2
Alaa geyana fe
Mike 4.1-3
1 Feni itoe makɛnɛn Amɔsi a dii xɛmɛna Esayi nan xa lan Yuda nun Yerusalɛn ma.
2 Waxati famatɔni
Alatala Batu Banxin geyaan naxan fari
na danguma nɛn geyane birin na,
a lu geyane birin xun ma,
siyane birin yi lu fɛ a ma han!
3 Siya wuyaxine fama nɛn,
e a fala, e naxa,
“Ɛ fa, en siga,
en te Alatalaa geyaan ma,
Yaxubaa Alaa banxini.
A xa en xaran a sigati kiine ma,
alogo en xa bira a kirane fɔxɔ ra.”
Amasɔtɔ sariyan minima nɛn Siyon yi.
Alatalaa falan minima nɛn Yerusalɛn yi.
4 A findima nɛn kitisaan na siyane tagi.
A yɛngɛne ɲanma nɛn yama wuyaxi tagi.
E e silanfanne bɔnbɔma nɛn
e yi e rafala ɲinge kenne ra,
e tanbane yi rafala wɔlitɛne ra.
Siya yo mi fa silanfanna tongoma gbɛtɛ xili ma.
Yɛngɛn mi fa maxaranɲɛ mumɛ.
5 Yaxuba yixɛtɛne, ɛ fa,
en sigan ti Alatalaa kɛnɛnni!
Alatalaa lɔxɔn findixi kitisa lɔxɔn nan na
6 Ala, i bata i mɛ i ya yamaan na,
Yaxuba bɔnsɔnna,
bayo koron bɔnbɔne waraxi ayi
naxanye sa kelixi sogeteden mabinni,
yiimatone fan bata wuya ayi
alo naxanye Filisitine konni.
I ya yamaan nun siya gbɛtɛne bata so feene yi.
7 Yamanan nafexi gbeti fixɛn nun xɛmaan nan na,
a nafunla mi nɔɛ yatɛ.
Yamanan nafexi soone nan na,
a yɛngɛ so wontorone mi nɔɛ yatɛ.
8 Yamanan nafexi suxurene nan na.
Muxune e xinbi sinma e yii fɔxɔn nan bun ma,
e tan yɛtɛɛn seen naxanye rafalaxi.
9 Nayi, muxune birin e mafelenma nɛn,
e fe yi magodo.
Ala, i nama e rakeli de!
10 Ɛ sa ɛ luxun fanyene bun,
ɛ so bɔxɔn bun ma
alogo ɛ xa ɛ gi Alatala bun ma
naxan magaxu,
e nun a binye gbeen nɔrɔna!
11 Adamadi yɛɛ rawasoxine xun sinma nɛn,
wasodene yi mafelen.
Alatala nan keden ma fe yitema na lɔxɔni.
12 Amasɔtɔ Alatala Sɛnbɛn Birin Kanna lɔxɔn mamɛma
a kelima wasodene nun yɛtɛ yigbone xili ma lɔxɔn naxan yi,
a yi ne ragodo naxanye e yɛtɛ yitema.
13 A kelima nɛn Liban suman kuyene birin xili ma
e nun Basan yamanan warine birin
14 e nun geya gbeene nun yire matexine birin,
15 e nun kore banxine nun makantan yinne birin,
16 e nun Tarasisi kaane kunki gbeene nun gise faɲine birin.
17 Wasodene mafelenma nɛn,
yɛtɛ yigbone fe yi godo.
Alatala nan keden ma fe yitema na lɔxɔni.
18 Suxurene birin yi lɔ ayi.
19 Muxune soma nɛn faranne nun yinle ra
alogo e xa e luxun Alatala ma,
naxan magaxu,
e nun a binye gbeen nɔrɔna
a na keli bɔxɔni maxadeni.
20 Na lɔxɔni,
muxune e suxure gbeti daxine nun
xɛma daxine rawolima ayi nɛn sulumɛne nun tuyɛne bun
e suxuren naxanye rafalaxi e batu seen na.
21 E soma nɛn fanye longonne nun yinle ra
alogo e xa e gi Alatala ma,
naxan magaxu
e nun a binye gbeen nɔrɔna
a na keli bɔxɔni maxadeni.
22 Nayi, ɛ xɛtɛ adamadiine fɔxɔ ra
nii raxili keden peen nan fa e nun sayaan tagi.
Nayi, nanse e tan na?