba wënʉrraajerr khĩirjug isegwi õor wäjäaunag paaukha thʉnʉm, ich jãg ʉ̈u Ẽwandamau chadcha ich garmua maach khõsi aajem iek jaau nʉm ũrwi pãachdëu ʉ̈khatarrjö. Pãrau khaphʉ nʉm, mag Ẽwandamau ich garmua maach khõsi aajemʉn chadcharau. Ich magta maach khodam Epafras maadëu i iigjemua pãrag jaaujim, pãrag ich mag iek jaau sĩethuurwai. Pãrau khaphʉ nʉm, iruajã ĩchab pãachig Cristo iek jaau nʉm gaaita ogdʉba ich jãg jẽedʉ khitaajem. Ich Epafraauta mag Ẽwandam Akharau pãrag pãach ee agdaujö pãach khapeen daupii api simjã mau maar aar jaauchëjim.
Maguata maachdëu mag ũr autarr aigmua warag pʉaba Ẽwandamagta jëeu naajem pãar kõit, ich khĩirjugta pãrag deemkhĩir; maagwai ichdëuta ĩchab ich Ẽwandamau nem waupim khõsimjã thumaa pãachig khaphʉ apimkhĩir. 10 Irigta pãar kõit jëeujem, chadcha maach Pör Cristo dënkha nʉm khʉʉnjö pãach nem wau nʉmpierr irua nem khõsimta wau nʉmua dich khapeen dʉ̈i nem ajapha aju ayaamjã waub khaba waumkhĩir; mag nem wau nʉm gaaimua warag ich Ẽwandamjã ajapcha pãachig khap amkhĩir. 11 Agjö jëeujem ĩchab, ich Ẽwandam thumaam khʉʉn khãaijã jua theeg sĩerrʉmʉgta ich jua theeg pãach gaai phẽs deebarmua pãach ich dʉ̈i ubʉ naamkhĩir, maagwai bʉ̈ʉr abarm gaaimua phithurg aadëp awiajã magʉmjã juapadam thethe ãwat naamkhĩir. 12 Maagwai pãrau onee ich Jöoi chi Ayagjã ʉ̈u ajim aju. Ichdëuta pãachjã warm khʉʉn agjö ya ʉ̈kha wënʉrrʉm khʉʉn dʉ̈i ãba ich aar auju ayaa apʉ̈inaa pãach ich dënkha naawai pãar dʉ̈ijã ʉ̈u aju. 13 Meperau maach sĩi khĩmie durrag phë arraag ichta maach khãai ʉ̈rpai sĩerrjã, ʉ̈u ich Ẽwandamauta maach peerdʉ auwia jũrr ich Iewaa ichdëu jãsene aajemta maach Pörkhapijim, 14 ich Ẽwandam dʉ̈i maach iekkhõr pöm narrjã ichdëuta ich bagau maach pekau chugpaapʉ̈iwia ich dënkha autarr aawai.
Cristoou ich thõopibarmua Ẽwandam dʉ̈i khõinaa apitarr
15 Ẽwandam chan maadëu pöd ooba aajem, mamʉ Cristo ich Aai dʉ̈i khĩir ãba sĩerraawai ʉ̈u i gaaimua khaphʉ nʉm jãga sĩerrʉ́ Ẽwandam chi Aaijã. Ichta nem thum ompaaju nawe ich Aai dʉ̈i sĩerr aawai ichta nem thum thʉnʉm Pörkha sĩerrʉm. 16 Nem thum maadëu daúa oonaa pöd ooba aajempa mʉg jẽb gaaim maimua ʉ̈gtharm magwe thʉnʉmjã Ẽwandamau i gaaimuata ompaajim: reinaan, maimua edjã eem magwe Ẽwandam chognaanjöm; magʉm khʉʉnta amachta ʉ̈rpainaa iek theegnaa jua theeg sĩsidʉm khʉʉnjã ichdëuta thum ompaajim, magʉm khʉʉnagjã ichdëu ig simjö ich ipierraa amkhĩir. 17 Ich Cristoon mag nem thum mʉg thʉnʉm ompaaju nawe sĩerrʉm; ichdëuta mag nem khĩir pogkhe thʉnʉmjã thum amach sĩsid ajupierr sĩumajim. 18 Mamʉ magpaijã khaba, ich Cristota iglesia Pöröu, maagwai jũrr chi iglesia sĩi i morou. Mag ichta warrgarwe sĩerrarrjö, iiu phiidʉju aigjã ichta ĩchab nacha phiidʉjim, magbarm gaaimua nem thum thʉnʉm khãaijã ichta ʉ̈rpainaa ichta ĩchab mag chi phiidʉtkhaju khʉʉn dʉ̈ijã ich mag chi Pörkha sĩerraag. 19 Ẽwandamau ich Iewaa Cristota pʉ̈ijim, ich Iewaa õor khĩir thegbarm gaaimua ichchata õor ee sĩeichemjö amkhĩir. Mag wounag pawiajã ichiita agtha ich Aai dʉ̈i simjö ich mag Ẽwandamkha sĩerrajim. 20 I gaaimuata ĩchab mʉg durr gaai thum õor thʉnʉmjã amach pekau gaaimua Ẽwandam dʉ̈i iekkhõr wai narrjã ʉ̈gtharm magwe thʉnʉm khʉʉnpa ich dʉ̈i khõinaa naapiju aai apijim. Ĩs mag i dʉ̈i khõinaa nʉmʉn, Cristoou maach peerdʉ awaag ich bag pakuls gaai ãrpitarr gaaimuata mag i dʉ̈i khõinaa nʉm. 21 Warr pãrau Ẽwandam khaugba aawain pãran chadcha okhoo naajim, mag pãach khaibag gaaimua i dʉ̈i iekkhõr paar narr aawai. 22 Pari ĩs ya magba, ich garmuata jũrr ich dʉ̈i khõinaa phë wai sim, mag Cristo wounag pawi ʉdʉraa ich thõopitarr gaaimua. Mag pãar ich dʉ̈i khõinaa apitarran, ich atheepai nem wau wënʉrrʉmua bʉ̈ʉrjã pekau chukhu, kulp chukhu ich aar phë awaagau. 23 Pari mag bʉ̈ʉrjã kulp chukhu ich aar pãach phë aupiegan, ich mag pãachdëu ʉ̈khatarr iek gaaita ubʉnaa ĩchab pãachdëu maach peerdʉajem iek ʉ̈khatarr edwe ich dʉ̈i ich mag nʉisijujã khaphʉ nʉisierr khĩirjugta khĩir okhooba wai wënʉrraju aai nʉm. Ich mʉg maach peerdʉajem pãrau ũrtarr iekpaita ĩchab durrpierr jaau nʉm; mʉchdëujã ich ag iekta jaau khitaajem.
Pablo phidag judionaan khabam khʉʉn ee
24 Mag maach peerdʉajem iek jaau chitʉm gaaimuata mʉʉn mʉg dau aphʉʉ preso chirʉm. Mamʉ mʉch mʉg chirʉmjã jũrr pãachta ʉ̈u amkhĩir aawai mag aphʉʉ chirab mamʉ onee chiraajem. Mʉch mʉg wai nʉm gaaimuata, ich jãg Cristoou iglesia ich morkha sim athee ich dau aphʉʉ wai naawai ãwattarrjö, mʉchdëujã agjö i dënjö aju ẽkha chiraajem. 25 Mua khaphʉ chirʉm, Ẽwandamau mʉʉta ich iek ʉ̈kha nʉm khʉʉn juag oojemkha wai sim, pãar maar meeun khabam khʉʉnpa ʉ̈u amkhĩir. Mag phidagta ichdëu mʉrʉg deetarr aawai maach peerdʉajem iekta meerba muan thum jaaumaajem; 26 ajapcharan warrgarwe Ẽwandamau ich mag bʉ̈ʉrjã õrag jaauba sĩi ichdëupai khaphʉ wai sĩerrma; magtarr ĩsta ya ich dënkha nʉm khʉʉnag khaugpibarm. 27 Magta pãarjã i dënkha nʉm khʉʉn aawai maar meeun judionaan khaba awiajã Ẽwandamau pãragjã khaphʉ apibarm, jãga mag Cristo maach thãar ee sĩejemta mʉg atag ʉ̈gthar paaukhawijã oo wai wënʉrraju. 28 Mag Cristota muan sĩi ikhõrjã khaba õrag jaau khitaajem, ich Ẽwandamau mʉchig khĩirjug deetarrdamau am wawimamua; ajapcharan Cristoog sĩi khaibag chukhu ajappha khithëemta irig ich jua eecha phëdeegma. 29 Magaag atheeta mʉʉn maach peerdʉajem iek jaau chirʉm, magaagjã ich Cristo jua theeg mʉ gaai simuata mag jaaupi sĩewai.