1Yellu Efɑrɑimubɑrɑ bɑ dɑm bo Isirelibɑ sɔɔ.

Bɑ̀ n bwese kɛri yi yi tie gɑri sɔ̃ɔwɑ,

bɑ rɑ nɑndewɑ.

Adɑmɑ bɑ bũu wi bɑ mɔ̀ Bɑɑli sɑ̃wɑ,

mɑ bɑ gu.

2Wee sere kɑ tɛ̃, bɑ durum mɔ̀ bɑ dɔɔ.

Bɑ tii bwɑ̃ɑroku sii geesuginu kuɑ.

Ben tiiwɑ bɑ bwisikɑ

mɑ bɑ nu sekɑ kɑ ben nɔmɑ

nu kɑ nɑɑ binu weenɛ.

Mɑ bɑ gerumɔ nin sɔ̃ bɑ mɔ̀,

be bɑ yɑ̃kuru nɑ,

bu yiiro bu nɑɑ bii ni sɔ̃su.

3Yen sɔ̃nɑ bɑ koo doonɑ nge bururun kɑkoru

ǹ kun mɛ nge dirum.

Bɑ sɑ̃ɑ nge yɑkɑ si bɑ gurɑ bɑ yɑri doo soo yerun di

su kɑ woo doonɔ

ǹ kun mɛ nge wii si su yɑrimɔ gbɑburun di.

4Adɑmɑ nɛ, nɑ sɑ̃ɑwɑ Gusunɔ ben Yinni

sɑɑ mìn di nɑ bu yɑrɑmɑ Egibitin di.

Bɑ ǹ mɑɑ Yinni goo mɔ mɑ n kun mɔ nɛ.

Fɑɑbɑ kowo mɑɑ sɑri nɛ bɑɑsi.

5Nɑ bu kpɑrɑ sɑɑ mìn di bɑ wɑ̃ɑ gbɑburɔ

mi gɑ̃ɑnu ku rɑ kpi.

6Sɑnɑm mɛ bɑ duɑ tem mɛ sɔɔ,

bɑ di bɑ debɑ nge yɑɑ sɑbe ni bɑ kpɑre,

mɑ bɑ tii suɑbu toruɑ bɑ mɑn duɑri.

7Tɛ̃, ko nɑ n sɑ̃ɑwɑ nge gbee sunɔ

nɑ n bu mɑrɑ swɑɑɔ nge musuku gbeeku.

8Kon bu wɔrimɑwɑ nge gbeeku yɑɑ gɔbɑ

yèn binu bɑ mwɑ.

Kpɑ n ben toronu bɛsuku.

Mɛyɑ kon bu kɑsuku

nge mɛ gbeeku yɛɛ yi rɑ yɑɑ kɑsuku,

kpɑ gbee sunɔ niu gu bu tem.

9Isirelibɑ, wee i kɑm kuɑ

yèn sɔ̃ i mɑn seesi nɛ wi kon kpĩ n bɛɛ somi.

10Mɑnɑ bɛɛn sinɑ boko u wɑ̃ɑ.

I de u bɛɛ fɑɑbɑ ko bɛɛn wusu kpuro sɔɔ.

Mɑnɑ bɛɛn kpɑrobɑ wɑ̃ɑ be i bikiɑ i nɛɛ,

bu bɛɛ sinɑmbu kuɑ.

11Nɑ rɑɑ bɛɛ sinɑ boko wɛ̃ kɑ mɔru.

Mɛyɑ kon mɑɑ bɛɛ nùn mwɑɑri kɑ mɔru.

12Nɑ Isirelibɑn durum yoruɑ nɑ yii sere sɑɑ gɑɑ.

13Isirelin bweseru tɑ sɑ̃ɑwɑ nge bii wìn mɑrubun sɑɑ yɑ turɑ

mɑ u kpɑsɑ wɔri mɔ̀,

ɑdɑmɑ bii wi, u yinɑ u yɑrimɑ.

14Kon bu wunɑ sɑɑ gɔribun wɑ̃ɑ yerun dɑm di.

Kpɑ n bu yɑkiɑ gɔɔn nɔmɑn di.

Gɔɔ, ɑ nɑ kɑ wunɛn bɑrɑ te ɑ rɑ kɑ tɔnu go.

Gɔribun wɑ̃ɑ yeru, ɑ nɑ kɑ wunɛn kɑm kootiɑ.

Domi nɑ ǹ mɑɑ ben wɔnwɔndu mɔ̀.

15Bɑɑ Isirelibɑ bɑ̀ n kuurɑ ɑmɔ,

begibun suunu sɔɔ,

yibɛrɛbɑ bɑ koo nɑ nge woo sum sɑɑ sɔ̃ɔ yɑri yerun di.

Nɛ, Yinni Gusunɔ nɑ kon bu seeyɑmɑwɑ gbɑburun di,

kpɑ bu dɔkɔbɑ gberɑsiɑ.

Kpɑ bwii yi nim kpe.

Gɑ̃ɑ ni nu geɑ sɑ̃ɑ kpurowɑ bɑ koo gurɑ bu kɑ doonɑ.