San Lucas
De riidz nap nu rniiñ nu nac Jesuuz dub gal mod nu mnii Luc
1
Riidz nu loga la ni Luc
1 Zigy mbecy gush dey riiñ nu caay de coz nu guc lat den 2 dub gal nu na de riidz nu bzeeñ de yu nu bzac urlo la de coz zeꞌ nese nu bzub la gyiꞌñ, de riidz nu bzeeñ de yu nu bzu riiñ nu tush las yu de riidz zeꞌ. 3 Ndeꞌ nu ru, shi Tioj, como ya̱ nap bdugyi̱ꞌ nu nac dela coz zeꞌ, orzeꞌ ya̱ rze̱e̱ nu nap benu ca̱a̱ dela coz zeꞌ lo gyicy, tub ga la riidz nu lugaar niñ. Orzeꞌ zeeda̱ ñii nir. 4 Gun orzeꞌ gad lagy ru nu rishli dela coz nu bdulyuu nir.
Tub anc ni Ñgyoozh biid niiy nu gal Waa nu griib nis mbecy
5 Orzeꞌ tiem nu guc Herodes rey ni de gyedz nu yuꞌ lo yu ni Judea, bzu tub uz nu la Zacarí. Orzeꞌ yu zeꞌ byeeñ yu lo tub nac uz nu rnii dey uz ni Abías. Zeꞌ mñaay lam Bee. Gazaꞌ mi zeꞌ nac mi nez Aroong. 6 Orzeꞌ rup laa dey bicy dey coz nu seꞌñ par lo Ñgyoozh. Bicy dey dela coz nu mniim lo leey nim. Orzeꞌ ni tub la mbecy wangac nii dey nu yuꞌ falt niy. 7 Tees sac iꞌñ dey, gun Bee wangac chuꞌ iꞌñ mi. Nunu rup laa dey bi gubel yu.
8 Orzeꞌ tub tiem de uz nu nac nu Zacarí briic dey sman niy. Orzeꞌ gazaꞌ Zacarí bzuy riiñ lo Ñgyoozh. 9 Orzeꞌ de uz blooy cuen ich cushtom ni dey, nunu laabaꞌ Zacarí bdugyiy nu chuꞌy nañ yuꞌ nu driib zily mbecy Ñgyoozh, Shuaan na, par nu zu dzeeñ yaal yu. 10 Na lat nu rzu dzeeñ yaal yu, orzeꞌ dela mbecy nu rca Ñgyoozh lugaar zeꞌ byatublaazh dey ich yuꞌ zeꞌ nu nii nu dey mi. 11 Orzeꞌ lat zeꞌ bruu zac tub anc ni Ñgyoozh lo Zacarí gusuy par bee mez zeꞌ nu zub psiꞌñ yaal. 12 Orzeꞌ ornu bzaac Zacarí anc zeꞌ, orzeꞌ lorgut lay. Orzeꞌ tonaꞌ la gudzib yu. 13 Tees anc zeꞌ nay rab yu Zacarí:
―Cueꞌ dzib ru Zacarí, gun Ñgyoozh “O” mniim gush mi de riidz nu mniir lom, nunu mñaar, Bee, gaal mi tub mdoo. Zeꞌ mdoo zeꞌ co lar yu Waa. 14 Orzeꞌ tonaꞌ la chesu cyit lagy ru nu nac yu, nunu zigy mbecy gyet lagy yu nu nac nu gal mdoo zeꞌ. 15 Gun yu zeꞌ gac yu tub yu lily par lo Ñgyoozh. Orzeꞌ rila woꞌy ñup ni urbyay. Ni woꞌy mashcaly. Ni woꞌy ni tub la loñ. Nunu Espiriit Yon ni Ñgyoozh bi riib ic zaꞌ lam nañ lardooy nese anzir nu gal yu. 16 Orzeꞌ yu zeꞌ gyicy yu nu zigy mbecy Israeel ca dey Ñgyoozh, Shuaan dey. 17 Orzeꞌ yu zeꞌ chay riiñ ni Ñgyoozh anzir nu cyid Shuaan na. Fert gyicy yu riiñ nim gal nu bicy Elías, yu nu mnii por cuen nim. Gun orzeꞌ gyicy yu nu gyanap riidz ni de mbecy nuy iꞌñ yu, nunu gyicy yu nu syaꞌ de mbecy nu rnid ruꞌ lo de mbecy nap. Orzeꞌ ni mod gac par nu zu lily yu de mbecy par ornu cyid Shuaan na ―na anc zeꞌ.
18 Orzeꞌ na Zacarí rab yu anc zeꞌ:
―¿Lac mod gad lagya̱ nu gac ñii gal nu mniir? Gun ya̱ dzi byabela̱. Nunu niꞌ ziꞌl mña̱a̱ ―nay. 19 Orzeꞌ na gaꞌ anc zeꞌ:
―Ya̱ naca̱ Gabrieel. Ya̱ zu̱ lo Ñgyoozh. Nunu mi zeꞌ bzuu nez mi ya̱ nu yap ne̱e̱ du̱ ru nunu rica̱ nu gad lagy ru de riidz nap nu mne̱e̱ zeꞌ. 20 Orzeꞌ na, como wancheña lagy ru de riidz nu mne̱e̱ lor, de riidz nu segur la gac, orzeꞌ ndeꞌ nu gyac ru mbecy gop. Wac niir gashtal shuub la dzi nu gyuꞌ ni de riidz nu mne̱e̱ ―na anc zeꞌ.
21 Lat zeꞌ yuꞌ de mbecy rbez yu Zacarí ich yuꞌ. Gush dey shcab ben lagu dzi blaay nañ yuꞌ ni Ñgyoozh. 22 Na ornu bruuy nañ yuꞌ zeꞌ, wangacaꞌ niiy. Orzeꞌ gud lagy dey nu bdeꞌ loy nañ yuꞌ zeꞌ, gun bicy yaay lo dey. Nunu ni la mod nay byeeñ yu. Wangacaꞌ niiy.
23 Na ornu pshuub dzi niy bruuy sman, orzeꞌ yay yuꞌy. 24 Orzeꞌ despuees ni de nu ndeꞌ, orzeꞌ guꞌ iꞌñ mñaay Bee. Orzeꞌ nañ gaay beey wancyuu lam yuꞌm. Orzeꞌ mnii toom: 25 “Ni bicy nu Ñgyoozh ya̱, gun orzeꞌ na cueꞌ güii naañ mbecy lo̱ par nu sac iꞌña̱”, mnii toom.
Tub anc mniim nu gal Jesuuz
26 Na ornu bi bzaꞌ shuup beey nu yuꞌ iꞌñ Bee, orzeꞌ Ñgyoozh bzeed mi Gabrieel, yu nu nac anc nim, zay Nazaret, tub gyedz nu ri lo yu ni Galilea. 27 Zay lo tub fiñ feñ nu nigul dzeel yu gyeey. Fiñ zeꞌ lañ Li. Fiñ zeꞌ bi guc nap niñ nu chelaañ See, tub mbecy nu bruu lat nez rey Dabi. 28 Orzeꞌ guꞌ anc zeꞌ zeꞌ nu zub ñi. Orzeꞌ nay rab yuñ:
―¡Shnur! ―nay―. Ñgyoozh nac num ru, nunu tonaꞌ la nap gyicy mi num ru ―nay.
29 Orzeꞌ ornu bzaac ñi anc zeꞌ, tonaꞌ la deet guc nañ lardooñ nu nac riidz nu mniiy. Orzeꞌ gush ñi shcab ben lac mod yaruu riidz nu mniiy loñ. 30 Orzeꞌ na anc zeꞌ rab yuñ:
―Li, cueꞌ dzib ru, gun Ñgyoozh bi psaꞌ lagy mi nu nap gyicy num ru. 31 Ru chuꞌ iꞌñ ru. Orzeꞌ gaal ru tub mdoo gyeey. Orzeꞌ co lar mi Jesuuz. 32 Mi zeꞌ gac mi tub biñ lily. Nii dey nu “Mi zeꞌ iꞌñ Ñgyoozh biñ nu gya zir zu”, nii dey. Orzeꞌ Ñgyoozh gyicy mi nu gac mdoo zeꞌ nir rey lugaar ni gyitoo bel nim Dabi, 33 gun orzeꞌ gyub ic mi de nez Israeel tub la, nunu rila wayeca nu gyub ic mi den ―na anc zeꞌ.
34 Orzeꞌ na gaꞌ Li:
―¿Lac mod chuꞌ iꞌña̱ zeꞌ rila nigul dzeela̱ biñ gyeey? ―nañ.
35 Orzeꞌ na gaꞌ anc zeꞌ:
―Espiriit Yon ni Ñgyoozh gyet mi nu gac num ru. Nunu Ñgyoozh, biñ nu gya zir zu, tonaꞌ la coz ily gyicy mi lat nu gac num ru. Ndeꞌ nu mdoo nir nu gal gac mi mbecy yon, tub mbecy nu nii dey “Iꞌñ Ñgyoozh”, nii dey. 36 Niꞌ nis ru, Bee, gaal mi tub mdoo mas byabel mi. Biñ nu rnii dey nu wagac chuꞌ iꞌñ, mi zeꞌ bi bzaꞌ shuup beey nu yuꞌ iꞌñ mi, 37 gun Ñgyoozh gac gyicy mi dela coz ―na anc zeꞌ.
38 Orzeꞌ na Li:
―Ya̱ naca̱ tub fiñ feñ nu ricy de coz nu rlagy Ñgyoozh. Orzeꞌ Ñgyoozh gyicy num ya̱ gal nu mniir ―naañ.
Orzeꞌ laab ndeꞌ la bruu anc zeꞌ yay.
Li chañ cha güiiñ Bee
39 Laab tiem zeꞌ bruu Li zeꞌ nu rcyiiñ ñi zañ carer tub gyedz nu ri tub logyiꞌ ni Judea. 40 Na ornu bruꞌñañ, orzeꞌ guꞌñ nañ yuꞌ Zacarí. Orzeꞌ mnii nuñ Bee ñgyoozh. 41 Na ornu güeñ Bee riidz nu mnii Li, orzeꞌ pcueñ mdoo nañ mi. Orzeꞌ briib ic zaꞌ la Espiriit Yon ni Ñgyoozh mi. 42 Orzeꞌ ye la mniim:
―¡Nap zir gyicy nu Ñgyoozh ru gazeꞌ deꞌ zir biñ mñaa! ¡Nunu niꞌ ziꞌl nap gyicy num mdoo nir! 43 ¿Cyu guc ya̱ par nu cyid güii ñaa Shuaana̱ ya̱? 44 Cuanzir nu güeña̱ nu mnii nur ya̱, orzeꞌ pcueñ mdoo naña̱ nu dzi bet lagy ñi. 45 Dzi nir nu guña lagy ru nu gyuꞌ niñ gal nu mnii Ñgyoozh, Shuaan na ―na Bee.
46 Orzeꞌ na Li:
Ya̱ gyabica̱ gyel mbecy ni Ñgyoozh nu dutuub la lardo̱o̱.
47 Tonaꞌ la yet lagya̱ nañ lardo̱o̱ nu nac Ñgyoozh, biñ nu co mbañ ya̱.
48 Gun mi zeꞌ bduꞌ cuen mi ya̱, tub fiñ feñ nu ricy coz nu rlagy mi.
Bzaac mi nu naca̱ tub mbecy shni.
Orzeꞌ zigy mbecy nu yad par lo nii dem nu ya̱ naca̱ tub fiñ feñ nu dzi ni.
49 Gun Ñgyoozh, biñ nu gac gyicy dela coz, mi zeꞌ tonaꞌ la coz ily ricy num ya̱.
¡Mi zeꞌ tonaꞌ la yon mi!
50 Dub laa tiem nap ricy num de mbecy nu rca lagy lom.
Tant de mbecy zeꞌ nap ricy num, tant iꞌñ dem nu gruu zac par lo nap gyicy num.
51 Coz ily ricy mi nu nac nu dzi fert mi.
Mas la ziꞌl coz nu rboo ic mbecy leꞌ,
tees ptush las mi dem.
52 Mi zeꞌ bloom riiñ nu zu biñ nu nac rey.
Tees laagy nañ mi de mbecy shni.
53 Cuic mi coz nap gow mbecy ran gashtal dzaa la nañ dem.
Zeꞌ mbecy guaniꞌñ,
zuu nez mi dem gyam ñgyiꞌñ yaam.
Ni wabic lam coz nu gow dem.
54 Blocyuub mi de mbecy Israeel, de biñ nu ricy coz nu rniim.
Nunu wanit lagy mi nu nap gyicy num dem
par nu rashni lagy mi dem.
55 Bicy num Abraham gal nu dela nez mi gal nu mniim lo de gyitoo bel ni den nu segur la gyicy mi.
Ni mnii Li.
56 Orzeꞌ Li pcyiiñ nuñ Bee tub chon beey. Orzeꞌ bruuñ yaañ yuꞌñ.
Gul Waa nu griib nis mbecy
57 Na ornu pshuub dzi nu gaal Bee mdoo, orzeꞌ gul tub mdoo gyeey. 58 Orzeꞌ ornu de mbecy nu rcyiiñ num garee ga, gal nu dela famil nim bzaac dey nu nap bicy nu Ñgyoozh mi, orzeꞌ bet lagy dey nuy mi. 59 Orzeꞌ ornu bzaꞌ shuñ dzi nu gul mdoo zeꞌ, orzeꞌ pcaa dey beey sircunsision cuerp ni mdoo zeꞌ. Orzeꞌ bicy pee dey mboo la dey yu laabaꞌ gal nu la uz yu, Zacarí. 60 Tees ñaa mdoo zeꞌ nam:
―¡Cueꞌ! Rlagy ñi loo lan ñi Waa ―nam.
61 Orzeꞌ na dey rab yum:
―Sac ni tub la famil nir nu ni lay ―na dey.
62 Orzeꞌ bicy yaa dey lo Zacarí par nu gad lagy dey lac rlagy yu gruu la mdoo niy. 63 Orzeꞌ bdiiñ yu tub laꞌ yala nu caay loñ. Orzeꞌ dela mbecy tonaꞌ la za nu ic dey ornu bzaac dey nu pcaay: “Yu zeꞌ gruu lay Waa”, pcaay. 64 Orzeꞌ laab or la zeꞌ briib rishniiy tuubaꞌ tir. Orzeꞌ brugyiꞌ ryabic yu gyel mbecy ni Ñgyoozh. 65 Orzeꞌ dela de mbecy nu yuꞌ nuy garee tonaꞌ la gudzib dey. Orzeꞌ dutuub la logyiꞌ ni Judea bzu riidz de coz nu guc. 66 Orzeꞌ dela mbecy nu güeñ riidz zeꞌ gush dey shcab nu nac ñii. Orzeꞌ na dey rab yu losaꞌy:
―¿Ben cyu gac yu nguzh zeꞌ? ―na dey―. Gun rishli gaal rabee nu ricy Ñgyoozh coz ily num yu ―na dey.
67 Orzeꞌ Espiriit Yon briib ic zaꞌ lam Zacarí, uz mdoo zeꞌ. Orzeꞌ brugyiꞌ rniiy por cuen ni Ñgyoozh. Orzeꞌ nay:
68 ¡Rlagy ñi gyabic na gyel mbecy ni Shuaan na, biñ nu nac Ñgyoozh ni de mbecy Israeel!
Gun biid mi nu co mbañ mi dela mbecy nim.
69 Bzuu nez mi tub biñ fert nu co mbañ de ub na.
Mi zeꞌ laabaꞌ nez Dabi, yu nu bicy de coz nu rlagy mi.
70 Gulas mniim nu ni gyicy mi nu nac de riidz nu bzeeñ de yu nu mnii por cuen nim.
71 Nunu mniim nu com de ub na yaa losaꞌ yuun nu yaa de yu nu rzi lagy lon.
72 Ni bicy mi par nu mniim nu nap gyicy num de too bel ni den.
Gun wannit lagy mi trat yon nim.
73 Nunu trat zeꞌ, ndeꞌ riidz nu mniim lo gyitoo bel ni den Abraham nu segur la gyicy mi.
74 Riidz zeꞌ rniiñ nu gyicy mi nu glan lo de losaꞌ yuun,
gun orzeꞌ wadzib la den gyicy den coz nu rniim,
75 nunu gun orzeꞌ cuin lom como nac naa mbecy nu nac nim,
nunu mbecy nu bi byanap lom.
Orzeꞌ cuin lom dutuub la lo yun.
76 Zeꞌ ru, iꞌña̱, mbecy gnii dey nu ru nac ru tub yu nu gnii por cuen ni Ñgyoozh, biñ nu gya zir zu,
gun ru cha gar par lo Shuaan na.
Gyicy nap ru nañ lardoo de mbecy
gal nu ricy nap dey tub nez ornu ded tub yu lily.
77 Gun orzeꞌ gad lagy dela mbecy ni Ñgyoozh nu gyicy sulagy mi de cyi dey.
Nunu co mbañ mi dey.
78 Gun Ñgyoozh ni den, nu nac nu tonaꞌ la rashni lagy mi mbecy nim, ndeꞌ nu ni gyicy num dey.
Gyicy mi nu cyid biñ nu co mbañ mbecy gal nu driib doo.
79 Orzeꞌ dzi zeꞌ cuic mi yaa ni de mbecy nu yuꞌ zeꞌ nu cow, de mbecy nu ca lo cuen nu gat,
gun orzeꞌ lyuuñ ni dey ca par gash yu par nu che ti ri añ ni dey,
na Zacarí.
80 Orzeꞌ yu nguzh zeꞌ zaab raly yu, nunu byafert yu nu nac de coz ni Ñgyoozh. Orzeꞌ pcyiiñ yu tub lugaar ub zi gashtal pshuub la dzi nu blyuuy ub yu lo de mbecy Israeel.