Híluuŋuyee ha hiti Yéesu
ⅠYéesu naameeŋ niŋ Kunuu ka keenape ka, náafulii ti musuu ma miti Jordan. Kunuu ka nkiyeniyoo kátintiŋan pati káahaaŋ ka tes. ⅡNaayeno po fo kunoom áwii ésupak, Seetaani ya ti hiŋes híluuŋuyoo. Aliit waah ti oom kunoom púlooŋ, ti pikelan, peep mpucokoo.
ⅢSeetaani ya neesokoo: “Niŋ awe yem Añii Pútuun, sok énankiin eyye eyeso hímpuul.” ⅣYéesu naañahan yo: “Kiiceekiic ti hilim ha hiti Pútuun pa: 'An ataloŋ niŋ hímpuul lamma.'”
ⅤSeetaani ya neecoopoo patiila la haane, néeyisanoo mpacas cáwii ca citi mah ma púlooŋ. ⅥNeesokoo: “Inci fawufani kayine enke púlooŋ niŋ hamake ha hiti cáwii ca, kaatuko inci nkuwufanee, yíniyini kawufan etenko an óo an aŋa ínsuumaam. ⅦFiye, náakilipiyaa hátikinam ti hímulu, efikiyeno púlooŋ kitii.” ⅧYéesu naañahan yo: “Kiiceekiic ti hilim ha hiti Pútuun pa: 'Hátikin Ateeteyo Pútuun pa pitii áafakilipo ti hímulu, niŋ pikina lamma aññaŋe hítuulu.'”
ⅨSeetaani ya néetintiŋanoo Jerusalem episilanoo la haŋe la pahaan ti ekumpaan ya enfakat ya eti Pútuun pa. Nene esokoo: “Niŋ awe yem Añii Pútuun, fúl le cípo t’etaam. ⅩKamma nkiicee ti hilim ha hiti Pútuun pa:
'Efipusok pumaleekoo etempo pumankooli;
Ⅺ niŋ sipees etempo éfipiseepini,
eeha efihiwun ha kooti etikilooŋoolo ti énankiin.'”
ⅫYéesu naañahan yo: “Kiiceekiic ti hilim ha hiti Pútuun pa: 'Aañaŋut puwinko Ateeteyo Pútuun pa pitii.'” ⅩⅢTa Seetaani ya neepaye ta hiŋes híluuŋuyoo ha púlooŋ, neekatanoo fo ti cikee caanak.
Píyaañ páhin pa piti Yéesu
ⅩⅣToko fúle, Yéesu naañoho Kalilee, niŋ pameeŋ sempe sa siti Pútuun pa séefulii sa ti Kunuu ka keenape ka. Pakan paka nkáyaañ káakup kiteyoo ti pisaatee pa púlooŋ péekinkoolii pa. ⅩⅤNaayeno kakalaŋan ti púluumuma pa piteyii, pakan paka púlooŋ nkayeniyoo hímulu.
Hipookuyee ha hiti Yéesu Naasalet
ⅩⅥPúful toko, Yéesu naakaay Naasalet pa náakulee pa. Ti hinoom ha hiti kayeno ka kiti Pusuwif pa naanako ti éluumuma ya eteyii samat nii fa naasale fa íhinu. Naalito apisiiŋo kati akalaŋ. ⅩⅦNkañaakanoo kaahit ka kiti ayaamakoola ya Esaya. Apúpoonin ko, naacuk la nkakiice la:
ⅩⅧ “Kunuu ka kiti Ateeteyo unka t’inci
kamma nkimamalaam
kati túunan ekooŋan éesuume ti keeleke ka.
Kúpoñiyaampoñ kati kaman keekulee ka nii éfikafulii,
niŋ kéefuume ka nii éfikañohoonii ti hicuku,
kati fúlan keekallanee ka ti kúnuul,
ⅩⅨ nkaman etiil eyya Ateeteyo áfaayisan pásuum pa piteyoo.”
ⅩⅩNaapoon kaahit ka naañaakan ko áhina ya naacaayeno. Keeyeniye ka ti éluumuma ya púlooŋ cew ñíkinii iññiya teyoo. ⅩⅪNáayaañ hisokuyii: “Fíyooy, heekiicee eehe hitaakiyaa ti pásiyal aluu.” ⅩⅫPakan paka púlooŋ nkákup héesuume teyoo, ínnimii ti kilim ka kéesuume ka kéefulii ka ti putumoo. Nkacakan: “Fo aŋe tom ayem Josef añiinoo?” ⅩⅩⅢYéesu naasokii: “Híiniyaamhiini nii efinifinam ti kusoku enke: 'Akúuñana kúuñanoolo! Hín le ti saatee ya etii, samat nii eeha núusiye ha ánhine Kafaanawum.'”
ⅩⅩⅣNaapenan hisokuyii: “Pánipani, ayaamakoola asayanantee ti saatee ya eteyoo. ⅩⅩⅤPíhiiniyan aluu nii ti caanak ca citi ayaamakoola ya Elí, etiil ya enuput fo sitiil síhaaciil niŋ kiim isak niŋ hoonool, épankul neeyeno ti mah ma púlooŋ. Tempo, intaako piyaaŋat peemeeŋe Israyel payenka pákayiinii keekete. ⅩⅩⅥPútuun pa pupoñut Elí ti akee ti payenkuu, pale ti ekee eyaaŋat aŋa áyiinoo eekete ati saatee ya eti Salepat pukol saatee ya eti Siton. ⅩⅩⅦTi caanak ca citi ayaamakoola ya Elise, intaako lompo kayoŋ púkuuña pakati kanuk ti mah ma miti Israyel, pale háati oonool teyii akuulanutee fo Neeman lamma ati Siriya.”
ⅩⅩⅧPakan paka púlooŋ keeyeniye ka ti éluumuma ya, kiiñii nkili ta nkásiye ta enke fiye. ⅩⅩⅨNkayito, nkáfulanoo ti saatee ya. Nkacoopoo patiila kanaac cítintiŋ ca la saatee ya neelutee la, kati káhalapiyoo t’etaam. ⅩⅩⅩPale Yéesu náanapii ti pututa kayoŋ ka naakaay pítinoo.
Hiyaanu hísaalumant seetaani
ⅩⅩⅪ Yéesu náawanoonii Kafaanawum, saatee eti Kalilee, naayeno kakalaŋan pakan paka ti hinoom ha hiti kayeno ka kiti Pusuwif pa. ⅩⅩⅫInnímii ti pakalaŋanal pa piteyoo, kamma hilim ha hiteyoo nihitaake sempe.
ⅩⅩⅩⅢIntaako la ti éluumuma ya áyiin aŋa hísaalumantseetaani nihinakiye. Náaceekii niŋ kaawiiluyoo: ⅩⅩⅩⅣ“Katan unii! Weyme uyem ti pututa unaa, Yéesu ati Naasalet? Fo áakeyyookey aakati púcalool unii? Inci méyimeyi awe yem ayme: Eesampanee ya ati Pútuun pa!”
ⅩⅩⅩⅤYéesu naafet teyyo: “Fatan! Fúlii teyoo!” Hísaalumant ha nihitah áyiin a t’etaam hátikin pakan paka púlooŋ, níhiful teyoo peekuumutoo.
ⅩⅩⅩⅥPakan paka púlooŋ nkaŋaŋo nkayeno picakanool: “Hilim eehe, hilim puume? Ti kayine niŋ sempe nasok kísaalumant ka kúfulii, nkúful!” ⅩⅩⅩⅦKiti Yéesu nkísiyo ti pisaatee pa péekinkoolii pa púlooŋ.
Káakuuñan ka kiti keemeeŋe ka
ⅩⅩⅩⅧYéesu ápufulii la ti éluumuma ya naanako la ti ekumpaan ya eti Simon. Simon aasonoo aal naayeno niŋ káakuuñu kiti pasowe-enii kenfakat, nkaluum Yéesu apiyankananoo. ⅩⅩⅩⅨNaañeeho toko teyoo naafet ti pasowe-enii ya mpúful. Tokotoko náayitoonii, naamankoolii.
ⅩⅬTi panowal caanak ca, pakati káakuuñu óo káakuuñu nkácoopiyee ti Yéesu, naalemp sipeesoo ti an óo an teyii, náakuuñanii. ⅩⅬⅠ Kísaalumant lompo nkúfulii ti pakan keemeeŋe, nkiyeno hiceeku: “Awe yem Añii ya ati Pútuun pa!” Pale naafet tenko naakit ko káakup kamma nkimeya nii akina ayem Eenucee ya ati Pútuun pa.
ⅩⅬⅡCipilap, Yéesu naañako apiyeno lamayoo. Kayoŋ ka nkiyeniyoo hiŋes, ta nkítookiyoo ta la naayeniye la, nkílafiyoo hicoku tikimpi akatanii. ⅩⅬⅢPale naasokii: “Inci ñaŋaa káatuunan ekooŋan ya éesuume ya eti cáwii ca citi Pútuun pa ti pikee pisaatee pa lompo, heewune ha inci ímpoñiyee.” ⅩⅬⅣNaayeno káatuunan eteeho ti púluumuma pa piti Yutaay.