1Dikiri, ǹ tó Dauda yã gↄ̃ dↄngu

kũ wari kũ à kɛ̀nↄ pínki.

2À la dà Dikirinɛ,

à lɛ́ sɛ̀ Yakubu Luda gbãnadenɛ à pì,

3áni gɛ̃ kpɛ́nlo,

áni wútɛ a gádoaro,

4áni we à idekũ dɛro,

áni tó i na a wɛ́aro,

5ari à gɛ́ gu leo Dikirinɛ

à kpɛ́ bo Yakubu Luda gbãnadenɛ.

6O a baaruu mà Ɛflata bùsun,

o boa Yarimu bura.

7Ò gɛ́ a kúkia,

ò kútɛ a tìntin arɛ.

8Dikiri, ǹ futɛ ǹ su n kipakia,

mↄkↄ̃n kũ n gbãnakɛ àkpatiio.

9N gbàgbarinↄ manakɛ da uta ũ,

n yãmarinↄ ayuwii gↄ̃ dↄ.

10Ǹsun mìkpɛrɛ zu kína kũ n kàanɛro

n zↄ̀bleri Dauda yãi.

11Dikiri sì kũ a kunnaao Daudanɛ,

à náani vĩ, ani lɛ́ litɛro, à pì:

Mani n burinↄ doke ká n kpatan.

12Tó n burinↄ ma bàka kunna kũńwo yã dà,

tó ò yã kũ ma dàńnɛnↄ kũna,

ń burinↄ nigↄ̃ vutɛ n kpatan gↄrↄ sĩnda pínki.

13Zaakũ Dikiri Zaiↄ̃ sɛ̀,

à ye àgↄ̃ de a vutɛki ũ, à pì:

14Gu dín manigↄ̃ kun gↄrↄ sĩnda pínki,

lan manigↄ̃ vutɛna, zaakũ à ma pↄ gbàmɛ.

15Mani arubarika dan manamana,

mani pↄ́ble kpá a takasidenↄa à mↄ́ḿma.

16Mani surabana da a sa'orinↄnɛ uta ũ,

ma yãmarinↄ ayuwii nigↄ̃ dↄ.

17Gwen mani Dauda buri kína gbãnade bon,

gwen kína kũ ma kà tɛ́ nigↄ̃ kún.

18Mani wé'i da a ibɛrɛnↄa,

a kífura nigↄ̃ pí a mìia.