1Adi kɛ ókↄ̃nↄnlo Dikiri,

adi kɛ ókↄ̃nↄnlo,

mↄkↄ̃mmɛ ń de ò n tↄ́ bo

n gbɛ̃kɛ kũ n náanio yãi.

2À kɛ̀ dera burinↄ dì ó la

ò pi ó Luda kú máa?

3Ó Luda kú musu,

pↄ́ kũ à yein àdi kɛ.

4Ò ń tãnanↄ pì kũ andurufuuo kũ wuraao,

bisãsiri ↄzĩmɛ.

5Ò lɛ́ vĩ, ama òdi yã oro,

ò wɛ́ vĩ, ama òdi gu ero.

6Ò sã vĩ, ama òdi yã maro,

ò yĩ vĩ, ama òdi pↄ́ gbĩ maro.

7Ò ↄ vĩ, ama òdi pↄ́ kũro,

ò gbá vĩ, ama òdi táa oro,

òdi kòto kɛkɛro.

8Ń pìrinↄn lɛɛlɛ kũńwomɛ

kũ gbɛ̃ kũ òtɛni ń náani kɛnↄ ń pínki.

9Isarailanↄ, à Dikiri náani kɛ!

Àkũmɛ á kpanyĩri ũ kũ á sɛ̃gbakoo.

10Haruna burinↄ, à Dikiri náani kɛ!

Àkũmɛ á kpanyĩri ũ kũ á sɛ̃gbakoo.

11Dikiri vĩnakɛrinↄ, à Dikiri náani kɛ!

Àkũmɛ á kpanyĩri ũ kũ á sɛ̃gbakoo.

12Dikiri dↄ̀ ó yãn,

ani arubarika daógu.

Ani arubarika da Isaraila burinↄgu,

ani arubarika da Haruna burinↄgu,

13ani arubarika da a vĩnakɛrinↄgu,

nɛ́ fíti gbɛ̃ zↄ̃kↄ̃.

14Dikiri á buri kara,

ákↄ̃nↄ kũ á nɛ́nↄ.

15Dikiri arubarika daágu,

musu kũ zĩtɛo Kɛ̀rii.

16Musu bi Dikiri pↄ́mɛ,

ama à zĩtɛ nà bisãsirinↄnɛ ń ↄĩ.

17Adi kɛ gɛ̀nↄ mɛ́ òdi Dikiri táaki lɛ́ro,

kesↄ̃ gbɛ̃ kũ ń lɛ́ yĩtɛnↄ.

18Ókↄ̃nↄ, ónigↄ̃ Dikiri sáabu kpá

zaa tera ari gↄrↄ sĩnda pínki.

Aleluya!