Kart daa bseḻ' to beṉ' lao beṉ' hebreoka', beṉ'ka' nonḻilall' Jesucrístona'
1
1 Kani'yi zan shii Chioza' bc̱hine' dii beṉ'ka' wdix̱jee daa golle' ḻegake' na' aga toz ka bc̱hine' to toe' kwenc̱he be'lene' dii x̱ozxto'choka' dill'. 2 Na' ṉaa ba zoa te c̱he yell-lioni, Chioza' bseḻee Xiiṉe'na' be'lene' cho' cho'a xtilleena', na' ḻen' nzoe' gak lall' nee yog'te dii de, na' ḻekzen' bene' yabana' len yell-lioni, diika' bllia Chioza' bia' gak.
3 Ḻen' chli'e ka beṉ' choo beṉ' xen inlleb nak Chioza', na' chli'e ka nakyeṉ' X̱e' Chioza'. Na' ḻen' chone' kwenc̱he yabana' len yell-lioni na' yog'ḻoḻ diika' lle' lla' lawinka' chongakan kon ka bllie' bia' gongakan daa nape' yeḻ' wak kwenc̱he chak kon ka ne'. Na' ḻen' bix̱is biyibe' yic̱hjlall'do'chona' ka bikwase' saaxya c̱hechoka', na' biyolla' biyepe' yabana' gana' chi'e shḻaa de shḻi c̱he X̱e' Chioza', beena' nak beṉ' choo beṉ' xen, na' chṉabia'lene'ne'.
4 Na' daa bene' dga, bli'e nake' beṉ' zak'chi aga ka anjlka', na' ḻekzka' daa goll Chioza'ne' “Xiiṉ'”, nakbia' nake' beṉ' zak'chi aga ka ḻegake'. 5 Ḻa' Chioza' biga golle' ni to anjlka' ka dga golle' Xiiṉe'na':
Li' nako' Xiiṉ',
na' ṉaa daa solo iṉabi'o iṉezi beṉ' nadaan nak' X̱o'.
Na' ni to anjlka' bi golle':
Nad' gak' X̱o',
na' li' gako' Xiiṉ'.
6 Na' ḻekzka' ka bseḻ' Chioza' Xiiṉe'na', beena' nak tlish' tyaj, lo yell-lioni, wne':
We'la'oshga yog'ḻoḻ anjl c̱ha'ka' ḻe'.
7 Na' Cho'a Xtill' Chioza' cho'en dill' c̱he anjlka', nan:
Chone' anjl c̱he'ka' beṉ'ka' chon xshine'na',
ka be' na' ka beḻ yi'.
8 San c̱he Xiiṉ Chioza' nan:
Li' nako' Chios na' iṉabi'o zejḻi kaṉi.
Na' yeḻ' wṉabia' c̱ho'na' nakan dii zej shḻi.
9 Chibailo' yeḻ' ḻi yeḻ' shawaa na' chwiilo' daa nak mal.
Daan Chioza', beena' nak Chios c̱ho', ba bzoe' li' kwenc̱he iṉabi'o,
na' ba bene' ka soacho' mbalaztech aga ka beṉ'ka' nako' txen.
10 Na' ḻekzka' nan:
Lin' nako' Chios, na' lin' bx̱e bsilo' yell-lioni ka wzolon,
na' li'kzan bx̱e bsilo' yabana'.
11 Yog' diika' te c̱hegakin, san li' zoakzo' zejḻi kaṉi.
Na' yog' diika' yiyigakan ka chiyi to xalaan beṉ'.
12 Na' yikwasgako'n,
na' yikobgako'n ka to beṉ' chikob xalaane'.
San li', toz ka zo' zejḻi kaṉi;
biga llia te c̱ho'.
13 Ni shlin biṉ' ye' Chioza' ni to anjl c̱he'ka':
Wche' kwit' de shḻi ni, shlak wzoa' xṉi'ona' beṉ'ka' chakzbani li'.
14 San yog' anjlka' nakgake' wen llin c̱he Chioza', na' chseḻee ḻegake' chaklengake' cho' nakcho beṉ' yisle' kwenc̱he bi kwiayi'cho.