1A be Yicu ondaci ngwüjü na ngwooꞌra ngwüngün ngwuje ci, 2“Ngwoorta ngwudi yobo na Ngwübärrïjï limandu ngwujaꞌri ngwanni ngwätädï je Ngwaalu Müjäng ara je enggaci. 3ꞌDengenajar je aang ärrï yiꞌral ꞌdar yanni yadi ara je ye ci. Aaꞌti be ngaa lärrï yiꞌral yegen yanni yati aar je ärrï ndi ari lati ꞌti ärrü yiꞌral yanni yati aar je ondaci ngwüjü lingla le. 4Ngindenga lati giki ngwony ngwünï aar je üpïyï ngwüjü ngwulli, aar ꞌti be ätï yiima ndi alliji gomon aar je ꞌdonggajalu.

5Yiꞌral ꞌdar yanni yati aar je ärrï, yati aar je ärrï nunnu a je ngwüjï engga. Ati aar genne ngwureda ngwongra ngwuyanu aar je oleyi jürtädä. 6Ngindenga lati jada ndi jalu gweere ngwaalu ngwudi yïꞌrïnyïnä a je ngwüjï näjï aar jada ndi jalu ngwuduꞌri kiꞌra gweere ngwämrä. 7Ati aar jada nda je ngwüjï aganni ngwaalu ngwudi ngwiliny aar je urnidi, ‘Ngwoorta.’ ”

8A je be Yicu ci, “A be laꞌti la je urnidi ngang je ‘Ngwoorta.’ Ndi ari ngaa lätï Dorta deꞌte pu na nga nga ꞌdar liru yengga. 9Na aaꞌti ngaa lurnidi dïjü dere ngene gïdïyängälü aang ci, ‘Papa,’ ndi ari ngaa lätï Papang gweꞌte pu a nggwo kerala. 10Na aaꞌti ngaa lämnï ndi ara je urindi ara je ci, ‘Deleny,’ ndi ari gwätängää gweꞌte pu gwuru Deleny gwanni Gwubrutaar yelenya. 11Gwere gwanni gwupana ꞌdanggalanu, ngwokeye ligoꞌro lüngün ngwuru dïnäd dalu. 12Ndi ari gwere gwanni gwadi oleye ligoꞌrala lüngün gwa aar ülläjälü, na gwanni gwadi üllïyï ligoꞌranu lüngün, gwa aar oleyala.”

13A je Yicu girinya ngwuje ci, “Wäjäj bi ꞌdanggalu liru ngwoorta na Ngwübärrïjï, na nga nga gilee liru ngwumurꞌtuny! Ngaa lati längïtäcï ngwüjü yelenya yidi gerala ngwäy. Nga nga yigoꞌro yalu laꞌti gwanu na aang ꞌti gäbïcä ngwüjü ngwanni ngwadi änï aar änï!*

15Wäjäj bi ꞌdanggalu gilee liru ngwoorta na Ngwübärrïjï na gilee liru ngwumurꞌtuny! Ngaa lati landalu ngwaalu ꞌdar ngaa üꞌrü yaanu ndi ari aang mbuji dïjü deꞌte pu aang änïjï giyobo yalu, ma be ari dima aang mbuji, ngaa be gwürlï ngwujaꞌri ngwe ngwalu ngwukani yomonanu rom ngwuru dïjï didi lïgä lidi yiꞌrendeny nono ngang je.

16Wäjäj bi ꞌdanggalu gilee lati okta ngwüjü lïrïmü ngwäy! Ngaa lati ari, ‘Ma dïjï pï yiꞌrany ngwürïny ngwe ngwudi gobo, yiru ꞌtur. Ma be ari gweere gwuma pï yiꞌrany ngwürïny ngwudi dab kobo, gwa aar üpïyï yiꞌrany giyee.’ 17Wä nga nga gilee lïrïmü ngwäy! Yiru ange yanni yipana dïmürä, dab diru gwalla gobo giru, ganni gati juꞌriyi dab? 18A ngaa lati ari ꞌto, ‘Ma dïjï pï yiꞌrany ngwürïny ngwe ngwudi dagad, yiru ꞌtur. Ma be ari gwere gwuma pï yiꞌrany ngwürïny ngwe ngwudi ngwong ngwangidacaar je Ngwaalinga gidagad, gwa aar üpïyï yiꞌrany giyee.’ 19Wä ngwüjï ngwee ngwürïmü ngwäy! Yiru ange yanni yipana, ngwong ngwangidacaar je Ngwaalinga gwalla dagad danni dati juꞌriyi ngwony ngwanni ngwangidajaar je Ngwaalinga? 20Yäy gu no, dïjï danni da pï yiꞌrany ngwürïny ngwe ngwudi dagad, dïpïdï yiꞌrany dagad de na ngwong ꞌdar gidagadalu. 21Na dïjï danni da pï yiꞌrany ngwürïny ngwe ngwudi gobo, dïpïdï yiꞌrany gobo ge na nginde gwe gwanni gwati gu janu. 22Na nginde gwanni gwa pï yiꞌrany ngwürïny ngwe ngwudi gere, gwüpïdï yiꞌrany diduꞌri de didi yeleny didi Ngwaalu na nginde gwe gwanni gwati gu jala.

23Wäjäj bi ꞌdanggalu gilee liru ngwoorta na Ngwübärrïjï na gilee liru ngwumurꞌtuny! Ngaa lati gwällïjï Ngwaalinga yiꞌra ngwong ꞌdï yidi ngwuuwa ngwuru nana na ngwüjïrtän na kämün, ngaa be ïꞌdädänü ngwujaꞌri ngwe ngwudi yobo ngwanni ngwojemana ngwani übïdänü, ïnä na yigor yeꞌte pu. Yaada je ärrï giyee ngaa je ꞌti dodana giyone. 24Wä ngaa gilee lati okta ngwüjü lïrïmü ngwäy! Ngaa lati äbrï dïrüꞌtü giyaanu ngaa be ngadini damla.

25Wäjäj bi ꞌdanggalu ngaa gilee liru ngwoorta na Ngwübärrïjï na gilee liru ngwumurꞌtuny! Ngaa lati uyi gutra nono gidi ïyï na ginya nono poor gidi eny, a be ngïnäꞌdänü ngaa be onyadi ubinganu giyigoranu yalu na amiꞌra gwudi yigoꞌro yalu. 26Wä Ngwübärrïjï ngwee ngwürïmü ngwäy! Gwerre gwerre, uyar yutranu yidi ïyï yaw na yiny yidi eny yani yigor yalu ngïnäꞌdänü, ya be jayi nono ꞌto poor.

27Wäjäj bi ꞌdanggalu, gilee liru ngwoorta na Ngwübärrïjï, na gilee liru ngwumurꞌtuny! Ngaa liru nono ngwumomo ngwanni ngwübïꞌrïjüdäär je nono poor aar bidi, a be ngïnäꞌdänü aar be onyadi yuyanu yidi ngwüjï ngwayu na yiꞌral ꞌdar yanni yïrngü! 28Ngaa liru gu no ꞌto ngwüjï ngwata je engga poor lïdünälü ngaa be onyadi yimurꞌtunyanu na yijegoꞌrr ngïnäꞌdänü.

29Wäjäj bi ꞌdanggalu, gilee liru ngwoorta na Ngwübärrïjï, na gilee liru ngwumurꞌtuny! Ngaa lati odaci ngwïjïrä ngwumomo ngaa üpï ngwumomo yiꞌrura ngwudi ngwüjï ngwanni ngwüdünälü. 30Ata be ari, ‘Adinari a liju gaji gidi ngwügüürnä ngwege, laꞌti laadi ar le acajidi ndi ꞌrinye ngwïjïrä.’ 31Ngwujaꞌri ngwee, nga linggida ndi ari ngaa liru ꞌdidanu yïjï yidi ngwügüürnä ngwanni ngwüꞌrïnyïtï ngwïjïrä. 32Onjajar je be yanni yiki yima je ngwügüürnä ngwalu üꞌrïdïnänü kay ngaa je medaji.

33Wä ngwüüngä ngwee! Ngaa gilee liru yïjï yidi ngwägïrïny! Ngaa ladi abri awa ndi aar je le obalu gïlïgä lidi yiꞌrendeny? 34Yäy gu no, nggwa je be ükäcä ngwïjïrä na lanni libebera na ngwoorta, loko la je ꞌrinye la je pä gïyüꞌrï na loko la je pï ngwacal ngwe ngwämrä ngwalu la je linynyalu gïyündär gïyündär. 35No, la je üpïyïnï yïnä yidi dïjï danni dïdünälü yanni yïrädälü ngene gïdïyängälü, ꞌtuꞌtu gïyïn yidi Äbïïl gwanni gwüdünälü, ꞌdi aar obani gïyïn yidi Jäkärïyä gïjï gidi Birikiya, ganni gïꞌrïnyïtängää gidiliganu kobo na dagad. 36Nggwa je ci ꞌdidanu, yiꞌral giyee ꞌdar ya mbuji ngwüjü ngwudi gimaad nggee.”

37“Wä ngwüjï ngwudi Üräjälïmïng! Wä ngwüjï ngwudi Üräjälïmïng! Ngaa lïꞌrïnyïtï ngwïjïrä ngaa je aci yoꞌrr ye lanni lükäjäär je ꞌdanggalu, awa yomon yonyadu nggwümïnä ndi gwäꞌräjï yïjü yalu giꞌdu nono gwele ati gu dagru gwäꞌrï yïjälü yüngün ngwubung ngwe, ngaa be ꞌdonya. 38ꞌDinginar, ngwuꞌdun ngwalu ngwa ara je gätïjänï ngwüllü giꞌra ge! 39Ndi ari nggwa je ci, ngaa laꞌti ba be liny engga mana ꞌdi a gomon ila nggäꞌdï ganni ga ge ari, ‘Gwonjacaar gwanni gwïndï ngwürïny ngwe ngwudi Deleny.’*”