1A be Yicu ombajidalu ngwengga ngwüjü ngwanni ngwünänü ndi angidaci Ngwaalinga ngwüꞌrïnyä gwegen kobo. 2Ngwube engga ꞌto dayu diru dedel diru diwayi ngwügätïjï bartad ngwäy rom. 3A Yicu ari, “ꞌDidanu nggwa je ci dedel ndee diru diwayi dima geꞌte gwonyadana ngwüjï ꞌdar. 4Ndi ari ngwüjï ngwee ꞌdar ngwugeꞌta angidajing gwoko koola gegen, a be daw ndee diru diwayi gwugeꞌtengalu ꞌdar gwoko gwüngün gwanni gwätïng gwani eny gwüngün.”

5A ngwüjï ngwoko ji ndi abinga ngwuꞌdun ngwudi gobo ngwüpäär je nono yoꞌrr ye yijaw yiꞌrura aar je üpï nono ngwong ngwe ngwanni ngwati aar je angidaci Ngwaalinga. 6Ngwuje be ci nu, “Ngaa länggädï ngwuꞌduna ngwee, yomon yila yanni yaꞌti ya ye mbuji goꞌrra kwenggenala ꞌdar ya gätïnï gïdïyängälü.”

7Aar otacalu, ngwujaꞌri ngwe ngwee aar ci, “Gwani Doorta, yiꞌral giyee yadi ji jadu? Yiꞌremna yiru ange yanni yadi nje enggaci gomon ganni gadi ge yiꞌral giyee ji?”

8A Yicu ari, “Arnganar aaꞌti ngaa la dudi, lonyadu laji lila ngwürïny ngwe ngwüny la ari, ‘Äny gwani nginde’ na ‘Gaji gima be ja gito.’ Aaꞌti be la je gwujani! 9Ma aang ꞌdingini yäärä ye a obadalu ji, aaꞌti be yedeny ya je eny. Yiru be giyee yanni yadi ji gwerre gwerre, a be yomon yäꞌtüdï na yadi medadi puprang!”

10Ngwuje be ci, “Ngwüjï ken ngwa gwurlada ngwüjü ken giꞌter na yeleny ken ya gwurlada yelenya ken giꞌter. 11A dïyäng da lagadalu gwanni gwukalu gikidang ngwaalu mbüny mbüny, a ngwamu ngwa ji ngwaalu ꞌdar, a dimdi da ji donyadanu a ngwüjï ngwa je yedeny eny, yiꞌral yiru yedeny ya ji na yiꞌremna yipa ya ji kerala. 12A be gwerre gwerre ndi aar ji, ngwüjï ngwa je le gwurlanu la je übïnälü. La je apada ngwämrä na giyorkon, la je apada ngweleny na ngwartan, ꞌdar gwani ngwürïny ngwüny. 13ꞌDar giyee ya je gäbïcï ngaa ru ladi inggidi ꞌdenggen. 14Geꞌtar yigor yalu mama gwerre gwerre aaꞌti ngaa la egenanalu ara je yigor pänü awa ngaa ladi ruci yigoꞌro yalu 15Lïngïdär ndi ari nggwa je ätädä ngwujaꞌri na bebere ndi ondaji gwaꞌti gwa güwän galu burni ndi obedalu. 16Lïngïdär ꞌto ndi ari papanga, ngweengga, gïïlü na ngwumaad la je le gwurlanu, la je ꞌrinye loko. 17Ngaa la ke ngwüjü ngwäy ꞌdar gwani äny. 18A be läꞌrü leꞌte pu kiꞌra galu laꞌti la dudi aꞌtur. 19Määtä gwe yigor yalu ꞌdïꞌdäny, ngaa la be gïlängïdïnï gwani yigoꞌro yalu.”

20“Ma ji ma aang enggada Üräjälïmïng ma gwuꞌtulu änänü ngwudi güwän, ngaa be lenge ndi ari geradalu gwüngün gwuma be ja gito. 21Ngwüjï ngwanni ngwuju Yäwüdïyä ngwa abra giyenala, a ngwüjï ngwanni ngwa ji ꞌdunu aar ꞌtü aar abrada poor, a ngwanni ngwoo gïtäny, aaꞌti ngwoꞌrada ꞌdunu. 22Ngwujaꞌri ngwee ngwuru gimra ngwadi ji nunnu a ngwujaꞌri ätï ngwäyänü ngwanni ngwüllïnä kitabanu gidi Ngwaalu. 23A be dïrbä da ji dipa ngwaw ngwanni ngwuju ngwari ngwe na ngwanni ngwiꞌriya giyomon giyoo! Ndi ari dïrbä da ji dipa gïdïyängälü a güündä ga ïꞌdï ngwüjü ngwoo. 24Ngwa aar je ꞌrinye ngwa aar je ummi ngwa aar je giki yirna ye ngwa aar ngwe badalu giyen ꞌdar. A Üräjälïm gwa ngwüjï ngwuru Garany ruꞌti yora ye ꞌdi a gaji gegen gadi ge Ngwaalu ari medadi.

25Yiꞌremna ya ji gilingen, gïdüüwä na giyuurrum. Gïdïyängälü ngwüjï ngwa ji gïyündä a ngwa je yedeny eny gwani dudu didi yaw. 26A ngwüjï ngwäyïnï yedenyo giyiꞌral yanni yadi ärrïnï gïdïdlä, ngwong ngwa lagadalu kerala.* 27Kaji nggoo la be enggada Gïjü gidi Dïjï dümnä ga üllä gïyïbäꞌrälä yiima ye na näjï gwe gwupa. 28Ma ji ma yiꞌral ji ndi ji giyee, mätïnär bälü ꞌdïꞌdäny aang ꞌdïꞌräjï yiꞌrala yalu ngaa lenge ndi ari üꞌrälü gwalu gwuma be ja gito.”

29Ngwuje be mïꞌrïcï ngwujaꞌri ngwee, “Ïrïyär ngwäyälü gidaꞌri diru dimnigor a ngwaꞌri ꞌdar. 30Ma ji manari ngwuma je engga ma aar ꞌtüdïnä ngwänï ngwegen ngaa be lenge ndi ari yirram yima be ja gito. 31Yiru gu ꞌto no ma ji manari ngaa lima enggada yiꞌral giyee yima ärrïnï, ngaa be lenge ndi ari yeleny yidi Ngwaalu yima be ja gito.

32Nggwa je ci ꞌdiꞌdidanu lïngïdär ndi ari yiꞌral giyee ꞌdar ya ji gwerre gwerre ndi ngwüjï ngwudi gimaad nggee gwenene bali. 33Gere na dïyäng la dudi a be ngwujaꞌri ngwüny ngweꞌte pu ngwaꞌti ngwa dudi aꞌtur.”

34“Arnganar ndi ari aaꞌti yigor yalu ya je gändäjï ndi amiꞌra gwudi lingeno ara je diꞌrica rlälïyï ara je yigor pïcï yiꞌralanu yidi lingeno. Ngaa laꞌti lengeca gomon nggäꞌdï ga je dïrbänälü ga je gwüꞌrübäjälü nono gwele ngwüꞌdïbä. 35Ndi ari gadi ïlïjä ngwüjälü ꞌdar gïdïdlä. 36Jar balu ngwäy ngwe aang otaci Ngwaalingalu giyomonalu pipiꞌriꞌti ngaa ji ngaa burni ndi ꞌtü giyiꞌralanu giyee yanni yaji ya ji. No ngaa ji ngaa dünä Gïjü gidi Dïjï dümnä ngwäyänü.”

37Ating ji ndi enggaci ngwüjü ngwujaꞌri ngwudi Ngwaalu kobanu lingen le a be dilu de ating be ele ngwuja gidotrala gicaar Gidotr gidi Ngwümïnïtï. 38Ati be ngwüjï elada ꞌtuꞌtu dilu danu ndi geraja länï kobanu.