GUI'CHI UCUA LU CA BINNI HEBREU
1
Xiiñi pe Dios beda iní' né laanu
1 Stale tiru ne stale modo huaní' né Dios ca bixhoze gola nu. Chiqué, ora racala'dxi be gabi be laaca xiixa la? uní' né be ti profeta para gabi ni laaca'. 2 Peru yanna ri ma Xiiñi pe be biseenda be, beda iní' né laanu. Ne ma bisaana be idubi naca guidxilayú, ne irá xixé ni nuu, lu ná Xiiñi be, purti ne laa bizá' né ni laabe. 3 Bia'ca nandxó' be nandxó' Xiiñi be, ne casi laabe Xiiñi be. Nandxó' Xiiñi be, ne laa naaze guidxilayú lu ná', ne ni iní' la? napa xidé gaca'. Ra biluxe bixhá Xiiñi be xpecadu nu, bigueta ra nuu be ibá', ne ma zuba cue' be ra cayuni mandar be.
Jma risaca Xiiñi Dios que ca ángel
4 Jma bisisaca Dios laabe que ca ángel, purti Xiiñi laabe, ne nga runi dxi'ba be ca ángel. 5 Qué ñuu dxi ñabi Dios tobi de ca ángel Xiiñi', peru Jesucristu gudxi be ni laa, na be:
Lii nga Xiiñe'.
Dede yanadxí zusihuinne Xiiñe lii.
Bigueta bizeete be Jesucristu sti tiru, na be:
Naa nga Bixhoze be,
ne laabe nga Xiiñe'.
6 Ne dxi biseenda be Xiiñi be lugola ndaani guidxilayú, uní' be na be:
Irá ángel stinne zusuxibi xa ñee be.
7 Chiqué bicaa ti profeta ca diidxa ri lu Xqui'chi Dios:
Runi Dios ca ángel sti casi bi,
ne nuu tiru runi be laaca casi bele.
8 Peru ra riete Xiiñi Dios la? na ni bicaa salmo que rabi laabe:
Lii nga Dios,
ne qué ziuu dxi guiaana dxí de guni mandar lu',
ne zuni mandar lu jneza.
9 Rucaa ique lu guni lu ni nacha'hui',
ne nanala'dxi lu ni nadxaba'.
Nga runi ma bisieche Dios stiu' lii jma que irá xixé.
10 Ne laca na ni bicaa salmo que rabi laabe:
Señor, lii bizá' lu guidxilayú dxi uyá',
ne laca lii nga bizá' lu ibá'.
11 Zadxiña dxi initilú irá ni bizá' lu',
peru lii nuu rou'.
Zio'xho guidxilayú ne ibá'
casi rio'xho xhaba binni.
12 Ne zutopa lu cani casi rutopa binni xhaba,
ne zaca cani nacubi.
Peru lii la? zaqué si nuu lu',
ne qué zuchaa lu',
ne qué zazaa xhiza lu'.
13 Laca cá lu gui'chi ra na Dios rabi Xiiñi':
Gudá' cui gá lu cuee
laga quixhe dxie irá cani rucaa lú lii,
dede ora ma biaba ca xa ñee lu'.
Peru qué huayuu dxi gabi be tobi de ca ángel stibe zacá. 14 Purti ca ángel la? espíritu si laaca', ne runi ca xhiiña be. Ruseenda be laaca rigacané ca ca xpinni be ni chi ilá.