1 TESALONAIKA
Pol ere Tesalonaika komri tatame emne kiyi bas rasem siglou.
Kiyi late tuma.
Gwote siglou Pol eter Tesalonaika komri Kristen tatame etemne kiyi bas rasen newopitim siglou. Tesalonaika kom e kantri Grikke tetan. Gwopte eme kom sig Salonaika wobe. E kom eisau.
Kiyi Pol ere Tesalonaikak yin Jisas erne kenawaike abobe tuma emne wusoubetem. Aposel 17:1-9 etep wobe. Ere Tesalonaikak temenem, Juda tame kau eme erne pen sate wom. Etep womke, ere Tesalonaika kom mesginin yim. Sene ere akeite akeite komke yin tuma wusoubetem, ere Tesalonaika komri Kristen tatame emne abon siglou pes emne bas rasen newopitim. Gwote siglou e kiyi bas rasem siglou.
Pol ere emne abon etepke bas rasem. Kem Jisas erne kenawaike abobe, kem tatame emne pap yewon kobo labe, e yenbo. Keremri komri tatame eme kemne yaper nenbe, kem pap yaper mane tete. Kem Jisas eterne kenawaike som abobetete.
Kiyi Tesalonaika komri tatame eme Pol erne etep wometem. Krais ere sene mak yamente, Kristen tatame eme sate, eme som temente o? Pol ere gwote siglou bas rasen etep wom. Ye. Eme som noub temente nenbe. Tesalonaika eme erne kiyi akeite tuma etep wometem. Be yabelke Krais ere sene yate? Pol ere gwote siglou bas rasen awosein etep wom. Krais ere sene yate yabel nema beke met. Nema ete yabel kir kouten. Nema yaku keren yite, yuri Krais ere ek sene yate. Pol ere emne pap yenbo mette tuma emne bas rasem.
Pol ere Tesalonaika komri Kristen tatame emne bas rasem tuma gwo.
Sapta 1—3. Pol ere eri yaku kere tamesip etemken eme Tesalonaika komri tatame emne kenake abom.
Sapta 4—5. Tesalonaika eme wule yenboken muresen noub temente.
1
1 Kem Tesalonaika komri Kristen tatame, kem Apei God, Aneyen Jisas Krais etepri tatame. Nema Pol, Sailas, Timoti, nema kemne gwote siglou bas rasbe. Nema abobe, nemri Apei Godken Aneyen Jisas Kraisken epe kemne kobo lan noub eyarte, kem pap yenbo mette.
Tesalonaika komri tatame eme kenawaike abobetem, eme wule yenbo nenbetem, Pol ere metekwasbetem.
2 Kem Kristen tem, eke nema God erne kwokwos kwokwos pir wobe. Nema God erken tuma namden erne wometbe, ere kemne noub nenbet. 3 Kem Apei God erne kwokwos kwokwos kenawaike abobe, eke kem yaku yenbo kerebe. Kem akeite tame emne kobo labe, eke kem yaku eisau keren emne noub eyarbe. Kem neremri Aneyen Jisas Krais erne kouten, eke kem erne mesginte beke abo. Kem etepkap tebe, eke nema kemne kwokwos kwokwos abon neremri Apei God erken namdebe. 4 Kristen geisimase, God ere kemne kobo lan noub eyarbe. Ere kemne kiyi kenem, kem eteri tatame tem. Nema etep metten.
5 Nema God eteri tuma yenbo kemne wusowum, nema tumawou beke wusou. Beraiwai. God Eteri Wouken eteri mure eisau neremken kir temenem, eke kem worwor metem. Nema keremken temenem, nemri nenbetemkap kem lam. Nema kemne kobo labetem. Kem etep lam.
6 Nerem tebetemkap, Aneyen eter tebetemkap, kem etep kir tobobetem. Kem God eteri tuma metem, tatame eme kemne pap wayen kemne yaper nenbetem, kem mus eisau metbetem. Metbetem, kem beke mesgin. Berai. God Eri Wou ere kemne gulelebetem, kem God erne metekwasbetem. 7 Kem etep nenbetem, Masedonia provinsri Kristen tatame, Akaia provinsri Kristen tatame akei eme kemri yenbo tebetemkap metem, eme etep kir nenbetem. 8 Aneyen Jisas eteri tuma kem mekap mibetem, Masedonia provinsri tatame, Akaia provinsri tatame eme metem. Etemwou berai. Kem God erne kenawaike abobekap, nogwape gene genek tetan tatame eme etep metem. Etep tem, nema tuma nogwape sene beke namde. 9 Etem eme nemne etep wobetem. Polnage eme Tesalonaika komri tatame emne yin lam, Tesalonaika tatame eme emne pap yewon noubwai nenem. Kem sukye yaper worabe wule mesginim, kem wouken God seken erne kenawaike abon eteri yaku kerebetem. Eme nemne etep wobetem. 10 God Eteri Yen ere God eri kom Heven mesginin sene yate, kem erne noub kouten. Eme neremken keremken etep kir wusoubetem. Seken. God Eteri Yen, Jisas, ere kiyi sam. God ere erne wou sene newom, ere sene wayen yim. Etep tem, Jisas ere nemne sene petbe, God ere nemne pap sene beke waye. Ere kenawaike beke abo tatame etemnewou pap wayen yaper nente.