Luda yã takada kũ Bisã yão ZABURA 106

Isarailanↄ ń durunnanↄ ona Ludanɛ

1Aleluya!

À Dikiri sáabu kɛ, zaakũ à mana,

a gbɛ̃kɛ lakana vĩro.

2Dí mɛ́ ani fↄ̃ à Dikiri yãzↄ̃kↄ̃kɛnanↄ oo?

Dí mɛ́ ani fↄ̃ à a táaki lɛ́ pínkii?

3Arubarikadenↄn gbɛ̃ kũ òdi yã kɛ a zɛ́anↄ ũ,

kũ òdi yã mana kɛ gↄrↄ sĩnda pínki.

4Tó ntɛni a nna kɛ n gbɛ̃nↄnɛ,

ǹ tó ma yã gↄ̃ dↄngu, Dikiri,

tó ntɛni ń sura ba, ǹ ma wɛ́ gwa,

5de ma baka le àgↄ̃ kú n gbɛ̃nↄ nnamanan,

mà pↄnna kɛ kũ buri kũ n ń sɛ́nↄo,

de mani n táaki lɛ́ n gbɛ̃ pìnↄ tɛ́.

6O durunna kɛ̀ lán ó dizinↄ bà,

o taari kɛ̀ o yã vãni kɛ̀.

7Kũ ó dizinↄ kú Misila,

odi Dikiri daboyãkɛnanↄ yã daro,

gbɛ̃kɛyã dasi kũ à kɛ̀ńnɛnↄ sã̀ńgu,

akũ ò sãgbãna kɛ̀ Isira Tɛ̃ra sarɛ.

8Bee kũ abireo à ń sura bà a tↄ́ yãi,

de à a gbãna zↄ̃kↄ̃ mↄńnɛ.

9À kpã̀kɛ̃ Isira Tɛ̃rai, akũ gukori bò,

à gɛ̃̀ kũńwo a wɛ̀ɛn, ò bikũ̀ lán ò pi gbárannan bà.

10À ń bó ń ibɛrɛnↄ ↄĩ,

à ń sí ń zãngurinↄ gbãnaa.

11Í dà ń wɛtɛrinↄla,

bee ń gbɛ̃ mɛ̀n do adi boro.

12Akũ ò a yã kũ à òo sì,

ò a táaki lɛ̀.

13Ama a yãkɛnanↄ sã̀ńgu gↄ̃̀nↄ,

akũ odi zɛ de à lɛ́ daḿmaro.

14Ò pↄ́ble pãnde ni dɛ̀ gbárannan,

akũ ò Dikiri lɛ̀ ò gwà sɛ̃̀ntɛ gwe.

15À pↄ́ kũ ò wɛ́ kɛ̀awa kpàḿma,

akũ à mɛ̀'ibabagyã zĩ̀ḿma.

16Ò gↄ̃ba kpà kũ Musao bùran

kũ Haruna kũ à kú adona Dikirinɛɛo.

17Zĩtɛ pàra à Datani mↄ̀,

à nàkↄ̃a Abiramua kũ a gbɛ̃nↄo.

18Tɛ́ fùtɛ ń ìbanↄ tɛ́,

tɛ́vuraa kùtɛ gbɛ̃ vãninↄa à ń blé.

19Ò mↄ̀ↄ pì zaa Orɛbu lán zùsanɛ bↄ̀rↄↄ bà,

ò donyĩ kɛ̀ ń tãna kũ ò pìinɛ.

20Ò Luda gakuride lilin kɛ̀

kũ zù sɛ̃̀sorii takao.

21Ò sã̀sã Luda ń surabari yãn,

kũ à yã zↄ̃kↄ̃nↄ kɛ̀ńnɛ zaa Misila,

22kũ à daboyãnↄ kɛ̀ Hamu burinↄ bùsun,

kũ à naasiyãnↄ kɛ̀ Isira Tɛ̃ra lɛ́a.

23Abire yãin à pì áni a gbɛ̃nↄ kakatɛ,

akũ Musa kũ à a sɛ̀ɛ kpànɛ,

à tò a pↄ kpàtɛ, adi ń kakatɛro.

24Ò bùsu nide kũ̀ gya bò,

ò gì Dikiri yã náani kɛi.

25Ò yãvunu kà ń bizakutanↄ gũn,

odi do Dikiri yãiro.

26Akũ à ↄ pã̀tɛ à la dàńnɛ à pì,

áni tó ò gaga gbárannan,

27áni tó ń burinↄ gaga burinↄ tɛ́

áni ń fãkↄ̃a bùsunↄ gũn.

28Ò dò Peo tãnai,

ò pↄ́ kũ ò sa òo pↄ́gɛnↄaa blè.

29Ń yãkɛnanↄ Dikiri pↄ fɛ̃̀,

akũ gagagyã gɛ̃̀ńgu.

30Finɛasi fùtɛ à yã pì tɛ́ dɛ̀,

akũ gyã pìi zɛ̀.

31Akũ Dikiri tò yã bò kãao nna,

a bàka kú kãao ari a buria.

32Ò Dikiri pↄ fɛ̃̀ Mɛriba í kĩnaa,

akũ yã bò kũ Musao vãni ń yãi.

33Zaakũ ò a nɛ̀sɛɛ yàka,

akũ à yã ò laasunn sari.

34Odi bùsupidenↄ kakatɛ

lákũ Dikiri dìtɛńnɛ nàro.

35Ò kɛ̀ kↄ̃ gbɛ̃nↄ ũ kũ buri pìnↄ,

ò ń futɛokara ágba sɛ̀.

36Ò dò ń tãnanↄi,

akũ yã pì gↄ̃̀ńnɛ tankutɛ ũ.

37Ò ń nɛ́gↄ̃gbɛ̃nↄ kɛ̀ sa'opↄ ũ,

ò sa ò tãnanↄa kũ ń nɛ́nↄgbɛ̃nↄo.

38Ò taarisaridenↄ kùtu kpàkpa,

ń nɛ́gↄ̃gbɛ̃nↄ kũ ń nɛ́nↄgbɛ̃ pìnↄ.

Ò sa ò kũńwo Kanaanↄ bùsu tãnanↄa,

akũ ń bùsuu pìi gbã̀a lɛ̀.

39Ò gbã̀a lɛ̀ ń yãkɛnanↄ yãi,

ò gↄ̃̀ náanisaridenↄ ũ ń yãkɛnanↄa.

40Akũ Dikiri pↄfɛ̃ kìpaḿma,

à ye gbɛ̃ kũ à ń sɛ́nↄ kãi doro.

41À ń kpá burinↄa,

akũ ń zãngurinↄ kí blè ń musu.

42Ń ibɛrɛnↄ gbãna mↄ̀ńnɛ,

ò ↄ tↄ̃̀ḿma.

43Àdigↄ̃ ń bo gɛ̃̀n baaakↄ̃,

ama ò zɛ̀ kũ ń sãgbãnakɛnaao,

akũ ò vlɛ̃̀ ń durunna gũn.

44Bee kũ abireo tó à ń wiki mà,

àdi ń warikɛna yã da.

45Ń yãi àdi dↄ a bàka kunna kũńwo yãn,

àdi a nɛ̀sɛ litɛ a gbɛ̃kɛ zↄ̃kↄ̃ yãi.

46À tò gbɛ̃ kũ ò ń kũkũ zĩ̀zↄ ũnↄ

ń wɛ̃nda gwà.

47Dikiri ó Luda, ǹ ó sura ba,

ǹ ó bↄtɛ burinↄ tɛ́ ǹ ó kakara,

de ò n tↄ́ kũ à kú adona bo

ò ĩa dã kũ n táakilɛnaao.

48Arubarikade Dikiri, Isarailanↄ Luda

zaa káaku ari gↄrↄ sĩnda pínki!

Gbɛ̃ sĩnda pínki pi aami!

Aleluya!

TAKADA SƆƆRODE

Zabura 107-150