Luda yã takada kũ Bisã yão EBERUNƆ 1

EBERUNƆ

Kirisi de malaikanↄla 1:1-2:18

Kirisi de Musala 3:1-4:13

Kirisi de Haruna buri sa'orinↄla 4:14-7:28

Kirisi sa'orikɛna deńla 8:1-10:39

Ò Luda náani kɛ 11:1-12:25

Lɛ́dammanaa 13:1-13:25

Luda Nɛ́ de malaikanↄla

1Luda yã ò ó dizinↄnɛ yã káaku annabinↄ gãi gɛ̃̀n baaakↄ̃ zɛ́nↄ gũn dasi, 2ama à yã òwɛrɛ a Nɛ́ gãi gↄrↄ kpɛde díkĩnanↄn sà. Nɛ́ pì gãin Luda andunia kɛ̀o, à dìtɛ kũ àkũ mɛ́ anigↄ̃ pↄ́ sĩnda pínki vĩ. 3Àkũ mɛ́ à Luda gakuri tɛ́kɛna ũ, à de a kunna ũ sãnsãn. Àkũ mɛ́ à pↄ́ sĩnda pínki kũna kũ a yã'ona gbãnao. Durunnanↄ kɛ̃mmana gbɛra à vùtɛ musu Luda zↄ̃kↄ̃de ↄplai. 4Lákũ tↄ́ kũ à blèe pì de malaikanↄ pↄ́la nà, lɛn a zↄ̃kↄ̃ deńla lɛ. 5Luda yã dí ò malaika kenɛ yã yá?

Ma Nɛ́mɛ n ũ, ma n i gbãra,

Kesↄ̃:

Manigↄ̃ de a De ũ,

anigↄ̃ de ma Nɛ́ ũ.

6Kũ Luda tò a dauduu sù andunia gũn à pì:

A malaikanↄ donyĩ kɛnɛ ń pínki.

7Malaikanↄ yã musu à pì:

Adì a zĩ̀rinↄ li ĩa ũ,

a zĩkɛrinↄ sↄ̃ tɛ́vura ũ.

8A Nɛ́ yã musu sↄ̃ à pì:

Luda, ĩnigↄ̃ vutɛna kíblegbaaa gↄrↄ sĩnda pínkimɛ,

ndìgↄ̃ n kíkɛgo kũna yãzɛde ũ.

9Ń ye yãmanakɛnaai, n zã vãnikɛna gu.

Abire yãi Luda, n Luda, n ka kín,

à pↄnna pìsimma de n gbɛ̃nↄla.

10Ò pì dↄ:

Dikiri, n andunia zĩni pɛ̀tɛ zaa káaku,

musu bi n ↄzĩmɛ.

11Ń pínki ni gɛ̃tɛ, ama ĩnigↄ̃ kun.

Oni zĩ kũ lán pↄ́kasa bà,

12ĩni ń koko lán uta bà,

ĩni ń litɛ lán pↄ́kasa bà.

Mↄkↄ̃n sↄ̃, n kuuna dìgↄ̃ dokↄ̃nↄ,

n gↄrↄ lakana vĩro.

13À yã dí ò malaika kenɛ yã yá?

Ǹ vutɛ ma ↄplai

ari màgↄ̃ n ibɛrɛnↄ kɛnnɛ n tìntin ũ.

14Malaikanↄ bi nini zĩkɛrinↄmɛ ń pínki. Luda dì ń zĩ de ò kpá gbɛ̃ kũ oni surabana lenↄimɛ.